Mateyo 22 - Kishambala New Testament 2005

Lushimo lwa nteγuzi ya kizumbe. 1-10.

¹ Yesu azaandiila vituhu kulonga kilushimo, azawati:

² Uzumbe wa lwingu wafanana na zumbe ywa kiinushi mwemubindila ṅwanae nteγuzi.

³ Azatuma wabwanga wakwe kwa itanga walalikwewo kwe nteγuzi, miya waja wazalemela kuiza.

⁴ Vituhu azatuma wabwanga watuhu angwe: Waγambilei waja walalikwewo kuti: Shivyo, nizaliγanya mizuγilo yangu, nkambaku na ndama zenona zizabinda kukoṅwa, vyoshe vizaliγaniia, izai kwe nteγuzi!

⁵ Miya waja wazalemela, wazahita, muṅwe nkoi kwakwe, muṅwe kwe uchuluzi wakwe;

⁶ waja watuhu wazagwila wabwanga wakwe, wazawatowa, wazawakoma.

⁷ Miya yuja zumbe azakwelwa ni maya, azatuma ntimizi zakwe, zizabinda waja wampoko, zizaokela muzi wawe.

⁸ Ne aholonga wabwanga wakwe: Nkande za nteγuzi ziiliγanile, miya walalikwewo siwo.

⁹ Hitai lushe kwe sila mpanda, mulalike kwe nteγuzi, ndiwo mwone.

¹⁰ Waja wabwanga wazahita kwe sila zoshe, wazaleta woshe, waenewo, watana na wabada.

¹¹ Zumbe akiingila kwa olela waγeni wakwe, azaona muntu muja ashizwikileye shuke ya nteγuzi.

¹² Amuti: Ṅwiyangu, uingile zeze na kunu wishina shuke ya nteγuzi? Yuja nkalandule.

¹³ Zumbe azalaγiliza waluγojo wakwe, mumshunge milundi na mikono, mumshindike na mwe lwiza ludala, ne kwena kulila na kukemeza meno.

¹⁴ Hambu walakwewo ni wangi, miya washaγulwewo ni waγeke.

Utanda wa kodi. 15-22.

¹⁵ Haja Mafaliseyo wazahita, wazalonga njama, ndivyo wamteγeie na mbuli.

¹⁶ Wazamtumila wahina wawe haṅwe na wantu kuṅwe wa Helode, angwe Mfuzi, tataila kuti: Iwe u mkweli, ufuza sila ya Mulungu ilivyo kweli, kangi nkushindauza muntu, hambu nkuolela vyeni vya wantu.

¹⁷ Tiγambile lushe: Uγambai? Vina ṅwiko kumunka Kaiza kodi, hambu nkavina?

¹⁸ Miya Yesu azataiia ubada wawe azawati: Nini mkiniγeza?

¹⁹ Mwahemba inywi! Nionyeshai shilingi yeinkilwa kodi! Wazamletela shilingi.

²⁰ Awati: Ichi chapa ni cha ndai? Kangi ugonde ni wa ndai?

²¹ Angwe: Ni wa Kaiza. Ne ahowati: Munkei Kaiza viya vya Kaiza, kangi Mulungu mumunke viya vya Mulungu!

²² Wakiviiva, wazamaka, wazamleka, wazahita.

Ufufuki ulivyo. 22-33.

²³ Mushi uja Masadukeyo wazamwizila, ni waja weγamba kuti: Ufufuki nkahana,

²⁴ wazamwuza angwe: Mfuzi, Mose azalonga: Ati muntu afa, aishina wana, nduγuye amupale yuja muke, amwinulile mkuluwe mbeleko!

²⁵ Kwetu ne kwina wanduγu mfungate, yuja ywa bosi akiγuwa mvyele azafa aishina ṅwana, azamwashiza nduγuye muke.

²⁶ Vivyoho hata yuja ywa mbili na ywa ntatu na waja woshe mfungate.

²⁷ Kushilikiza yuja mvyele yohena azafa.

²⁸ Mwe ufufuki yuja mvyele neaγaluke ywa ndai? Hambu woshe ne waina naye.

²⁹ Yesu azawalandula, azawati: Mzaaγilwa, kwa kuti nkamtaila baluwangwa, hata nguvu ya Mulungu nkamwitaila.

³⁰ Hambu wantu wakizafufuka nkawaγuwa, nkawaγwiγwa, miya wataikala mwe lwingu, sa walau.

³¹ Kwa mbuli ya ufufuki wa wafilewo nkamfyomile, mwalongwavyo ni Mulungu, akiγamba:

³² Imi ni Mulungu ywa Abulahamu na Mulungu ywa Isaka na Mulungu ywa Yakobo? Kangi Mulungu so ywa wafilewo, ni ywa we moyo.

³³ Wantu wakiviiva wazashentuka mifuzize yakwe.

Mlomongwa mkulu. 34-40.

³⁴ Mafaliseyo wakiiva, kuti Masadukeyo azawashita vyanwa, wazaunganana haja.

³⁵ Ṅwiyae ywawe muṅwe mwetailisha mulomongwa azamwuza na kumγeza angwe:

³⁶ Mfuzi, mlaγilizo mkulu mwe mulomongwa ni uhi?

³⁷ Azamuti: Umkundishe Zumbe, Mulungu ywako, kwa moyo wako woshe na kwa mpeho zako zoshe na kwa ntongonyezi zako zoshe!

³⁸ Unu ni mlaγilizo mkulu, kangi ni wa bosi.

³⁹ Wa mbili wefanana nawo shunu: Umkundishe ṅwiyawo, sa uvyokikundisha ṅwenye!

⁴⁰ Mwe inu milaγilizo mili milomongwa yoshe i mumo haṅwe na mbuli za wateγanyingwa.

Kilisito ni ndai? 41-46.

⁴¹ Mafaliseyo wakiunganana, Yesu azawauza angwe:

⁴² Muγambai kwa mbuli ya Kilisito, kuti ni ṅwana ndai? Wamuti: Ni ṅwana Dawidi.

⁴³ Awati: Lushe Dawidi amwitanga zeze Zumbe kwa viya, avyona mpehongwa? Hambu aγamba:

⁴⁴ Zumbe azamlonga Zumbe ywangu: Ikala kulume kwangu, mpaka ndiho nezeniike wankulu wako shi he milundi yako!

⁴⁵ Dawidi akimwitanga Zumbe, ni ṅwanae vivihi?

⁴⁶ Nkakuna adahileye kumlandula mbuli, kangi kuandiila uja mushi nkakuna atozizeye moyo kumwuza mbuli.