Luka 2 - Kishambala New Testament 2005

Yesu avyalwa Betelehemu.

¹ Mishi ija kuzalawa mulomo kwa Kaiza Augusito, ngulu ngima igondwe kodi.

² Kuja kugondwa ne kwa bosi, kugondiγwe, Kileniyo akitoza shi ya Siliya.

³ Woshe wazahita kwa gondwa, kila muntu mwe muzi, amolawa namo.

⁴ Hata Yosefu azalawa Galileya mwe muzi wa Nazaleti, ahite Yudeya kwe muzi wa Dawidi weitangwa Betelehemu, kwa kuti chengo cha ishe ni chiya cha Dawidi.

⁵ Azahita kwa gondwa haṅwe na muke Maliya, alombileye, uyu ne aina nda.

⁶ Wakiikala kuja, mishi ya kuvyala kwakwe izatimiza, azavyala ṅwana ywa nteluka,

⁷ azamkanta shuke za kinkebe, azamlaza mwe lubala, ṅombe zimojiila, kwa kuti muja mwe fikilo nkamna hantu hedi.

Walishi wabilikilwa mbuli ya mhonya.

⁸ Ne kwina walishi mwe ija shi, wazagona mwe laγo na chuma chawe, wazagona mesho

⁹ na kuchiγoja. Haja mlau ywa Zumbe azawalawila, hata utana wa Zumbe uzawapwinkukila, viya ni iangaila, ne wahoingilwa ni woγa ukulu.

¹⁰ Yuja mlau azawati: Msheogohe! Olelai namibilibila nyemi nkulu yeunga kugwa kwe mbali zoshe.

¹¹ Hambu mzavyailwa lelo mhonya mwe muzi wa Dawidi, ndiye Zumbe Kilisito.

¹² Lwitangilo lwenyu shulu: Mtaona kazana, kaikantiγwe shuke za kinkebe, kailaziγwe mwe lubala, ṅombe zimojiila.

¹³ Viya du lushe kuzaoneka haṅwe na yuja mlau nkondo ngima ya wantimizi wa lwingu, wazamtogola Mulungu angwe:

¹⁴ Utana ni wa Mulungu mwe lwingu, mwe shi utondolo kwa wantu wemtamila!

¹⁵ Walau wakibinda kuuka kwawe, wakihita mwe lwingu, walishi wazaγambilana: Netihite mpaka Betelehemu, tiolele inu mbuli ibontokeyo uko, Zumbe atiukwileyo!

¹⁶ Wazafikahita, wazamwona Maliya na Yosefu na kaja kazana, kailaziγwe mwe lubala, ṅombe zimojiila.

¹⁷ Wakikaona wazaukula iyo mbuli walongiγweyo ya uyu ṅwana.

¹⁸ Woshe waviivilewo wazavimaka viya wavyolongwa ni waja walishi.

¹⁹ Miya Maliya azatoza izi mbuli zoshe na kuziika mwe moyo wakwe.

²⁰ Waja walishi wazaγotoka na kumtogola Mulungu na kumtowela zumo kwa viya vyoshe, waivilevyo, kangi waenevyo, kuti ni vivyoho, sa walongiγwevyo.

Yesu ashengwa.

²¹ Mishi mnane ya kumshenga ikitimiza, azainkwa zina ja Yesu, ni jiya jilongiγwejo ni yuja mlau, nine ashizati atende nda.

Yesu aiγalwa Yelusalemu.

²² Mishi ya mpoza, Mose alaγilizeyo, ikitimiza, wazamwiγala Yelusalemu, wamlavilize kwa Zumbe;

²³ ni kwa viya vigondiγwevyo mwe mulomongwa kuγamba: Kila ṅwana ywa kiγoshi, mvyele ayeandiila kuvyala,

²⁴ shuti aitangwe mṅazi ywa Zumbe. Wazakunda, wamkombole na mpuγuto mbili ao na makinda maili ya visuwa manga, sa vilongiγwevyo mwe mulomongwa wa Zumbe.

Simeyoni amhokela Yesu.

²⁵ Kuja Yelusalemu ne kwina mγoshi, zina jakwe ndiye Simeyoni; uyu ni muntu mtanda atozesheye vitana na kuafiza mhembulizo wa Waisilayeli, hata mpeho ṅazi ana nayo.

²⁶ Uyu aiteγanyiziγwe ni mpeho ṅazi kuγamba, asheone kifa, ashizati amwone Kilisito ywa Zumbe.

²⁷ Azahimilwa ni Mpehongwa, ahite vikiloi haja, wavyazi wakimwiγala Yesu, kangwe wabontole mbuli yakwe, sa avyozwela mwe uja mulomo.

²⁸ Ne yuja mγoshi ahomtoza na mikono yakwe na kumtogola Mulungu angwe:

²⁹ Zumbe, lushe wamshungula mupuna ywako, ahite mpeho, sa ulongilevyo.

³⁰ Hambu mesho yangu yazaona uvunizi wako,

³¹ uliγanyizewo mbali zoshe;

³² ni langaila jemulikila wamzimu, kangwe mbali yako ya Isilayeli itogolwe.

³³ Ishe na nine wazamaka izo mbuh azolongwa.

³⁴ Simeyoni azawaṅaza mesho, azamlonga nine Maliya angwe: Olela! Uyu aikiγwe, Waisilayeli wangi wahosiγwe, kangi wangi wainulwe ndiye,

³⁵ aγaluke lwitangilo lwebishiliziγwa nkani. Moyo wako utazashengwa ni shime, ntongonyezi za myoyo ya wantu wangi zihozahunkuka.

Ana atogola.

³⁶ Vituhu kuna mteγanyi ywa kivyele, ndiye Ana, ṅwana Fanweli, ywa chengo cha Aseh. Uyu ni mγundu, mavuli yakwe ni mangi; akilawa uhweni azaikala na mulume mavuli mfungate.

³⁷ Uyu mvyelengwa aifilwe ni mulume, mavuh yakwe yazaγelemuka milongo mnane na mane; yuja nkaukile mwe vikilongwa,

³⁸ kilo na mushi azamtumikila Mulungu na kufunga na kuvika. Mwe ija minga uyu yohena azamubasha, azamlaviliza Mulungu ntogolo, azalonga mbuli yakwe kwa waja woshe waafizewo ukombozi wa Yelusalemu.

³⁹ Wakibinda mbuli zoshe, walaγiliziγwezo ni mulomo wa Zumbe, wazauya Galileya kwe muzi wawe wa Nazaleti.

⁴⁰ Yuja ṅwana azakula, azatenda nguvu ya kimpeho, azaγenyeza viyuγo, kangi mbazi ya Mulungu izamγolokela.

Yesu ahita Yelusalemu.

⁴¹ Wavyazi wakwe wazazwela kuhita kila ṅwaka Yelusalemu kwe mviko wa Pasa.

⁴² Akibinda mavuli kumi na maili, wazakwela naye, sa wavyokabasha uja mviko.

⁴³ Mishi ikimambuka, wazaγotoka, miya ṅwana ywawe Yesu azahumula Yelusalemu, wavyazi wakwe nkawataile.

⁴⁴ Miya wazaγamba: Minga a kwa weyae; wakihita ntambo ya mushi muṅwe wazamlonda kwa wanduγu na kwa weyae wawe.

⁴⁵ Wakishemwona wazauya Yelusalemu kwa mlonda.

⁴⁶ Mishi mitatu ikizinka, wazamwona vikiloi, aiikale gati kwa wafuzi akiwateγeleza, kangi akiuzanya nawo.

⁴⁷ Miya woshe wemteγeleza wazamaka lutwi lwakwe na milandwile yakwe.

⁴⁸ Wakimwona wazashentuka, nine azamuti: Ṅwanangu, nini ukitiγoshwela ivyoho? Olela! Isho pa imi tizakulonda na ukiwa.

⁴⁹ Azawati: Nini mkinilonda? Nkamtaila, kuti vyanitala kuikala mwa Tate?

⁵⁰ Miya waja nkawataile inu mbuli, awaγambileyo.

⁵¹ Azasheela nawo mpaka Nazaleti, wakibula, azaikala na kuwaitika. Nine azatoza ziya mbuli zoshe mwe moyo wakwe.

⁵² Yesu azakula na kuγenyeza viyuγo, mpaka akiγaluka muntu mgima, kangi ne akimtamila Mulungu, hata wantu.