Maliko 3 - Kishambala New Testament 2005

Yesu ahonya mtamu mushi wa sabato. 1-6.

¹ Azaingila vituhu vikiloi, muja muna muntu mwena mkono uholozewo.

² Wazemteγeleza, ati neamhonye mushi wa sabato kangwe waone lufyalimile.

³ Azamlonga yuja muntu mwena mkono uholozewo: Inuka, uize na aha gati!

⁴ Vikibinda azawati: Vina ṅwiko kuγoshola mbuli ntana mushi wa sabato, hambu mbada? Kumhonya muntu, hambu kumkoma? Miya waja wazatongomala du.

⁵ Azawadulila woshe na maya, hambu azaihilwa, wakitoγesha myoyo yawe ivyoho, azamγamba yuja muntu: Kusula mkono wako! Azaukusula, ne uwo mkono wakwe uhouya, sa ndivyo uilivyo kale.

Yesu abashiγwa ni wantu wangi. 6-12.

⁶ Mafaliseyo wazafikalawa, wazashunga njama na wantu wa Helode kwa mbuli yakwe, ndivyo waonele luhoseze.

⁷ Miya Yesu azahita na wahina wakwe kwe bahali; wantu wangi wa Galileya wazamtongela, hata wa Yudeya

⁸ na wa Yelusalemu na wa Idumeya na walawilewo sheja ja Yolodani na wa Tilo na wa Sidoni, ni bumba kulu, wazamtimila wakiiva avyoγoshola.

⁹ Azalonga wahina wakwe, wamliγanyize kachombo kwa mbuli ya wantu, wakiisa kuγenela, kangwe washemfinte.

¹⁰ Hambu azahonya wangi, kwa ivyoho woshe welumilwa wazamkinila, kangwe wamdowe.

¹¹ Hata mpepo ze usaba zikimwona, zizamkinila na kukema angwe: Iwe u ṅwana Mulungu.

¹² Azaisiiza kuzivaila, zishemubunkule.

Ashaγula wahina 12. 13-19.

¹³ Azakwela mwe ntuli, azaitanga akundilewo ṅwenye na kwakwe, ne wahomtimila.

¹⁴ Azagimbika kumi na waili, waange naye,

¹⁵ kangwe nezeawatume kwa bilikila, wainkwe ufuṅwa wa kuingata mpepo.

¹⁶ Azawagimbika waja kumi na waili; Simoni azamunka zina ja Petelo.

¹⁷ Yakobo, ṅwana Zebedeyo, na nduγuye Yohana azawainka zina ja Bowanelige, ni kuγamba: Wana lubambala.

¹⁸ Watuhu ni Andeleya na Filipo na Balitolomeyo na Mateyo na Toma na Yakobo, ṅwana Alifeyo, na Tadeyo na Simoni ywa Kana

¹⁹ na Yuda Isikaliyota, ne amwinkileye.

Watabaluwangwa wamunka Yesu mpepo. 20-30.

²⁰ Vikibinda azaingila na nyumbai, vituhu wantu wangi wazaunganana, nkawakombaγanye kuja nkande.

²¹ Wanduγu wakwe wakiviiva wazalawila, wamgwile, hambu wazaγamba: Atalaluka.

²² Watabaluwangwa walawilewo Yelusalemu wazaγamba: Ana Mzuka, kangi nguvu ya uyu zumbe ywa mpepo ne ayoingata nayo mpepo.

²³ Azawaitanga, waunganane, azawazisa lushimo angwe: Satani adaha zeze kumwingata Satani ṅwiyae?

²⁴ Kangi uzumbe ati wapangana ṅwenye, uja uzumbe nkaudaha kutoγa.

²⁵ Kangi ati nyumba yapangana ṅwenye, iyo nyumba nkaidaha kuikala.

²⁶ Hata Satani ati akiinukila ṅwenye na kupangana, nkadaha kukalama, atabuza kubindilizika.

²⁷ Miya mimtu nkadaha kuingila mwe nyumba ya mnguvu, amhoke ntanu zakwe, aishimshungile yuja mnguvu; akibinda akadaha kumhoka ntanu ze mwe nyumba yakwe.

²⁸ Kweli namiti: Wana wantu watazaushiliziγwa uhuza woshe na mbuli za lwezo, ndizo wamweze muntu nazo;

²⁹ miya muntu akimweza Mpeho mṅazi nkazaviushiliziγwa kale na kale, aikozile masa ya kale na kale;

³⁰ ni kwa kuti wazalonga: Ana mpepo ye usaba.

Wanduγu na nine wa kweli! 31-35.

³¹ Kuzaiza nine na wanduγuze, wazaγoloka se, wazamtumila, wazamwitanga.

³² Bumba kulu jizaikala na kumdenganila, wazaγamba: Olela, nyokwe na wanduγuzo wa uko se, wakulonda.

³³ Azawalandula angwe: Mlala na wenetu ni wandai?

³⁴ Akibinda azawaolela waja waikalewo na kumdenganila, azaγamba: Shawa wamlala na wenetu!

³⁵ Hambu ndiye aγoshole, Mulungu avyokunda, uyu ne ṅwenetu na lumbu jangu na mlala.