Luka 19 - Kishambala New Testament 2005

Zakeyo.

¹ Azaingila Yeliko, azazunguluka mumo.

² Ne mwina muntu mweitangwa Zakeyo, ni mkulu ywawangelu, kangi ni mzuli.

³ Azalonda, ndivyo amwone Yesu alivyo, miya nkadahile kwa mbuli ya wantu wakiγeneia, hambu ni mzihi.

⁴ Azaγuluka na mazu, azakwela mwe msoso, kangwe amwone, hambu haja Yesu azakunda kuhaomboka.

⁵ Yesu akibula haja hantu azaolela na ulanga, azamuti: Zakeyo, fikasheela! Hambu lelo nenifikile kwako.

⁶ Azafikasheela, azamhokela na nyemi.

⁷ Woshe wavienewo wazaṅuna angwe: Azafikila mwa muntu mhuza.

⁸ Zakeyo azainuka, azamγamba Zumbe: Zumbe, hindi gima ja viya, nivyona navyo, niyakajiinkila kwa wakiwa; ati kuna nimfutileye, navimwuziza kane.

⁹ Yesu azamuti: Lelo uvunizi uzaoneka umu nyumbai, kwa kuti uyu ṅwenye yohe ni ṅwana Abulahamu.

¹⁰ Hambu ṅwanangwa ywa muntu aizile kwa londa na kuvunila viya viaγilevyo.

Lushimo lwa mali wapuna wazoikilwa. 11-27.

¹¹ Waja wakiteγeleza izi mbuli, azabadika ntuhu, azawazisa lushimo, hambu kwa viya ṅwenye abuzizevyo hehi na Yelusalemu, waja wazafanyanya kuti: Uzumbe wa Mulungu nunga kulawila ivi lushe aha.

¹² Azawati: Kuna mkilindi, azahita mwe shi hale, akaγuwe uzumbe γuko, akibinda, aγotoke.

¹³ Azaitanga wapuna wakwe kumi, azawainka magana kumi ya shilingi azawati: Chuluzai nazo, mpaka ndiho niuye!

¹⁴ Waja wakaya wazaihilwa ndiye, uko nyuma wazamtumila walau angwe: Nkatikunda, uyu akitoza uzumbe kwetu.

¹⁵ Akibinda kuγuwa uja uzumbe azaγotoka, azalaγiliza, waja wapuna, ainkilewo feza, waitangwe na kwakwe, ataile, kila achuluzevyo.

¹⁶ Yuja ywa bosi akibula azamuti: Zumbe, gana jako ja shilingi jizamota magana kumi.

¹⁷ Azamuti: Hongela! U mupuna mtana iwe! Kwa kuti uzasimamiza viya viγeke, utainkwa uzumbe wa mizi kumi.

¹⁸ Kuzaiza yuja ywa mbili angwe: Zumbe, gana jako ja shilingi jizamota magana mashano.

¹⁹ Azamuti: Iwe nawe uγaluke zumbe ywa mizi mishano!

²⁰ Kuzaiza mtuhu angwe: Zumbe, shiji gana jako ja shilingi! Nizajikanta na mhaluma, nizajiika.

²¹ Hambu nizakuogoha, kwa kuti u muntu muwiwi, uhaγuwa ushiikilevyo, uhaγobola ushihandilevyo.

²² Azamuti: Nikulaha na viya, uvyolonga, mupuna mubada iwe! Ati uzataila kuti: Ni muntu muwiwi imi, nihaγuwa nishiikilevyo, nihaγobola nishihandilevyo,

²³ nini ukisheinkila feza zangu kwa wachuluzi wa feza, lushe imi nikiiza, anga nizaziγuwa na kuwo?

²⁴ Waja waγolokewo azawati: Muhokei jiya gana ja shilingi, mujimunke yuja mwena magana kumi!

²⁵ Wazamuti: Zumbe, kangi ana magana kumi?

²⁶ Angwe: Namiti: Kila mwena kitende atainkwa, miya ashinaye hata viya, avyona navyo, atavihokwa.

²⁷ Lushe waja wankulu wangu washikundilewo, nikitoza uzumbe kwawe, waletei na kunu, muwakome, niiolele!

Yesu aingila Yelusalemu. 28-38.

²⁸ Akibinda kuvilonga azahita sila yakwe, akwele Yelusalemu.

²⁹ Akibula kuja Betifage na Betaniya he mulima weitangwa wa miziyaγembe, azatuma wahina wakwe waili

³⁰ angwe: Hitai mwe kaja kazizi haja sheja! Mkikaingila mtaona ṅwana mpunda ashungiγweye, ashizatiye apandwe; mdoholei, mumlete!

³¹ Ati muntu amiuza: Nini mkimdohola?, mtamuti: Zumbe aagiziγwa ndiye!

³² Waja watumiγwewo wazahita, wazaona sa viyaho, awaγambilevyo.

³³ Wakidohola yuja ṅwampunda, waja wenye wazawati: Nini mkidohola uyo ṅwampunda?

³⁴ Wazawati: Zumbe aagiziγwa ndiye.

³⁵ Wazamwiγala kwa Yesu, wazamtandika shuke zawe, vikibinda wazamkweza Yesu.

³⁶ Akihita, wazatandika shuke zawe silai.

³⁷ Akibula haja ha kusheela he mulima wa miziyaγembe, bumba joshe ja wahina wakwe jizaandiila kuona nyemi na kumtogola Mulungu na vyanwavikulu kwa ziya nguvu zoshe, waenezo,

³⁸ angwe: Zumbe atogolwe mweiza mwe zina ja Zumbe! Mwe lwingu ni utondolo, hata utana u kuja ulanga!

³⁹ Mafaliseyo kuṅwe we haṅwe na waja wantu wazamuti: Mfuzi, shunda wahina wako!

⁴⁰ Azawalandula angwe: Namiti: Awa wakileka lwashu, mawe yatakema.

Yesu aulilila muzi wa Yelusalemu.

⁴¹ Akibula hehi, akiolela muzingwa,

⁴² azaulilila angwe: Anga iwe nawe uzataila mishi inu vyekunka utondolo, miya lushe vizafishiγwa he mesho yako!

⁴³ Hambu mishi neiize, ndiho wankulu wako wakuzengele boma, jikudenganile, wakufinte koshe koshe,

⁴⁴ wakuchakule iwe na wanawo, uwona nawo, nkewaleke, iwe jikiandakana na ṅwiyae vivyoho, kwa kuti nkutaile mishi, ufilweho mbazi.

Yesu aγulusha weγuzanya mwe vikilongwa. 45-48.

⁴⁵ Azaingila mwe vikilongwa, azaandiila kuγulushawajaweγuzanyanawetaγizanyamuja,

⁴⁶ azawati: Kuigondiγwe: Nyumbayangu ni nyumba ya vikila! Miya inywi mzaiγalusha mpanga ya wampoko. Kila mushi azaikala mwe vikilongwa akifuza,

⁴⁷ miya wavikizi wakulu na watabaluwangwa na wafuṅwa wambalingwa wazamlondela lukomele, miya nkawaene sila;

⁴⁸ hambu wantu wosheni wazamtongelatongela, wamwive.