Luka 6 - Kishambala New Testament 2005

Wahina wadahula maiswa mushi wa sabato. 1-5.

¹ Mushi wa sabato akianga kwe mbuwa za ngano, wahina wakwe wazadahula maiswa ya ngano, wazayafyoγosha mwe mikono wazaja.

² Mafaliseyo kuṅwe wazaγamba: Nini mkiγoshola viya vishivyoγosholwa mushi wa sabato?

³ Yesu azawalandula angwe: Nkamfyomile, Dawidi aγosholevyo ṅwenye akiluṅwa ni sala haṅwe na weyae, awona nawo?

⁴ Kuti azaingila mwe nyumba ya Mulungu, azaγuwa migate ya ntogolo, azaija, hata weyae azawapangila? Kangi ija ne iina ṅwiko kujiγwa, ndiwo wakiija ni wavikizi ike.

⁵ Azawati: ṅwanangwa ywa muntu ni zumbe ywa mushi wa sabato.

Yesu ahonya mtamu mushi wa sabato. 6-11.

⁶ Mushi mtuhu wa sabato azaingila vikiloi kwa fuza; muja muna muntu aholozeye mkono wa kulume.

⁷ Watabaluwangwa na Mafaliseyo wazamteγeleza, ati neamhonye mushi wa sabato, kangwe waone lufyalimile.

⁸ Ṅwenye azataila ntongonyezi zawe, miya azamuti yuja muntu mwena mkono uholozewo: Inuka, uγoloke na aha gati! Azainuka azahaγoloka.

⁹ Ne Yesu ahowati: Namiuza: Vina ṅwiko kuγoshola mbuli ntana mushi wa sabato hambu mbada? Kuhonya muntu hambu kumkoma?

¹⁰ Azawadulila woshe, akibinda azamγamba yuja muntu: Kusula mkono wako!

¹¹ Azaviγoshola, ne uwo mkono wakwe uhouya, sa ndivyo uilivyo kale. Miya waja wazafanana viya watelaluka, wazalonga wenye na wenye, ndivyo wamγoshwele Yesu.

Yesu avika ike ashaγula wahina. 12-16.

¹² Mishi ija azalawa, azakwela mwe ntuli kwa vika, azagona mesho na kuchelezamvika Mulungu.

¹³ Kukicha azaitanga wahina wakwe, azawashaγula kumi na waili, ne ainkilewo zina ja ntuṅwa.

¹⁴ Ni Simoni, amunkileye zina ja Petelo, na nduγuye Andeleya, Yakobo na Yohana, Filipo na Balitolomeyo.

¹⁵ Mateyo na Toma, Yakobo, ṅwana Alifeyo, na Simoni mweitangwa Zelote.

¹⁶ Yuda, ṅwana Yakobo, na Yuda Isikaliyota, ni yuja amheteleye leba.

Yesu ahonya wangi.

¹⁷ Azahita nawo, wazaγoloka hantu hena bweta; wana bumba kulu ja wahina wakwe na wantu wangi watuhu weanduka mwe shi zoshe za Yudeya na za Yelusalemu na za Tilo na za Sidoni uko kwe bahali.

¹⁸ Awa wazaiza, waive mbuli zakwe, kangi wahonyiγwe mahisho yawe; hata waja wepishiγwa ni mpepo ze usaba wazahonyiγwa.

¹⁹ Wantu woshe wazalonda, wamdowe, hambu mwe ṅwili wakwe muzalawa nguvu, izahonya wosheni.

Yesu abilikila wantu nyemi. 20-23.

²⁰ Ṅwenye azainula mesho yakwe, azaolela wahina wakwe, azawati: We nyemi ni nywiyo wakiwa, hambu uzumbe wa Mulungu ni wenyu.

²¹ We nyemi ni nywiyo mwena sala ivi lushe, hambu mtazaiγushiγwa.

²² We nyemi ni nywiyo mwelila ivi lushe, hambu mtazasheka. We nyemi ni nywiyo, wantu wakimishukiza na kumiahula, wakimikanka na kushwika zina jenyu, viya ol bada, kwa mbuli ya ṅwanangwa ywa muntu.

²³ Tamilwai uja mushi na kuvinavina! Hambu upokezi wenyu mwe lwingu ni ungi Hambu ni viya, waishe zenyu waγoshwelevyo wateγanyingwa.

Awainka ukiwa.

²⁴ We ukiwa ni nywiyo wazuli, hambu mzabinda kuγuwa mhembulizo wenyu.

²⁵ We ukiwa ni nywiyo muγenyezewo ivi lushe, hambu mtazaluṅwa ni sala. We ukiwa ni nywiyo mwesheka ivi lushe, hambu mtazalila na kukemesha.

²⁶ We nkiwa ni nywiyo, wantu woshe wakimitogola, hambu ni viya, waishe zawe waγoshwelevyo wateγanyi wa ulongo.

Filai mbazi. 27-36.

²⁷ Miya inywi mweiva namiti: Kundishai wankulu wenyu, mufile mbazi wemishukiza!

²⁸ Ṅazai mesho wemilana, muhembelezeze waja wemibela!

²⁹ Mwekutowa tama iṅwe, hata ijo tuhu ujimtendezwile! Mwekuhoka shuke yako ya kiγubika, hata nkazu ushemnyime!

³⁰ Kila mwekulombeza umunke!

³¹ Mwekuhoka viya vyako ushezavimtiγila vituhu! Muvyokunda, wantu wavimiγoshwele, longolai inywi kuviwaγoshwela!

³² Hambu mkikundisha wemikundisha inywi, muna ntogolo ani? Hambu wahuza wohe wakundisha waja wewakundisha.

³³ Hambu mkiwaγoshwela vitana waja wemiγoshwela inywi vitana, muna ntogolo ani? Wahuza wohe waγoshola

³⁴ ivyoho. Mkikunda kukopiγwa ni waja, muwoalila, kuti mtazauziziγwa ndiwo, muna ntogolo ani? Wahuza wohe wakunda kukopiγwa ni wahuza weyae wawe, kangwe nezewauziziγwe viya, wainkilevyo.

³⁵ Miya kundishai wankulu wenyu! Γosholai vitana, kangi kundai kukopiγwa ni waja, mushiwoalila kuti: Watazamiuziza! Ne ndivyo upokezi wenyu uγenele, ne ndivyo mγaluke wana wa yuja mwe uko ulanga, hambu ṅwenye ana mbazi na wabada washiwomtogola.

³⁶ Γalukai wantu wena ulungu, sa ishe ywenyu avyona utungu.

Mshelahe. 37-49.

³⁷ Mshelahe wenyu, kangwe mshezalahiγwa! Msheifye wenyu, kangwe mshezaifiγwa! Ushilizanyai, kangwe nezemwushiliziγwe! Inkilai, kangwe nezemwinkwe!

³⁸ Kihimo kitana chishishintilwecho na kukuchiγwa na mpaγatishi zakwe mtainkwa, mγuwe. Hambu kihimo, ndicho muhime nacho, ne ndicho nezemuhimilwe nacho.

³⁹ Azawazisa lushimo angwe: Kumbe tuntu jadahaγesa tuntu ṅwiyae?

⁴⁰ Nkawatakina woshe waili mwe lwina? Mhina nkamzinka mfuzi ywakwe, vyabesha, kila mhina akiγaluka, sa mfuzi ywakwe alivyo.

⁴¹ Nini ukiolela kashashani ke mwe zisho ja ṅwiyawo? Miya jiya γoγo gima je mwe zisho jako nkujiona?

⁴² Ṅwiyawo umlonga zeze kuti: Ṅwiyangu, leka, niushe kashashani ke mwe zisho jako, uishiene jiyaγoγo je mwe zisho jako? Wahemba iwe! Kuandiila usha jiya γoγo je mwe zisho jako, ukibinda udaheolela, ndivyo uushe kaja kashashani ke mwe zisho ja ṅwiyawo!

Muti mtana.

⁴³ Hambu nkakuna muti mtana wevyala ntunda mbada, vituhu nkakuna muti mubada wevyala ntunda ntana.

⁴⁴ Hambu kila muti utailwa na ntunda zakwe ṅwenye. Hambu wantu nkawaunga nkuyu mwe migunga, hata mwe mishewa nkawashenga vizeγembwele vya mazabibu.

⁴⁵ Muntu mtana alavya mwe kitende chakwe kitana cha moyo vintu vitana, kangi muntu mubada alavya mwe kitende chakwe kibada vintu vibada, hambu viya, moyo uvyogisa, ne kanwa chivyolonga.

⁴⁶ Nini mkiniitanga: Zumbe! Zumbe!? Kangi nivyolonga nkamviγoshola.

Shimo za nyumba.

⁴⁷ Kila muntu mweiza kwangu akiiva mbuli zangu, akiziγoshola, nitamionyesha, avyofanana navyo:

⁴⁸ Afanana na muntu mwezenga nyumba na kuifukila na ndai vitana, adaheika shikamilo jakwe mwe kungu; mazi yakiγenela, hwazi jitalawa, jibule he ija nyumba na kufuka haho, miya nkajidaha kuichakula, kwa kuti izengiγwe vitana.

⁴⁹ Miya muntu akiiva, kangi akisheγoshola, afanana na muntu mwezenga nyumba mwe shanga ulangalanga na kusheigela shikamilo; hwazi ja mazi jikiibulila na kuifuka, viya du lushe itakina, kangi kuchakuka kwa iyo nyumba ni kukulu.