Mateyo 16 - Kishambala New Testament 2005

Mafaliseyo walonda lwitangilo. 1-12.

¹ Mafaliseyo na Masadukeyo wazamlawila, wazamγeza wakimhembeleza, awaonyeshe lwitangilo lweanduka mwe lwingu.

² Azawalandula angwe: Kukishwa mwakalonga kuti:

³ Nekuche vitana, hambu lwingu lwalungulika; kukicha mwakalonga kuti: Lelo nekulende nyota, hambu lwingu lwalungulika, kangi luna zisima. Mwahemba inywi! Viya vya lwingu, muvyoona, mwataila kuvibunkula, miya ntangilo za mishi zamilema.

⁴ Inu mbali mbada yeγenyeza kilanga yalonda lwitangilo, kangi nkezewainkwe lutuhu kushima luja lwa Yona. Azawaasha azahita.

Shimbi ja Mafaliseyo.

⁵ Wahina wakwe wakihita na sheja wazajala kuinula migate.

⁶ Yesu azawati: Olelai, mkiγojeshe kwa mbuli ya shimbi ja Mafaliseyo na ja Masadukeyo!

⁷ Waja wazafanyanya mwe myoyo yawe kuti: Ni kwa kuti nkatiinule nkande.

⁸ Yesu akivitaila azawati: Nini mkifanyanya ivyoho mwe myoyo yenyu? Nini mkishetozesha vyedi?

⁹ Ni kwa kuti nkamna migate? Nkamzati mtaile? Nkamfukila ija migate mishano, iiγusheyo waja wantu makulija mashano, kuti ni ngahu zingahi, mwinulezo?

¹⁰ Hata ija migate mfungate iiγusheyo waja wantu makulija mane nkamuvifukila, kuti ni ngahu zingahi, mwinulezo?

¹¹ Lushe ni zeze, mkisheiva, kuti sitemilonga ivyoho kwa mbuli ya nkande? Kiγojei miya kwa mbuli ya shimbi ja Mafaliseyo na ja Masadukeyo!

¹² Haja wazaiva lushe, kuti nkalongile: Wakiγoje kwa mbuli ya shimbi jegelwa mwe migate, miya wakiγoje kwa mbuli ya mifuzize ya Mafaliseyo na ya Masadukeyo.

Petelo alaviliza kuti Yesu ni Kilisito. 13-20.

¹³ Yesu akibula mwe shi ya Kesaliya ya Filipo azauza wahina wakwe angwe: Wantu walonga, kuti ṅwanangwa ywa muntu ndiye ndai?

¹⁴ Angwe: Kuṅwe waγamba: Ndiye Yohana Mubatizi, watuhu: Ndiye Eliya, watuhu: Ndiye Yelemiya ao mteγanyi mtuhu.

¹⁵ Angwe: He inywi mγamba kuti: Ni miyo ndai?

¹⁶ Simoni Petelo azahitula angwe: Iwe u Kilisito, ṅwana Mulungu mwe moyo.

¹⁷ Yesu azamwitikila angwe: Simoni, ṅwana Yohana, una nyemi! Hambu vye nyama na mpome nkavikufumbwile inu mbuli, ni Tate mweikala mwe lwingu.

¹⁸ Nami nakuti: Iwe u Petelo, mwe iji kungu nezenizenge bumba jangu, hata nkili za kuzimu nkezezijivote.

¹⁹ Nezenikunke funguwo za uzumbe wa lwingu; ndivyo ushunge kunu shi, viishungiγwe mwe lwingu vivyoho; ndivyo ushungule kunu shi, viishungulwe mwe lwingu vivyoho.

²⁰ Aho azawashunda wahina wakwe, kangwe washezamγambila muntu, kuti ndiye Kilisito.

Yesu aandiila kuonyesha wahina ndivyo alumiziγwe. 21-28.

²¹ Mishi ija Yesu Kilisito azaandiila kuonyesha wahina wakwe, kuti vyamtala kuhita Yelusalemu, alumiziγwe vikulu ni waγolokezi na wavikizi wakulu na watabaluwangwa, mpaka akoṅwe, afufuke mushi wa ntatu.

²² Petelo azamwinula he njama, azaandiila kumshunda angwe: Zumbe, ukataikala mpeho! Ivi vikashetakubulila!

²³ Yuja azahituka, azamlonga Petelo: Uka kwangu, Satani! Waniihila, hambu nkutongonyeza viya vya Mulungu, utongonyeza viya vya wantu.

²⁴ Ne Yesu aholonga wahina wakwe angwe: Ati muntu akunda kunitongela, shuti akilemeze ṅwenye, ainule muti wakwe wa kukomelwa, ne ndivyo adahe kunitongela.

²⁵ Hambu mwekunda kukihonya atazakihosa, miya mwekihosa kwa mbuli ya imi, atazakihonya.

²⁶ Hambu muntu nezeaonele mbwai, hata akimota ngulu ngima, ati ahosiγwa ṅwenye?

²⁷ Hambu muntu alavye makombo ani, ndiyo akikombole nayo? Hambu ṅwanangwa ywa muntu atazalawila na utana wa ishe haṅwe na walau wakwe, ne ndiho amwuzize kila muntu kwa miγoshwele yakwe.

²⁸ Kweli namiti: Awa weγoloka aha weyae wawe kuṅwe nkewaone kifa, shuti wanemwona ṅwanangwa ywa muntu, akiiza mwe uzumbe wakwe.