Mateyo 18 - Kishambala New Testament 2005

Mkulu mwe uzumbe wa lwingu ni ndai? 1-9.

¹ Ija minga wahina wakwe wazamwizila Yesu angwe: Kumbe mkulu mwe uzumbe wa lwingu ni yuhi?

² Azaitanga kazana na haja, azakaγolosha gatigati haja, waliho,

³ angwe: Kweli namiti: Ati mwashehituka mkiγaluka, viya mu vizana, nkezemwingile mwe uzumbe wa lwingu.

⁴ Ndiye akipunguze ṅwenye akiγaluka sa aka kazana, uyu ni mkulu mwe uzumbe wa lwingu.

⁵ Kangi ndiye ahokele kazana kaṅwe kwa mbuli ya zina jangu, anihokela imi.

⁶ Miya awa wadodo wenitozesha, ndiye aihize ṅwiyae ywawe muṅwe, viyamwagiza, mwe shingo yakwe mkigelwa nolo gima, akachwilimiziγwe mwe bahali yezenga.

⁷ Inu shi ikataona ukiwa kwa mbuli ya viya vyeihiza! Kweli vyeihiza nkavileka, miya muntu mweleka, wantungwa wakiihilwa, akatafa!

⁸ Ati mkono wako ao mulundi wako wakuihiza, uushenge, uuashe! Ni vitana, ukiingila he nkalamo, wina mkono ao mulundi muṅwe du, kuzinka aho, ukishindikwa na mwe moto ushizimawo kale na kale, wina mikono ao milundi yako mili. Ati zisho jako jakuihiza, jifokole, ujiashe!

⁹ Hambu ni vitana, ukiingila he nkalamo, wina zisho iṅwe, kuzinka aho, ukishindikwa na mwe moto wa kuzimu wina mesho yako maili.

Mlaho wa viya vyeihiza wantu.

¹⁰ Oleleshai, awa wadodo mshezabela ṅwiyae ywawe muṅwe! Hambu namiti: Walau wawe mwe lwingu nkawadila kuona cheni cha Tate mweikala mwe lwingu.

¹¹ Hambu ṅwanangwa ywa muntu aizile kwa vunila viaγilevyo.

Ngoto iaγileyo. 12-14.

¹² Muγambai? Ati muntu ana ngoto gana, lushe ṅwenga ikiaγa, asheashe ziya milongo kenda na kenda mulimai, akihita kwa londa ija iaγileyo?

¹³ Ati aiona, kweli namiti: Aisa kutamilwa ndiyo kuzinka ziya milongo kenda na kenda zishiaγilezo.

¹⁴ Vivyoho hata ishe ywenyu mweikala mwe lwingu nkakunda, awa wadodo kukiaγa ṅwiyae ywawe muṅwe.

Ndivyo timutende ṅweshu mwebana.

¹⁵ Ati mnduγu ywako abana, mshunde wina naye ike! Ati akuiva, ne uzamumota mnduγu ywako.

¹⁶ Ati ashekuiva, γuwa ṅwiyawo muṅwe, hata ni waili, kangwe kila mbuli ibontoke na kulongwa uwona ni waona waili ao watatu! Ati alemela kuwaitika, iyo mbuli iiγale kwe bumbangwa!

¹⁷ Ati alemela kuitika hata bumbangwa, mtale, viya ni ywa kimzimu ao du mngelu!

¹⁸ Kweli namiti: Ndivyo mshunge kunu shi, vitazashungwa mwe lwingu vivyoho; kangi ndivyo mshungule kunu shi, vitazashungulwa mwe lwingu vivyoho.

Mwivano wa kulombeza.

¹⁹ Vituhu namiti: Kila mbuli, ndiyo wenyu waili waiivane kunu shi kuilombeza, wataiinkwa ni Tate mweikala mwe lwingu.

²⁰ Hambu ndiho waili ao watatu waunganane kwa gimbika zina jangu, imi ni haho.

Timwushilize ṅweshu kangahi?

²¹ Haja Petelo azamwizila, azamuti: Zumbe, mnduγu ywangu anibanile kangahi nikivimwushiliza? Kamfungate kabesha?

²² Angwe ni Yesu: Sikuti: Kamfungate, nakuti: Milongo mfungate kamfungate.

Lushimo lwa mupuna mtili.

²³ Kwa ivyoho uzumbe wa lwingu wafanana na zumbe akundileye kutala madeni na wapuna wakwe.

²⁴ Akiandiila kutala, kuzaoneka mdeni muṅwe akopileye miziγo ya feza makulija kumi.

²⁵ Akishedaha kuliha, zumbe azalaγiliza, ataγwe na muke na wanae na kitende chakwe choshe, kangwe vilihike.

²⁶ Yuja mupuna azakulumuka, azamhembeleza angwe: Zumbe nifa mbazi, uniafize! Nezenikulihe vyoshe.

²⁷ Yuja zumbe azabulwa ni utungu na yuja mupuna, azamshungula, hata ija deni yoshe azamfila mbazi nayo.

²⁸ Yuja mupuna akimlawa azakintana na mupuna ṅwiyae amkopileye visumuni gana, azamgwila, azamfuwa angwe: Liha unikopilevyo!

²⁹ Yuja mupuna ṅwiyae azakulumuka, azamhembeleza angwe: Nifa mbazi, uniafize! Nenikulihe!

³⁰ Miya uyu azalemela, azahita naye, azamgela mwe chumba, mpaka akimliha akopilevyo.

³¹ Wapuna weyae wakiona, mbuli ziγendilevyo, wazaihilwa kabisa, wazahita, wazamshimwela zumbe ywawe mbuli ziva zoshe.

³² Ne yuja zumbe ahomwitanga, azamuti: U mupuna mubada iwe! Deni yoshe yeinga haja nizaikuushiliza, kwa kuti uzanihembeleza.

³³ Lushe nkavikuagiza nawe kumufila mupuna ṅwiyawo mbazi, sa imi nikufilevyo mbazi?

³⁴ Zumbe ywawe azakwelwa ni maya, azamwinkila, ashungwe, mpaka akizamliha ija deni yoshe.

³⁵ Vivyoho hata Tate ywa kilwingu atazamiγoshwela inywi, ati mwasheushilizanya mwe myoyo yenyu kila muntu na mnduγu ywakwe wavyobanilana.