Maliko 5 - Kishambala New Testament 2005

Yesu ahonya mtamu mwena mpepo kulija. 1-21.

¹ Wazabula sheja ja bahali mwe shi ya Gadala.

² Haho akihalawa mwe chombo azakintana na muntu mwelawa kwe mbila mwena mpepo ye usaba.

³ Wikazi wakwe u kuja kwe mbila, kangi nkakuna muntu adahileye kumshunga, hata mazolo yazalema.

⁴ Hambu kangi muno azashungwa na magogolo, na mpingu, miya izo mpingu ziyakadwishiγwa ndiye, hata magogolo yaakabondwabondwa ndiye, nkakuna adahileye kumvota.

⁵ Mishi yoshe kilo na mushi azaikala kuja kwe mbila na kwe mpanga na kushindakemakema na kukishushunta na mawe.

⁶ Akimwona Yesu, ake hale, azamγulukila, azamkinila, azakema na kanwa kikulu angwe:

⁷ Nina mbwai imi na iwe Yesu, ṅwana Mulungu mwe uko ulanga? Nakuhembeleza, ukilishe na Mulungu, kangwe ushezanilumiza.

⁸ Hambu ailongile kuti: Iwe mpepo we usaba, lawa mwe uyu muntu!

⁹ Azamwuza lushe: Zina jako ni weyo ndai? Angwe: Zina jangu ni miyo makulija, hambu ti wangi.

¹⁰ Zizaisiiza kumhembeleza, ashezilaγilize kulawa mwe ija shi.

¹¹ Kuja kwe milima ne kwina ifyo kulu ja nguluwe zelishiγwa.

¹² Ziya mpepo zizamhembeleza angwe: Titume kwe ziya nguluwe, tikaziingile.

¹³ Azazikundiza; ne ziholawa ziya mpepo ze usaba, zizaingila mwe ziya nguluwe, ne jiya ifyo jiholumbila kunguwi na mwe bahali, kangi ne zii makulija maili, zizanywilimila mwe bahali.

¹⁴ Waja wezilisha wazanyilika, wazabilikila inu mbuli kuja kaya, hata kwe mizi tanga, ne wantu wahoiza, waolele viya vitendekevyo.

¹⁵ Wazamwizila Yesu, wazamwona yuja muntu, ndiye akihuma mpepo makulija, aiikale, aikiγubike shuke, ni mtana lushe, ne wahoingilwa ni woγa.

¹⁶ Waja waenewo, mbuli ya yuja ahumileye mpepo iγendilevyo, wazaiwatamwila, hata ija mbuli ya nguluwe.

¹⁷ Wazaandiila kumhembeleza, auke mwe shi yawe.

¹⁸ Akiingila mwe chombo, yuja ahumileye mpepo azamhembeleza, ahite naye.

¹⁹ Miya nkamkundize, azamγamba: Γotoka na kaya kwako kwa wanduγu wako, uwabilikile viya, Zumbe akutendilevyo, akufilevyo mbazi!

²⁰ Azahauka, azaandiila kubilikila mwe ija shi yena mizi kumi, Yesu amγoshwelevyo, miya woshe wazavimaka.

Yesu afufula ṅwana Yailo. 21-43.

²¹ Yesu akibinda kuomboka na chombo na kuja sheja vituhu, wantu wangi wazaunganana haja, aliho he bahali.

²² Kuzaiza mfuṅwa ywa vikilo, zina jakwe ndiye Yailo; akimwona azamkinila he milundi yakwe,

²³ azaisiiza kumhembeleza angwe: Nwanangu ywa kindele aunga kufa; fikaiza, umubadikile mikono, kangwe ahone, aikale ugima.

²⁴ Azahita naye; wantu wangi muno wazamtongela, wazamshushumila.

²⁵ Kuna mvyele alawileye mpome mavuli kumi na maili;

²⁶ uyu azalumiziγwa vikulu ni waγanga wangi, azabinda mali yakwe yoshe,

²⁷ kangi nkahonile hata, azaisiiza kuifiγwa. Akiiva mbuli ya Yesu, azamtongela nyuma na jiya bumba joshe, azadowa nkazu yakwe.

²⁸ Hambu azaγamba: Ati nadowa nkazu yakwe du, nenihone.

²⁹ Viya du lushe ija shoko ya mpome yakwe izahwa, azataila mwe ṅwili wakwe, kuti azahona ija nkondo yakwe.

³⁰ Hata Yesu azafikataila ṅwenye, kuti kuna nguvu ilawileyo mwe ṅwili wakwe, azahitukila waja wantu angwe: Adowileye shuke zangu ni ndai?

³¹ Wahina wakwe wazamγamba: Waona, iji bumba joshe jakushushumila, nini ukiγamba: Anidowileye ni ndai?

³² Azazungulusha mesho, kangwe amwone yuja aviγosholeye.

³³ Miya yuja mvyele azaingilwa ni woγa, azadidima, hambu azataila aγoshwelwevyo, miya azaiza, azamkinila, azamγambila mbuli zoshe kweli.

³⁴ Yuja azamuti: Ṅwanangu, mitozesheze yako izakuhonya; hita mpeho, uikale ugima, iyo nkondo ishekuuyiye!

³⁵ Akelonga naye, kuzaiza wantu wa yuja mfuṅwa ywa vikilo, wazamuti: Ṅwanawo azafa; lushe nini ukimwonya mfuzi lulali?

³⁶ Yesu azaiva, inu mbuli ikilongwa, azamγamba yuja mfuṅwa ywa vikilo: Usheogohe! Tozesha du!

³⁷ Kangi nkakundize watuhu, wakihita naye, kushima Petelo na Yakobo na nduγuye Yohana.

³⁸ Wazaingila mwe nyumba ya yuja mfuṅwa ywa fyomelo, azaona mumo vuzo kulu, hambu muna welilisha na kukemesha.

³⁹ Akibinda kuingila azawati: Muvunkai na kulila? Uyu ṅwana nkafile, miya atesisila du.

⁴⁰ Miya wazamsheka. Azawaγulusha woshe, azamγuwa ishe ja ṅwana na nine na waja, awona nawo, azaingila na muja, yuja ṅwana alimo.

⁴¹ Azamtoza yuja ṅwana mkono, azamuti: Talita kumi!, ni kuγamba: Kandele, nakuti: Inuka!

⁴² Viya du lushe kaja kandele kazainuka, kazaγenda; hambu kaibindile mavuli kumi na maili; ne wahoisiiza kushentukisha.

⁴³ Azawalaγiliza kabisa, washezaleka, muntu akitaila inu mbuli; kangi azawati: Munkei vya ja!