Maliko 7 - Kishambala New Testament 2005

Nkumbizi kwa mbuli ya kuhaka. 1-23.

¹ Mafaliseyo na watabaluwangwa kuṅwe walawilewo Yelusalemu wazaunganana kwakwe.

² Wakiona wahina wakwe kuṅwe, wakija nkande na mikono ishihoziγweyo, ni kuγamba ishihakiγweyo, wazawashunda.

³ Hambu Mafaliseyo na Wayuda woshe nkawaja, waishihakile mikono na kuichukula, ni kwa kuti watoza vitigo vya wakale.

⁴ Hata vyelawa γwilo nkawavija, shuti wavimyaγe mazi; kangi kuna vitigo vingi vituhu wainkiγwevyo, wavitoze, ati ni kuhaka vinywelo mazi na maiγa na nyungu na sazi.

⁵ Lushe waja Mafaliseyo na watabaluwangwa wazamwuza: Nini wahina wako wakisheanga na vitigo vya wakale?

⁶ Nini wakija nkande na mikono ishihoziγweyo? Azawati: Yesaya azateγanya vitana mbuli za inywi mwehemba, akigonda: Mbali inu yanigimbika na milomo yawe, miya myoyo yawe i hale na imi.

⁷ Wanivika bule, hambu mbuli, wazofuza wantu, ni milaγilizo ya kimuntu.

⁸ Milomo ya Mulungu mzaiasha, mtoze vitigo vya wantu.

⁹ Vituhu azawati: Kweli mzazifya mkiusha milaγilizo ya Mulungu, kangwe mdahetongela vitigo vyenyu!

¹⁰ Hambu Mose azalonga: Gimbika isho na nyokwe! Hatuhu aγamba: Ndiye amlonge ishe ao nine vibada akatakoṅwa!

¹¹ Miya inywi mwaγamba: Ati muntu amγamba ishe ao nine: Uchokunda china ṅwiko, ni kuγamba: Chiya, ukundilecho kufilwa mbazi ni miyo, chizahita na Mulungu, azifya.

¹² Kangi ivyoho mwamfingiza kumupikila ishe ao nine.

¹³ Ne kubusha mbulingwa ya Mulungu kwa mbuli ya vitigo vyenyu, mutuzilevyo wenye. Kangi mwaγoshola vingi muno vyefanana na ivi.

Vye kisitama ni vihi?

¹⁴ Azaitanga wantu vituhu na kwakwe, azawati: Niteγelezai nyosheni, mwive!

¹⁵ Nkakuna mbuli ya muntu ye se yedaha kumgela kisitama ikimwingila; vyemgela muntu kisitama ni viya vyelawa mwe moyo wa mimtu.

¹⁶ Ati kuna mwena mashikilo yeiva neaive!

¹⁷ Akiuka kwa waja wantu, akiingila mwe nyumba, wahina wakwe wazamwuza mbuli ya luja lushimo.

¹⁸ Azawati: Kumbe hata inywi nkamwiva vivyoho? Nkamtaila kuti: Vyoshe vye se vikimwingila muntu nkavidaha kumgela kisitama?

¹⁹ Hambu nkaviingila mwe moyo wakwe, viingila mwe ifu, vituhu vilawa na sila yawe; ne mbuli ya nkande zoshe ivyoγenda.

²⁰ Vikibinda azawati: Vyelawa mwe moyo wa muntu ne vyemgela muntu kisitama.

²¹ Hambu uko ndai mwe myoyo ya wantu kulawa ntongonyezi mbada,

²² utesi, kilanga, kukoma, ubavi, mumelo, ubada, leba, kujilisha na kunywelesha, luzisho lubada, lukanko, utili, uhambanyi.

²³ Ivi vibada vyoshe vilawa uko ndai, vyamgela muntu kisitaiṅa.

Mvyele ywa Kikanaani 24-30.

²⁴ Akiinuka kuja azahita mwe shi ya Tilo na ya Sidoni. Azaingila na nyumbai, nkakundile, muntu akimtaila, miya nkadahile kukifisha. Haho hazaiva mvyele mbuli yakwe.

²⁵ Yuja mvyele yohena ṅwanae ywa kindele ana mpepo ye usaba.

²⁶ Azaiza, azamkinila he milundi. Yuja mvyele ni Mgiliki, mbali yakwe ni Msilofonike; azamhembeleza, aingate ija mpepo, ilawe mwe ṅwanae.

²⁷ Miya Yesu azamuti: Leka, wana waneiγuta! Hambu nkavitama, muntu akiγuwa nkande za wana, akizitambikiia vikuli.

²⁸ Yuja azaitikila angwe: Ni vivyo, Zumbe. Kangi vikuli viyaja mpuγutishi za wana mzunguwi he meza.

²⁹ Angwe ndiye: Kwa inu mbuli hita! Mpepo izabinda kulawa mwe ṅwanawo.

³⁰ Azahita na nyumbai mwakwe azamubulila ṅwanae, aiikale mwe lusazi, miya ija mpepo iiukile.

Yesu amhonya bubu.

³¹ Vituhu azakulawa kuja kwe shi ya Tilo, azadwisha Sidoni, azahita kwe bahali ya Galileya gatigati mwe ija shi yena mizi kumi.

³² Wazamletela muntu ashiivaye, kangi ni bubu, wazamhembeleza, amubadikile mikono.

³³ Azamwusha haja he wantu na hantu he ike, azagela vyala vyakwe mwe mashikilo yakwe, azashwa mate, azadowa lulimi lwakwe.

³⁴ Azaolela na kwe lwingu azahesa moyo, azamuti: Efata!, ni kuγamba: Zuγuka!

³⁵ Ne mashikilo yakwe yahozuγuka, hata luge lwa lulimi lwakwe luzashunguka.

³⁶ Azawalaγiliza, washevimγambile muntu. Miya akikawalaγiliza ivyoho, waakaisiiza kuvibilikila.

³⁷ Kangi wazaisiiza kushentukisha, wazaγamba: Vyoshe azavizifya, washiivawo aleka, waive, washilongawo aleka, walonge.