Luka 4 - Kishambala New Testament 2005

Yesu aγezwa. 1-13.

¹ Kwa viya Yesu agisizevyo mpeho ṅazi azauka kuja Yolodani, azaiγalwa ni mpehongwa na nyika,

² azaγezwa mishi milongo mine ni yuja ṅwenye leha. Mishi ija nkajile hata, ikizinka, azaluṅwa ni sala.

³ Yuja ṅwenye leba azamuti: Ati u ṅwana Mulungu, longa iji iwe jiγaluke nkande.

⁴ Yesu azamlandula: Kuigondiγwe kuti: Siyo nkande ike yemunka muntu ugima, miya ni kila mbuli ya Mulungu.

⁵ Vikibinda azamkweza mwe mulima mule muno, azamwonyesha viya du lushe uzumbe woshe wa ngulu ngima.

⁶ Yuja ṅwenye leba azamuti: Unu ufuṅwa woshe na vitana vyakwe vyoshe nenivikunke, hambu nizaviinkwa, kangi navimunka, ndiye nimkunde.

⁷ Ati wanikinila na kunivika, vyoshe ni vyako.

⁸ Yesu azamlandula angwe: Kuigondiγwe: Umvike Zumbe, Mulungu ywako, na kumtumikila yuja ike du!

⁹ Vikibinda azamwiγala Yelusalemu, azamγolosha mwe vikilongwa ulanga he heta, azamuti: Ati u ṅwana Mulungu, lumbila aha na kuja shi!

¹⁰ Hambu kuigondiγwe: Atakulaγiliziza walau wakwe, wakuγolokele,

¹¹ wakuambate na mikono, kangwe mulundi wako usheukwile he iwe.

¹² Yesu azamlandula angwe: Kuzalongwa: Ushezamγeza Zumbe, Mulungu ywako!

¹³ Yuja ṅwenye leba akibontola miγezeze yoshe azanauka kwakwe.

Yesu abilikila Nazaleti. 14-30.

¹⁴ Yesu azauya na Galileya kwa nguvu ya mpehongwa; kilango chakwe chizahita kwe ziya shi zoshe ze hehi hehi.

¹⁵ Ṅwenye azafuza mwe mavikilo yawe, akitogolwa ni wantu woshe.

¹⁶ Azabula Nazaleti, akulilemo; mushi wa sabato azaingila vikiloi, sa avyozwela, azainuka, afyome.

¹⁷ Azainkwa kitabu cha mteγanyi Yesaya; akikusula chiya kitabu azaona haja hantu hagondiγweho kuγamba:

¹⁸ Mpeho ya Zumbe yaniikaiia, ne ilekileyo, akiniambwila mavula, kangwe nibilikile wakiwa nyem!; azanituma, niukwile washungiγwewo, kuti newashungwilwe, wafilewo mesho, kuti newaone, kangi ndashe, nizilohole,

¹⁹ zihite zikokunda wenye, nikabilikile vuli ja mbazi ya Zumbe.

²⁰ Akikonya chiya kitabu azachiinkila kwa mγoja nyumba, akibinda azaikala.

²¹ Woshe we muja vikiloi wazamdulila. Azaandiila kuwalonga kuti: Lelo uja ugonde wabontoka he mashikilo yenyu.

²² Woshe wazamlongela uwona, wazamaka milongele ya kanwa chakwe, kuti ni ya mbazi, wazaγamba: Uyu so ṅwana Yosefu?

²³ Azawati: Kumbe nemunilonge luja lushimo lwa kuγamba: Mγanga, kilaγule ṅwenye! Viya tiivilevyo, kuti vizaγosholwa Kapelinaumu, viγoshole hata umu mwe muzi wa isho!

²⁴ Azawati: Kweli namiti: Nkakuna mteγanyi mwekundwa kaya kwakwe.

²⁵ Nivyomilonga ni vya kweli: Mwe shi ya Waisilayeli ne kwina wavyele wangi wafilwewo ni waγoshi wawe mishi ya Eliya, aho lwingu lukizuγulwa mavuli matatu na myezi mtandatu, sala nkulu ikigwa mwe shi ngima,

²⁶ kangi Eliya nkatumiγwe kwa ṅwiyae ywawe muṅwe, atumiγwe Saleputa mwe shi ya Sidoni kwa mvyelengwa afilweye ni mγoshi ywakwe.

²⁷ Kangi mishi ya Elisa wakoma ne wakiγenela mwe shi ya Isilayeli, miya nkakuna ahonyiγweye kushima Naimani ywa Siliya.

²⁸ Woshe we muja vikiloi wakiviiva, wazakwelwa ni mava, wazainuka,

²⁹ wazamγulusha, alawe mwe muzi wawe, wazamwiγala na kuja, uja mulima muzi wawe uzengiγwemo ukohelela, ni kimguwi, kangwe wamshindike.

³⁰ Miya ṅwenye azahita na kuwadwisha gati.

Yesu aingata mpepo ye usaba. 31-37.

³¹ Azahita Kapelinaumu, ni muzi wa Galileya; azaikala γuko, akifuza wantu mushi wa sabato.

³² Wantu wazashentuka mifuzize yakwe, hambu milongele yakwe ina nguvu.

³³ Muja vikiloi muna muntu mwehuma mpepo ye usaba, azakema na kanwa kikulu angwe:

³⁴ Yesu ywa Nazaleti, tina mbuli ani toshe, ishwi na iwe? Uzaiza kwa tibinda! Takutaila, kuti u ngatiyani, kuti u mṅazi ywa Mulungu.

³⁵ Yesu azaivaila angwe: Leka lwashul Kangi lawa mwe uyu muntu! Ija mpepo izamtambika na kuja gati, vikibinda izalawa mwe ṅwili wakwe, nkaidahile kumlumiza.

³⁶ Woshe wazaingilwa ni woγa ukulu, wazaγambilana: Ni mbuli ani inu? Hambu alaγiliza mpepo ze usaba kwa ufuṅwa wena nguvu, kangi ziyalawa!

³⁷ Nguma yakwe izagisa koshe koshe kwe ziya shi ze hehi.

Yesu amhonya mkwee ja Simoni. 38-44.

³⁸ Akiinuka muja vikiloi azaingila mwe nyumba ya Simoni. Nine ja mkaza Simoni azaisiiziγwa ni mbu, wazamhembeleza kwa mbuli yakwe.

³⁹ Azamwinamila, azavaila ziya mbu, ne zihomleka; viya du lushe azainuka, azawaγoshwela ndima.

Watamu wangi wamubasha.

⁴⁰ Zuwa jikibinda kuingila, woshe wena wanyonge, hata wehuma utamu ani, wazawamwiγaila; wosheni azawabadikila mikono muṅwe muṅwe, ne awahonyizevyo.

⁴¹ Wangi mpepo zawe zizalawa zikikema angwe: Iwe u ṅwana Mulungu; miya azazivaila, nkazikundize, zikilonga, kuti ziimtaile kuti: Ṅdiye Kilisito.

⁴² Kukicha azahalawa, azahita hantu he ike; wantu wangi wazamlonda, mpaka wakibula haja aliho, wazamtoza, kangwe asheuke kwawe.

⁴³ Miya azawati: Shuti nibilikile hata mizi mituhu mbuli ya uzumbe wa Mulungu, hambu ne nitumiγwevyo.

⁴⁴ Azaanga akibilikila mwe mavikilo ya Galileya.