Mateyo 15 - Kishambala New Testament 2005

Miko ya kimuntu nkaina bontokelo. 1-20.

¹ Haja Mafaliseyo na watabaluwangwa weanduka Yelusalemu wazamwizila, wazamuti:

² Nini wahina wako wakibana vitigo vya wakale? Hambu nkawahaka mikono wakija nkande.

³ Azawalandula angwe: Nini inywi nenywi mkibana mlaγilizo wa Mulungu kwa mbuli ya vitigo vyenyu?

⁴ Hambu Mulungu azalonga: Gimbika isho na nyokwe! Ṅdiye amlonge ishe ao nine vibada akatakoṅwa!

⁵ Miyainywi mwaγamba: Muntu akimγamba ishe ao nine: Viya vyeniagiza kukushuγa navyo, nizavimunka Mulungu, kangi ivyoho asheshindemgimbika ishe ao nine;

⁶ ne mubushizevyo mbulingwa ya Mulungu kwa mbuli ya vitigo vyenyu.

⁷ Mwahemba inywi! Mbuli yenyu Yesaya azaiteγanya vitana akiγamba:

⁸ Mbali inu yanigimbika na milomo yawe, miya myoyo yawe i hale ṅa imi.

⁹ Wanivika bule, hambu mbuli, wazofuza wantu, ni milaγilizo ya kimuntu.

Vyekandanya.

¹⁰ Azaitanga wantu na kwakwe, azawati: Teγelezai, mwive!

¹¹ Vyeingila mwe kanwa cha muntu sivyo vyemgela muntu kisitama, miya vyelawa mwe kanwa cha muntu ne vyemgela muntu kisitama.

¹² Ne wahina wakwe wahomwizila angwe: Wataila, kuti Mafaliseyo wazaihilwa wakiiva inu mbuli?

¹³ Azawalandula angwe: Kila muti Tate ywa kilwingu ashihandilewo utazaṅofulwa.

¹⁴ Walekei! Ni matuntu yekunda kuγesa matuntu weyae wawe; miya tuntu jikimγesa tuntu ṅwiyae, woshe waili watakina mwe lwina.

¹⁵ Petelo azahitula angwe: Tibontwele ulu lushimo!

¹⁶ Angwe: Kumbe hata inywi nkamwiva na inu mishi?

¹⁷ Nkamtaila kuti vyoshe vyeingila mwe kanwa vihita na mwe ifu, kangi vyaushiγwa na sila yawe?

¹⁸ Miya vyelawa mwe kanwa vianduka kwe moyo, ne vyegela muntu kisitama.

¹⁹ Hambu mwe moyo mwalawa ntongonyezi mbada: Kukoma, ulesi, kilanga, kubawa, kushinga, kukanka.

²⁰ Ivi ne vyemgela muntu kisitama; miya muntu akija na mikono ishihakiγweyo, nkavimgela kisitama.

Mvyele ywa Kikanaani. 21-28.

²¹ Yesu azakulawa, azahita mwe shi ya Tilo na ya Sidoni.

²² Kuna mvyele ywa Kikanaani mweanduka mwe ziya shi, azamkemela angwe: Zumbe, ṅwana Dawidi, nifa mbazi! Ṅwanangu ywa kindele aisa kulumiziγwa ni mpepo.

²³ Miya yuja nkamlandule mbuli hata. Wahina wakwe wazamwizila, wazamhembeleza angwe: Mshungule!

²⁴ Hambu atitongela na kukema. Azalandula angwe: Situmiγwe kutuhu, nitumiγwe du kwe ngoto ziaγilezo za mbali ya Isilayeli.

²⁵ Yuja mvyele azaiza, azamkinila angwe: Zumbe, niambiza!

²⁶ Miya yuja azamlandula angwe: Nkavilama, muntu akiγuwa nkande za wana, akizitambikila vikuli.

²⁷ Angwe: Ni vivyo, Zumbe; kangi vikuli viyaja mpuγutishi zegwa he meza za wababa zawe.

²⁸ Ne Yesu ahomwitikila angwe: Mlala, kitozesheze chako ni kikulu; uvyokunda vikubontokele! Ija ngela ne ṅwanae ahonileho.

Yesu ahonya watamu.

²⁹ Yesu azahauka, azahita kwe bahali ya Galileya, azakwela mwe mulima, azaikala.

³⁰ Wantu wangi wazamwizila, wena weyae wawe washiwodahaγenda, wahololewo mili, washiwoona, washiwolonga, hata wanyonge wangi watuhu, wazawaika he milundi yakwe, azawahonya.

³¹ Ne wantu wahomaka wakiona kuti: Mabubu yalonga, wahololewo mili wahona, washidahawo kuγenda waγenda, matuntu yaona; kwa ivyoho wazamiogola Mulungu ywa Isilayeli.

Aiγusha wantu 4000. 32-39.

³² Yesu azaitanga wahina wakwe, azawati: Nabulwa ni utungu na awa wantu, hambu mishi mitalu wazahumula kunu kwangu, kangi nkawana vya ja; miya sikunda kuwashungula, waishijile, washezagwa mshale silai.

³³ Angwe ni wahina: Kunu nyika tilavye na hi nkande za iγushiza wantu weinga aha?

³⁴ Angwe ni Yesu: Muna migate ingahi? Angwe: Mfungate na vikapala viγeke.

³⁵ Azaiaγiliza wantu, waikale shi,

³⁶ azaγuwa ija migate mfungate na yaja makapala, azalavya ntogolo, azaibendulabendula, azaiinkila kwa wahina wakwe, wahina wakwe wazaiinkila kwa wantu.

³⁷ Woshe wazaja, wazaiγuta, kangi mpuγutishi zishiγalezo wazazidodola, zizamema ngahu mfungate.

³⁸ Waja wajilewo wazaγelemuka waγoshi du makulija mane, kushima wavyele na wana.

³⁹ Vikibinda azashungula waja wantu, azaingila mwe chombo, azahita mwe shi ya Magadala.