Maliko 13 - Kishambala New Testament 2005

Yelusalemu neuchakulwe.

¹ Wakilawa mwe vikilongwa, mhina ywakwe muṅwe azamγamba: Mfuzi, olela mawe yeinga aha na zengo jeinga aha!

² Yesu azamuti: Waolela zengo iji kulu? Nkezehalekwe iwe, jikiandakana na ṅwiyae vivyoho jikishechakulwa.

Ntangilo za bindilizo.

³ Akiikala mwe mulima wa miziyaγembe sheja ja vikilongwa, Petelo na Yakobo na Yohana na Andeleya wazamwuza he njama angwe:

⁴ Tiγambile, ati ni lini, ziya mbuli zikizabontoka? Kangi lwitangilo ni luhi, viya vikiunga kubontoka?

⁵ Yesu azaandiila kuwaγambila angwe: Oleleshai, muntu ashezamiazaγanya!

⁶ Hambu wantu wangi watazalawila mwe zina jangu wakiγamba: Imi ndiye, wataazaγanya wangi ivyoho.

⁷ Ndiho nezemwivile, kuti kuna nkondo na ulongo wa izo nkondo, msheshentuke! Hambu viya shuti vibontoke, miya hata aho bindilizo nkajizati.

⁸ Hambu mbali na mbali zitazainukilana, uzumbe ulazainukila uzumbe ṅwiyae; shi itazadidima hantu haṅwe na haṅwe, sala itazagwa na nkondo ntuhu ntuhu; ivi ne chandilo cha mishango.

Nkondo ndizo ziize. 9-13.

⁹ Kiolelei inywi wenye! Hambu watazamiinkila kwa wafuṅwa, mulutwe mwe mavikilo, mulaviliziγwe kwa watoza shi na kwa wazumbe wakulu kwa mbuli ya imi, viwaγalukile uwona.

¹⁰ Miya bosi ulaungwa shuti unebilikilwa kwa wamzimu woshe.

¹¹ Kangi aho ndiho nezewamiiγale, wakamiinkile, msheje sungu kwa viya, ndivyo mulandule! Miya viya, ndivyo mwinkwe ija minga, ne ndivyo mulandule! Hambu si nywiyo mwelonga, ni Mpeho mṅazi.

¹² Wanduγu na wanduγu nezewainkilane kwa koṅwa, hata waishe nezewainkile wana wawe, wana nezewaiγaile wavyazi wawe nkondo, wawakome.

¹³ Nezemshukiziγwe ni wantu woshe kwa mbuli ya zina jangu. Miya ndiye azizimize mpaka bindilizo, ne ndiye avunilwe.

¹⁴ Aho ndiho nezemwone, uja uchakuzi webuza useli ukibula hantu hashiboagiza, sa vilongiγwevyo ni mteγanyi Danyeli. (Mwefyoma aha hantu ateγeleze vyedi!) Mishi ija we mwe shi ya Yudeya wanyilike kwe milima!

¹⁵ Mwebulilwa aiikale mwe nyumba ulanga, ashesheele akishindaingila kwa γuwa ntanu ze nyumbai mwakwe!

¹⁶ Mwe nkoi asheuye na nyuma kwa γuwa shuke zakwe!

¹⁷ Wena nda na weonkeza watazaona ukiwa mishi ija.

¹⁸ Miya hembelezai, kuja kunyilika kwenyu kusheteγane na mishi ya nyota!

¹⁹ Hambu mishi ija kutaoneka ukiwa washaonekawo kale hoshe, vikiandiila haja, Mulungu akiumba lwingu na shi, mpaka ivi lushe, kangi nkezeuoneke vituhu.

²⁰ Ati Zumbe ashedwisha ija mishi, anga nkakuna muntu mwehona. Miya kwa mbuli ya waja washaγulwewo, ashaγulewo ṅwenye, azaidwisha ija mishi.

²¹ Haja muntu azahamiti: Shuyu Kilisito! A haha!, ao du: Shuyuja! A kuja!, mshetozeshe!

²² Hambu Wakilisito wa ulongo na wateγanyi wa ulongo watazainuka, waγoshole vilozo na vimaka, waazaγanye, ati vyadahikana, hata waja washaγulwewo.

²³ Miya inywi kiolelei! Shivyo, nizavimiγambila vyoshe, vishizati vikinte.

²⁴ Mishi ija, uja ukiwa ukibinda kuzinka, zuwa jitagwa lwiza, hata ṅwezi utaleka kuaka,

²⁵ hata ntondwe zitakina zikiuka mwe lwingu, hata nguvu ze kuja kwe lwingu zitavuwanika.

²⁶ Ne ndiho wamwone ṅwanangwa ywa muntu, avyoiza mwe mazunde ya lwingu na nguvu nyingi na utana ungi.

²⁷ Ne ndiho nezeatume walau, waimganyanye waja washaγulwewo ndiye, wakiwalavya kwe nyazu zoshe, mpeho ikokalawa nako, kuandiila shi ikohelela mpaka kuja, lwingu iuhitileko kwa helela.

²⁸ Hinai lushimo mwe mkuyu Ntimbwati zakwe zikikwela matumba, zikivungula, mwataila kuti:

²⁹ Vuli ji hehi. Vivyoho hata inywi mkizaona, viya vikibontoka, tailai kuti: Bindilizo ji hehi!

³⁰ Kweli namiti: Inu mbali nkeibanike, mpaka izi mbuli zoshe zinebontoka.

³¹ Lwingu nezelubanike, hata inu shi, miya mbuli zangu nkezezibanike.

³² Miya mbuli ya uja mushi ao ija saa nkakuna mweitaila, hata walau we mwe lwingu nkawaitaila, hata ṅwanangwa nkaitaila, ni Tate ike.

Gonai mesho.

³³ Kiolelei, mgone mesho na kuvika! Hambu nkamtaila, mishi ndiho nezeitimize.

³⁴ Vyafanana na muntu mwehita ntambo akiasha nyumba yakwe, akiinka wabwanga wakwe ufuṅwa wa kumupangiia kila muntu ndima yakwe, miya yuja muluγojo ywa nkili amlaγiliza, agone mesho.

³⁵ Vivyoho gonai mesho lushe! Hambu nkamtaila aho, ndiho ṅwenye nyumba nezeaizile, ati ni lwa ṅwiyaγulo, ati ni kilo kikulu, ati ni haja soγolo zihokakemela, ati ni makelo,

³⁶ ashezamitutukanya na kuiza kwakwe, akimibulila, mwisisile.

³⁷ Miya nivyomilonga inywi, nawalonga woshe: Gonal mesho!