Mateyo 14 - Kishambala New Testament 2005

Yohana mubatizi akoṅwa. 1-12.

¹ Mishi ija zumbe Helode azaiva kilango cha Yesu.

² Azawaγamba wabwanga wakwe: Uyo ni Yohana Mubatizi, atefufuka kwa wafilewo, ne vyeleka, izo nguvu zikidaha kuγosholwa ndiye.

³ Hambu Helode aamgwila Yohana, aamgela mwe chumba kwa mbuli ya Helodiya, mkaza nduγuye Filipo.

⁴ Hambu Yohana azamγamba: Vina ṅwiko ukimγuwa.

⁵ Ne akundileho kumkoma, miya azaogoha wantu, hambu wazafanyanya kuti: Ni mteγanyingwa.

⁶ Mushi wa nyemi ya kuvyalwa kwa Helode, ṅwana ywa kindele ywa Helodiya azasanganya muja nyumbai, azamtamila Helode;

⁷ ne ahomwikila msuhi na kukilisha, kangwe amunke, ndivyo alombeze.

⁸ Kwa viya, aandiilevyo kukundilwa ni nine, azaγamba: Ninka mwe bakuli ivi lushe aha mutwi wa Yohana Mubatizi!

⁹ Zumbe azaihilwa, miya kwa mbuli ya ija mikilishize na kwa mbuli ya waγeni, awoja nyemi nawo, azalaγiliza, akauinkwe; azatuma muntu,

¹⁰ akamshenge Yohana mutwi umo mwe chumba.

¹¹ Mutwi wakwe uzaletiγwa mwe bakuli, kaja kandele kazauinkwa, kazauiγala kwa nine.

¹² Wahina wakwe wazaiza, wazaγuwa kimba chakwe, wazachizika; wakibinda wazahita kwa Yesu, wazavimwukwila.

Yesu aiγusha wantu 5000. 13-21.

¹³ Yesu akiviiva, azahauka, azahita na chombo kuntu kwe ike ṅwenye; miya wantu wakiviiva, wazamtongela, wazaγenda na milundi, wakilawa

¹⁴ mwe mizi yawe. Yesu akilawila azaona, kuti wantu ni wangi, azabulwa ni utungu nawo, azahonya wanyonge wawe.

¹⁵ Kukishwa wahina wazamwizila angwe: Kuntu kunu ku ike, kangi zuwa jizashwa, shungula wantungwa, wahite kwe mizi, wakakiγulile nkande!

¹⁶ Angwe ni Yesu: Washindahita wai? Wainkei inywi vyaja!

¹⁷ Angwe ndiwo: Nkatina nkande, ni migate mishano du na fi mbili.

¹⁸ Angwe: Viletei na kunu kwangu!

¹⁹ Azalaγiliza, wantu watandikane mwe lwondo ndala ndala, vikibinda azaγuwa ija migate mishano na ziya fi mbili, azaolela na kwe lwingu akilavya ntogolo, azabendulabendula ija migate, azaiinkila kwa wahina, waja wahina wazaiinkila kwa wantu.

²⁰ Woshe wazaja, wazaiγuta; mpuγutishi zishiγalezo wazazidodola zizamema ngahu kumi na mbili.

²¹ Waja wajilewo waγoshi du wazaγelemuka makulija mashano kushima wavyele na wana.

Yesu aγenda mwe bahali ulanga 22-36.

²² Wakibinda kuja azakundila wahina wakwe kufikaingila mwe chombo, wavemlongwela na uko sheja, mpaka ashungule waja wantu.

²³ Akibinda kuwashungula waja wantu azakwela mwe mulima ṅwenye ike, kangwe avike. Lwiza lukigwa, a γuko ike.

²⁴ Chiya chombo chiibindile kuuka haja na kuhita ntampo nde, miya chizapishiγwa ni maimbi, hambu mpeho izalawa kuja, wakohita nako.

²⁵ Vikibuza luγojo lwa ne lwa kilo, azaiza na kuja, waiiko, akiγenda mwe bahali ulanga.

²⁶ Wahina wakwe wakimwona, avyoγenda inwe bahali ulanga, wazashentukisha, wazaγamba: Ni mzimu, wazakema kwa woγa.

²⁷ Yesu azafikawalonga angwe: Toγwai ni myoyo! Ni miyo; msheogohe!

²⁸ Petelo azahitula angwe: Zumbe ati ni weyo nilaγiliza, niize na uko, uliko, na kuγenda mwe mazi ulanga!

²⁹ Angwe: Iza! Petelo azasheela mwe chombo, azaγenda mwe mazi ulanga, azahita kwa Yesu.

³⁰ Miya akiolela mpeho azaingilwa ni woγa, azaandiila kunywilimila, azakema angwe: Zumbe, nivunila!

³¹ Yesu azafikakusula mkono wakwe, azamtoza angwe: Nini ukishetozesha vyedi? Nini ukikalakasha?

³² Wakiingila mwe chombo, mpeho izatongomala.

³³ Miya waja we mwe chombo wazamkinila angwe: Kweli u ṅwana Mulungu.

³⁴ Wazaomboka na sheja, wazatimila shi ya Genezaleti.

³⁵ Waγoshi wa ija shi wakimtaila wazatuma koshe koshe kwe shi ze hehi, ne wahomletela woshe wena mili,

³⁶ wazamhembeleza, wadowe du lusiniko lwa nkazu yakwe; woshe wamdowilewo wazahona.