Luka 23 - Kishambala New Testament 2005

Yesu alongwa masa ha Pilato. 1-25.

¹ Wazainuka wosheni haṅwe, wazamwiγala kwa Pilato,

² wazaandiila kumfyalima angwe: Uyu tizamwona, akitunya wantu wa mbali yetu, akiwalemeza, washemunke Kaiza kodi, akiγamba: Imi ṅwenye Kilisito ni Zumbe.

³ Pilato azamwuza angwe: Iwe u zumbe ywa Wayuda? Azamwitikila angwe: Uzalonga.

⁴ Miya Pilato azawalonga wavikizi wakulu na wantu we haja angwe: Uyu muntu siona masa yakwe.

⁵ Miya waja wazalongesha angwe: Atunya wantu akifuza mwe shi ngima ya Wayuda; aandiile Galileya, mpaka akiiza na kunu.

⁶ Pilato akiviiva azauza, ati ni muntu ywa Galileya.

Yesu ha Helode.

⁷ Akitaila, kuti aanduka mwe uzumbe wa Helode, azamtuma kwa Helode, yohena mishi ija a Yelusalemu.

⁸ Helode akimwona Yesu azatamilishiγwa; hambu mishi mingi azakunda kumwona kwa viya, aivilevyo mbuli zakwe, kangi azaalila kuona lwitangilo, lukiγosholwa ndiye.

⁹ Azamwuza mbuli nyingi, miya yuja nkamlandule hata ṅwenga.

¹⁰ Miya wavikizi wakulu na watabaluwangwa waiγoloke haho, wakihima kumfyalima.

¹¹ Helode na ntimizi zakwe wazamubela, wazamfyulila na kumzwika shuke yeṅalisha, vikibinda azamtuma vituhu kwa Pilato.

¹² Helode na Pilato uja mushi wazaivana na kushoγana; mishi izinkileyo ne wakiikilana nkulu.

Yesu alahiγwa ha Pilato.

¹³ Pilato azaitanga wavikizi wakulu na wafuṅwa na wantu, waliγanile,

¹⁴ azawati: Mzaniletela uyu muntu, kuti azatunya wantu, kangi mzaona, mzaiva, nikimlaha, miya viya, muvyomfyalima, imi siviene, kuti uyu muntu azavibana;

¹⁵ Helode yohena nkaviene. Hambu azamwuza na kwetu, hambu nkakima viγosholwevyo ndiye vyeagiza, akikoṅwa.

¹⁶ Lushe nitamluta, vikibinda nimshungule.

¹⁷ Hambu ne aina msimo wa kuwashungwila muntu muṅwe mishi ya uja mviko mkulu.

Balaba.

¹⁸ Miya wantu woshe wazakema na kanwa kiṅwe: Mwushe uyu, utishungwile Balaba!

¹⁹ Yuja agezilwe mwe chumba kwa mbuli ya kugwisha kiva muja kaya na kukoma wantu.

²⁰ Pilato azawalonga vituhu, hambu azakunda kumshungula Yesu.

²¹ Miya waja wazamkemela angwe: Mkontele mwe muti! Mkontele mwe muti!

²² Azawalonga ka ntatu: Uyu abanilei? Siene, kuti azaγoshola vyeagiza, akikoṅwa; nenimtowe, nimshungule!

²³ Miya wazaisiiza kumupisha na kutula vuzo jingi wakimhembeleza, yuja akontelwe mwe muti, mikemele yawe na ya wavikizi wakulu izaisiiza.

Yesu ainkilwa.

²⁴ Ne Pilato ahoitikila viya, wavyokunda, vibontoke.

²⁵ Yuja agezilweye mwe chumba kwa mbuli ya kiva na kukoma wantu, ndiye wakimlombeza, azamshungula, miya Yesu azamwinkila, wamγoshwele, wavyokunda.

Yesu alililwa.

²⁶ Wakimwiγala, Simoni, muntu ywa Kilene, alawa nkoi, wazamwinuza muti wa kukomelwa, aumwinwile Yesu, amtongele.

²⁷ Wantu wangi muno kabisa wazatongela, hata wavyele wetowa vifuwa na kumlilila.

²⁸ Yesu azawahitukila, azawati: Wandele wa Yelusalemu, mshenililile imil Kilililei wenye na wana wenyu!

²⁹ Hambu mishi yaiza, ndiho wantu nezewalonge: We nyemi ni waγumba na waja washivyelewo wana na waja washionkezewo na matombo yawe.

³⁰ Ne ndiho waandiile kulonga milima: Tigwelei! Hata vituli newavilonge: Tiγubikei!

³¹ Hambu muti mwishi ukiγoshwelwa ivyoho, uja mkazu utazatendwa zeze?

³² Hata watuhu waili wahambanyi wazaiγalwa, wakoṅwe haṅwe naye.

Yesu akontelwa mwe muti, afa. 33-49.

³³ Wakibula haja hantu heitangwa He mazutwi wazamkontela haja mwe muti, hata waja wahambanyi muṅwe kulume, muṅwe kumosho kwakwe.

³⁴ Yesu azalonga: Tate, uwaushilize! Hambu nkawataila wavyoγoshola. Wazapangilana shuke zakwe na kuzitowela lusolo.

³⁵ Wantu wazaγoloka wakiolela; miya waja wafuṅwa wazamfyulila angwe: Watuhu azawahonya; neakihonye ṅwenye, ati ndiye Kilisito ywa Mulungu ashaγulweye!

³⁶ Washilikali wohe wazamvuluγila, wazamubasha, wazamwiγaila mazi ya nyongo,

³⁷ angwe: Ati u zumbe ywa Wayuda, kihonye!

³⁸ Haja ulanga hazagondwa Kigiliki na Kiloma na Kiebuleyo masa yakwe kuγamba: Uyu ni zumbe ywa Wayuda.

³⁹ Waja wahambanyi waholeziγwewo haṅwe naye muṅwe azamkanka angwe: Kumbe iwe u Kilisito? Kihonye! Hata ishwi tihonye!

⁴⁰ Ṅwiyae azamlandula na kumshunda angwe: Iwenawe nkumwogoha Mulungu, kangi mlaho uinkiγwewo ni wuwo?

⁴¹ Kangi ishwi watitala, hambu titahokela vyeagiza viya, tiγosholevyo, miya uyu nkana abanilevyo.

⁴² Vikibinda azamγamba: Yesu, nifukila, ndiho uingile mwe uzumbe wako!

⁴³ Angwe: Kweli nakuti: Lelo u haṅwe na imi mwe Paladiso.

⁴⁴ Vikibula saa mtandatu, kuzagwa lwiza mwe shi ngima mpaka saa kenda, kwa kuti zuwa jizaleka kuaka;

⁴⁵ hata jiya shuke kulu muno ja zuγaila haṅazi ṅwenye muja vikiloi jizatatuka gati.

⁴⁶ Yesu azakema na kanwa kikulu angwe: Tate, nainkila mpeho zangu mwe mikono yako. Akibinda kulonga ivyoho azadwika moyo.

⁴⁷ Yuja mγolokezi ywa washilikali akiona viya vibontokevyo, azamtogola Mulungu angwe: Kweli uyu muntu ne ai mtanda.

⁴⁸ Hata wantu woshe waungananewo haja wakiolela, wakiona viya vibontokevyo, wazatowa vifuwa, wazaγotoka.

⁴⁹ Woshe wamtailewo wazaγoloka hale wakiolela, hata waja wavyele wamtongelewo, akilawa Galileya.

Yesu azikwa. 50-56.

⁵⁰ Ne kwina mγoshi, zina jakwe ndiye Yosefu, ni mfuṅwa, kangi ni muntu mtana na mtanda.

⁵¹ Uyu nkaivane na weyae mitongonyezeze na miγoshwele yawe; ni ywa muzi wa Yudeya weitangwa Alimatiya, kangi yohe azaafiza uzumbe wa Mulungu.

⁵² Uyu azahita kwa Pilato, azamlombeza kimba cha Yesu.

⁵³ Azachisheleza, azachikanta shuke yeṅala, azachiika mwe mbila ibongiγweyo mwe kungu, mushizatimo mwikwe muntu.

⁵⁴ Uja mushi ni wa kuliγanya Pasa kangi mushi wa sabato uzaandiila.

⁵⁵ Waja wavyele waizilewo haṅwe naye, akilawa Galileya, wazatongela na kuja, wazaolela iyo mbila, kangi kimba chakwe chiikiγwevyo.

⁵⁶ Wakibinda wazauya, wazamaliγanya miti yehumpuntika vitana na mafutilo ya mluziluzi; miya mushi wa sabato wazatongomala kaya kwa kitigo chawe.