Maliko 10 - Kishambala New Testament 2005

Vyekoma unyumba. 1-12.

¹ Azakuinuka kuja, azahita mwe shi ya Yudeya na mwe shi ye sheja ja Yolodani. Vituhu wantu wangi wazamlimila, azawafuza vituhu, sa avyokazwela.

² Hata Mafaliseyo wazamwizila, wazamwuza, ati nkavina ṅwiko, mγoshi akilekana na muke, miya watemγeza.

³ Azawalandula angwe: Mose amilaγilize mbwai?

⁴ Angwe ndiwo: Mose azakundiza wantu kugonda vyeti vya kukoma unyumba, kangwe walekane.

⁵ Yesu azawati: Kwa mbuli ya ntoγo za myoyo yenyu azamigondela unu mulomo;

⁶ miya aho kuandiila, Mulungu akiumba wantu, azawaumba mγoshi na mvyele.

⁷ Ne vihokaleka, muntu akimwasha ishe na nine, aandakane na muke, awa waili waγaluke ṅwili muṅwe;

⁸ kwa ivyoho awa so waili, miya ni ṅwili muṅwe.

⁹ Kangi viya, Mulungu agombekezevyo, muntu ashezavigombola! Wakiingila na nyumbai,

¹⁰ wahina wakwe wazamwuza kwa inu mbuli.

¹¹ Azawati: Muntu akilekana na muke, akiγuwa mtuhu, atenda kilanga naye; kangi mvyele akilekana na mulume,

¹² akiγwiγwa ni mγoshi mluhu, atenda kilanga.

Yesu ahokela vizana. 13-16.

¹³ Wazamletela vizana, kangwe avibadikile mikono; miya wahina wazawavaila waja wevileta.

¹⁴ Yesu akiviona azaihilwa, azawati Lekal, vizana viize kwangu, mshevifingize! Hambu we ivyoho uzumbe wa Mulungu ni wawe.

¹⁵ Kweli namiti: Ndiye ashehokele uzumbe wa Mulungu sa kazana nkezeauingile.

¹⁶ Azaviambata, azaviṅaza mesho na kuvibadikila mikono.

Ntoγo ya mzuli. 17-31.

¹⁷ Akilawa kuja, akibula silai, kuna mwemγulukila, azamgintila mazwi, azamwuza: Mfuzi mtana, nitende zeze, kangwe nezenipale nkalamo ya kale na kale?

¹⁸ Yesu azamuti: Nini ukiniitanga mtana? Nkakuna mtana, kushima Mulungu ike du.

¹⁹ Milomongwa waitaila kuγamba: Ushekome! Ushetende kilanga! Ushebawe! Ushemshinge ṅwiyawo ukilonga uwona wa lulimi! Ushemtunguluke muntu! Gimbika isho na nyokwe!

²⁰ Yuja azamuti: Mfuzi, ivi vyoshe nizaviγolokela, vivyo nikuzilevyo.

²¹ Yesu azamwolela, azamkundisha, azamuti: Uishiγaze mbuli ṅwenga; hita, ukataγe vyoshe, uvyona navyo, uviinkile kwa wakiwa! Ne ndivyo utende mali mwe lwingu! Ukibinda uize, unitongele!

²² Miya yuja azakilwa ni inu mbuli, azahita na ukiwa, hambu ne aina kitende chingi.

²³ Yesu azazungulusha mesho, azalonga wahina wakwe angwe: Olelai, ntoγo zivyokula, wazuli wakikunda kuingila mwe uzumbe wa Mulungu!

²⁴ Wahina wakwe wazashentuka izi mbuli; Yesu azawalandula vituhu, angwe: Wanangu, olelai, ntoγo zivyokula, waja wealila mali yawe wakikunda kuingila mwe uzumbe wa Mulungu!

²⁵ Ngameya ntoγo zakwe za kuholokela mwe kihula cha singano nkaziinga sa ziya, mzuli azoona za kuingila mwe uzumbe wa Mulungu.

²⁶ Miva waja wazaisiiza kushentuka, wazaγambilana: Lushe ndiye adahe kuzahona, ni ndai?

²⁷ Yesu azawaolela, azawati: Kwa wantu nkavidahikana, kushima kwa Mulungu; hambu vyoshe vidahikana kwa Mulungu.

Muntu mweasha vyoshe ndivyo aonele.

²⁸ Petelo azaandiila kumlonga angwe: Olela, ishwi tizaasha vyoshe, tizakutongela.

²⁹ Angwe ni Yesu: Kweli namiti: Mweasha nyumba ao wanduγu wakwe ao walumbuze ao nine ao ishe ao wanae ao miγunda kwa mbuli ya imi na ya ulaungwa wedi,

³⁰ nkakuna ndiye asheviuziziγwe ka gana mwe mishi inu ake kunu shi nyumba zakwe na wakuluwe na wanduγuze na walumbuze na wanine na wanae na miγunda, hata akitaγulushwaγulushwa, kangi mishi ija, ndiyo nezeibule, atazainkwa nkalamo ya kale na kale.

³¹ Miya wangi walongolewo watazashilikiza, kangi washilikizewo watazalongola.

Yesu auγiza kulonga kuti inga alumiziγwe. 32-34.

³² Kuja silai wakihita, wakwele Yelusalemu, Yesu aiwalongwele, miya wazamaka, wazamtongela na woγa. Azaγuwa vituhu waja kumi na waili, azaandiila kuwaγambila viya, ndivyo vimubulile,

³³ angwe: Olelai! Takwela Yelusalemu, ṅwanangwa ywa muntu ainkilwe kwa wavikizi wakulu na kwa watabaluwangwa, wakamlahe masa ya kumkoma, wamwinkile kwa wamzimu, watamfyulila, watamshwela mate, watamluta

³⁴ vikibinda watamkoma; miya mishi mitatu ikizinka atafufuka.

Wana Zebedeyo wavyolombeza. 35-45.

³⁵ Yakobo na Yohana, wana Zebedeyo, wazamwizila angwe: Mfuzi, takunda, utiγoshwele, ndivyo tikulombeze.

³⁶ Azawati: Mukunda, nimiγoshwele mbwai?

³⁷ Wazamuti: Utikundize, muṅwe nezeaikale kulume, muṅwe kumosho kwako mwe utana wako!

³⁸ Yesu azawati: Nkamtaila muvyolombeza. Mwadaha kunywa icho kinywelo, ndicho ninywe? Mwadaha kubatizwa uwo ubatizi, ndiwo nibatizwe nawo?

³⁹ Wazamuti: Tadaha. Miya Yesu azawati: Icho kinywelo, ndicho ninywe, nezemuchinywe! Hata ubatizi, ndiwo nibatizwe nawo, nezemubatizwe nawo!

⁴⁰ Miya k mwikaza muntu kulume ao kumosho kwangu so ndima yangu, kuja kutala waja wakufanyanyiziγwewo.

⁴¹ Waja weyae wawe kumi wakiviiva wazaihilwa kwa mbuli ya Yakobo na Yohana.

⁴² Yesu azawaitanga, azawati: Mwataila, kuti waja wegimbikwa wazumbe wa mbali za wantu wawatoza na nguvu, hata wafuṅwa watunguluka wantu; miya kwenyu kusheoneke ivyoho!

⁴³ Miya mwekunda kuγaluka mkulu kwenyu, shuti a nitumikile!

⁴⁴ Mwekunda kuγaluka ywa bosi kwenyu, shuti aγaluke mupuna ywa weyae woshe!

⁴⁵ Hambu ṅwanangwa ywa muntu yohena okaizile, atumikilwe, miya aizile kwa tumikila, akiinkile ṅwenye, akombole wantu wangi.

Balilimeyo ahonyiγwa mesho. 46-52.

⁴⁶ Wazabula Yeliko. Akilawa Yeliko na wahina wakwe na bumba kulu muno, kuja silai kuzaikala Balitimeyo, ni ṅwana Timeyo, ni tuntu, aakalombeza.

⁴⁷ Akiiva kuti: Ni Yesu ywa Nazaleti, azaandiila kukema angwe: Yesu, ṅwana Dawidi, nifa mbazi!

⁴⁸ Wangi wazamvaila, kangwe aleke lwashu, miya azaisiiza kukema vivyoho: Ṅwana Dawidi, nifa mbazi!

⁴⁹ Yesu azaγoloka, azaγamba Mwitangei! Wazamwitanga yuja tuntu wakimuli: Toγwa ni moyo! Inuka! Akuitanga.

⁵⁰ Yuja azaasha shuke yakwe, azafikainuka, azahila kwa Yesu.

⁵¹ Yesu azamwuza: Ukunda, nikuγoshweie mbwai? Angwe ni yuja tuntu: Mfuzi mkulu, nakunda, nione!

⁵² Yesu azamuti: Hita! Mitozesheze yako izakuhonya. Viya du lushe azaona, azamtongela kuja silai.