Luka 9 - Kishambala New Testament 2005

Yesu atuma waja kumi na waili. 1-6.

¹ Azaitanga waja kumi na waili, waunganane, azawainka nguvu na ufuṅwa wa kuingata mpepo zoshe na wa kuhonya mahisho.

² Azawatuma, wabilikile uzumbe wa Mulungu, wakahonye wanyonge.

³ Azawati: Mshetoze vya silai, ati ni ngoda, ati ni bene, ati ni funge ya nkande, ati ni feza! Hata nkazu mbili muntu ashezwike!

⁴ Ndimo mwingile mwe nyumba ya muntu, ikalai mumo, mpaka mkizalawa mwe uwo muzi!

⁵ Ndiwo washemihokele, lawai mwe uwo muzi, mkiwahuγutila vumbi jitozizejo milundi yenyu, jiwaγalukile uwona!

⁶ Waja wazalawa, wazaanga mwe ija mizi wakibilikila mbulingwa, kangi koshe koshe wazahonya watamu.

Helode akunda kumwona Yesu. 7-9.

⁷ Zumbe Helode akiiva viya vyoshe azaaγilwa, hambu wantu kuṅwe wazalonga kuti: Yohana atefufuka kwa wafilewo;

⁸ miya kuṅwe wazalonga kuti: Eliya atelawila, kuṅwe wazalonga kuti:

⁹ Wateγanyingwa wa kale ṅwiyae ywawe muṅwe atefufuka. Miya Helode azafanyanya kuγamba: Yohana imi nizamkoma na kumshenga mutwi, lushe uyu, niyemwiva mbuli zakwe, ni ndai? Azalonda, ndivyo amwone.

Aiγusha wantu 5000. 10-17.

¹⁰ Ziya ntuṅwa zikiuya wazamshimwela vyoshe, waγosholevyo. Azawaγuwa, azahita nawo, wai wenye du he muzi weitangwa Betisayida.

¹¹ Wantu wakivitaila wazamtongela; azawahokela, azawaγambila mbuli za uzumbe wa Mulungu, kangi waja wehuma azawahonya.

¹² Mushi ukiunga kushwa, waja kumi na waili wazamwizila angwe: Shungula wantungwa, wazunguluke kwe mizi na kwe mbuwa, walonde mafikilo, kangwe waone vya ja! Hambu kunu ti mwe nyika.

¹³ Azawaiandula angwe: Wainkei inywi, waje! Angwe ndiwo: Nkatina nkande kushima migate mishano na fi mbili; hambu tihite ishwi, tiwaγulile awa wantu woshe nkande?

¹⁴ Hambu waγoshi viya ni makulija mashano. Miya azawati wahina wakwe: Waikazei ndala ndala, kila ndala milongo mishano!

¹⁵ Wazaγoshola ivyoho, woshe wazaikala shi.

¹⁶ Azaγuwa ija migate mishano na ziya fi mbili, azaolela na kwe lwingu, akilavya ntogolo, azaibendulabendula, azaiinkila kwa wahina wakwe, waiiγale kwa waja wantu.

¹⁷ Woshe wazaja, wazaiγula, kangi mpuγutishi zishiγalezo zizadodolwa ngahu kumi na mbili.

Yesu ni ndai? 18-27.

¹⁸ Mushi akivika ike ṅwenye, wahina wakwe wazamwizila, azawauza angwe: Wantu waγamba, kuti imi ni miyo ndai?

¹⁹ Wazamhitwila angwe: Kuṅwe waγamba: U Yohana Mubatizi, kuṅwe waγamba: U Eliya, kuṅwe waγamba: Wabilikizi wa kale ṅwiyae ywawe muṅwe atefufuka.

²⁰ Azawati: He inywi muγamba, kuti ni miyo ndai? Petelo azalonga angwe: U Kilisito ywa Mulungu.

²¹ Miya azawashunda, washezamγambila muntu mu mbuli.

Awaonyesha wahina ndivyo alumiziγwe.

²² Azawati: Ṅwanangwa ywa muntu vyamtala, alumiziγwe vikulu, abentwe ni waγolokezi na wavikizi wakulu na watabaluwangwa, mpaka akoṅwe, afufuke mushi wa ntatu.

Ndivyo muntu amtongele Yesu.

²³ Azawaγamba woshe: Ati muntu akunda kunitongela, shuti anekilemeza ṅwenye, ainule kila mushi muti wakwe wa kukomelwa, ne ndivyo adahe kunitongela.

²⁴ Hambu mwekunda kuhonya moyo wakwe atazakihosa; miya mwehosa moyo wakwe kwa mbuli ya imi atazakihonya.

²⁵ Hambu muntu nezeaonele mbwai, hata akimota ngulu ngima, akikiaza ṅwenye na kuhosiγwa ndivyo?

²⁶ Hambu ndiye atendwe ni shoni na imi ao du na mbuli zangu, uyu ṅwanangwa ywa muntu atazatendwa ni shoni naye akizaiza na utana wakwe na wa ishe na wa walau waṅazi.

²⁷ Kweli namiti: Awa weγoloka aha weyae wawe kuṅwe nkewaone kifa, shuti waneona uzumbe wa Mulungu.

Yesu alangazishiγwa. 28-36.

²⁸ Akibinda kulonga izi mbuli, hakizinka, ati ni mishi mnane, azamγuwa Petelo na Yakobo na Yohana, azakwela nawo mwe ntuli kwa vika.

²⁹ Aho akivika, shula ya cheni chakwe izaγalamuka; hata shuke yakwe izanamanikisha, viya ni lumuli.

³⁰ Kangi kuna waγoshi waili naye, ni Mose na Eliya;

³¹ awa wazalawila na utana, wazalonga, mbuli yakwe ndivyo ihite kwa bontokela Yelusalemu.

³² Petelo na weyae wazaizilwa ni usisiza ungi. Wakiviluka wazaona utana wakwe na waja waγoshi waili weγoloka haṅwe naye.

³³ Waja wakiuka kwakwe, Petelo azamuti Yesu: Mγolokezi, vyatama, tikiikala kunu, tizenge makumbi matatu, iṅwe jako, iṅwe ja Mose, iṅwe ja Eliya! Nkataile avyolonga.

³⁴ Akilonga ivyoho, kuzaiza zunde kulu jizawagwishiliza mpungo; miya aho wakiγubikwa ni jiya zunde wazabulwa ni woγa.

³⁵ Muja mwe zunde muzalawa kanwa angwe: Uyu ni ṅwanangu nimshaγuleye, mwivei!

³⁶ Ichi kanwa chikiiviγwa, Yesu azaoniγwa, kuti a ike. Miya waja nkawavilongile, nkakuna wamγambileye mishi ija viya, waenevyo, hata mbuli ṅwenga du.

Ahonya ṅwana mwena mpepo. 37-45.

³⁷ Mhitu wakwe wakisheela mwe ija ntuli wazakintana na wantu wangi;

³⁸ mwe jiya bumba ja wantu muna mγoshi mweitanga na kanwa kikulu angwe: Mfuzi, nakuhembeleza, umkaule ṅwanangu! Hambu ni ṅwanangu mwe ike.

³⁹ Olela: Mpepo ikimgwila, viya du lushe atakema, yamshindikashindika, mpaka akilawa tefu; ikibinda kumtiγintisha nkaikunda vyedi kumwukila.

⁴⁰ Nizahembeleza wahina wako, waiingate, miya nkawaidahile.

⁴¹ Yesu azawalonga angwe: Mbali inu nkaitozesha, izabinda kuaγilwa. Niange na inywi mpaka lini? Nimizizimizize mpaka hii?

⁴² Mulete ṅwanawo na kunu! Aho akiiza, ija mpepo izamhuna na kumshindika; miya Yesu azaivaila ija mpepo ye usaba, azamhonya yuja ṅwana, azarowinkila kwa ishe.

⁴³ Woshe wazamaka ukulu wa Mulungu. Woshe wakimaka viya vyoshe, aγosholevyo, azalonga kwa wahina wakwe angwe:

Yesu alonga kambili kuti inga alumiziγwe.

⁴⁴ Gelai izi mbuli mwe mashikilo yenyu! Hambu ṅwanangwa ywa muntu aunga kuinkilwa mwe mikono ya wantu.

⁴⁵ Miya waja nkawataile inu mbuli, viya itefishiγwa, isheingile mwe mashikilo yawe, washeiive, kangi wazaogoha kumwuza inu mbuli.

Tendai myoyo midodo. 46-50.

⁴⁶ Kuzaoneka nkanani kwawe, ati mkulu ywawe ni ndai.

⁴⁷ Yesu akitaila nkanani za myoyo yawe azaγuwa kazana, azakaγolosha haja, aliho, azawati:

⁴⁸ Ndiye ahokele aka kazana kwa mbuli ya zina jangu, anihokela imi; kangi ndiye anihokele imi, amhokela yuja anitumileye. Hambu mweγaluka mdodo ṅwenye kwenyu uyu ni mkulu.

⁴⁹ Yohana azamlonga angwe: Mγolokezi, tizamwona muntu mweingata mpepo kwa nguvu ya zina jako, tizamfingiza, kwa kuti nkaanga na ishwi.

⁵⁰ Yesu azamuti: Mshemfingize! Hambu ashiyetiikila nkani, ne mweivana na ishwi.

Yesu azinka Samaliya.

⁵¹ Mishi ikitimiza, aushiγwe kunu shi, ṅwenye azaoleza cheni chakwe na Yelusalemu, ahite na γuko.

⁵² Azalongoza ntuṅwa; wazahita, wazaingila mwe muzi wa Samaliya, kangwe wamliγanyize fikilo.

⁵³ Miya nkawamhokele, kwa kuti aioleze cheni na Yelusalemu, ahite na γuko.

⁵⁴ Waja wahina Yakobo na Yohana wakiviona wazamuti: Zumbe, wakunda, tilonge, moto ulawe mwe lwingu, ukawabinde?

⁵⁵ Miya azahituka, azawavaila, azawati: Nkamtaila, ati inywi mu wana mpeho ani?

⁵⁶ Ṅwanangwa ywa muntu nkaizile kwa hosa myoyo ya wantu, miya kwa ihonya. Wazahita kwe muzi mtuhu.

Kumtongela Yesu. 57-60.

⁵⁷ Kuja silai, wakihita, kuna amlongileye: Nikutongele, ndiko uhite nako!

⁵⁸ Yesu azamuti: Mpelele zina maleme, madeγe yeanga ulanga yana masasa, miya ṅwanangwa ywa muntu nkana ha ikila mutwi.

⁵⁹ Mtuhu azamlonga ṅwenye: Nitongela! Miya azamlandula: Nikundiza, ninehita kwa mzika tate!

⁶⁰ Angwe: Leka, wafilewo wazike weyae wawe wefa! Miya hita, ukabilikile uzumbe wa Mulungu!

⁶¹ Mtuhu azalonga: Nenikutongele, Zumbe; miya azanikundiza, nihite kwa laga waja, ndiwo nikiikala nawo!

⁶² Yesu azawati: Mwetoza γembe na mkono na kuolela na nyuma, nkakombaγanya uzumbe wa Mulungu.