Luka 17 - Kishambala New Testament 2005

Miihiziize mibada.

¹ Azawati wahina wakwe: Nkavidahikana, vyeihiza wantu vikisheiza; miya yuja mweleka, vikiiza, akatafa!

² Ati agelwa mwe shingo nolo gima akitambikwa mwe bahali, vyamwagiza kuzinka viya vyeanduka aho, akiihiza awa wadodo ṅwiyae ywawe muṅwe du.

Ushilizanyai.

³ Kiγojeshei kwa mbuli yawe! Ati mnduγu ywako akubanila, mshunde! Ati ahitula ntongonyezi zakwe, vimwushilize!

⁴ Ati mushi muṅwe akubanila kamfungate, kangi akikutimila kamfungate akikuti: Navoteka, vimwushilize!

Tozeshai.

⁵ Ntuṅwa zizamγamba: Zumbe, tiγenyezeze mitozesheze!

⁶ Angwe ni Zumbe: Ati kitozesheze chenyu ni kidodo du sa kahuluzi kadashi, kangi mkiulonga unu msoso: Nofuka, ukitulize mwe bahali!, anga utamiitika.

⁷ Ati kwenyu muntu ana mupuna mwemlimila ao du mwemlishiza, yuja akiγotoka kwe ndima, atamγamba: Fikaiza, uikale, uje!?

⁸ Nkeamγambe: Liγanya, ndivyo nije lwa ṅwiyaγulo! Kikante, uniγoshwele ndima, mpaka nibinde kuja na kunywa! Nikibinda, nawe utadaha kuja na kunywa?

⁹ Yuja mupuna atamlaviliza ntogolo, kuti azaγoshola alaγiliziγwevyo?

¹⁰ Vivyoho hata inywi, mkiγoshola vyoshe mulaγiliziγwevyo, longai: Ti wapuna tishinawo ndima, tizaγoshola viya du vyetitala kuviγoshola!

Wakoma 10.

¹¹ Akihita Yelusalemu ṅwenye azadwisha shi za Samaliya na za Galileya gati.

¹² Akiingila mwe muzi, silai azakintana na waγoshi kumi, ni wakoma, waiγoloke hale.

¹³ Waja wazainula vyanwa vyawe angwe: Mfuzi Yesu! Tife mbazi!

¹⁴ Azawaolela, azawati: Hitai, mulawile wavikizi! Aho wakihita, ukoma uzauka.

¹⁵ Ṅwiyae ywawe muṅwe akiona, kuti azahona, azauya akimtogola Mulungu na kanwa kikulu,

¹⁶ azamkinila funi he milundi yakwe, amlavilize ntogolo. Kangi uyu ni Msamaliya.

¹⁷ Yesu azamlandula, azamuti: So kumi wahonilewo? Waja kenda wa kuhi?

¹⁸ Nkawaoneke watuhu wauzilewo, wamunke Mulungu ntogolo, kushima uyu mγeni du?

¹⁹ Azamuti: Inuka, uhite! Mitozesheze yako izakuhonya.

Uzumbe wa Mulungu ndivyo uize.

²⁰ Azauziγwa ni Mafaliseyo: Uzumbe wa Mulungu uiza lini? Azawalandula angwe: Uzumbe wa Mulungu ukiiza nkauoniγwa na mesho.

²¹ Wantu nkewalonge: Shunu!, ao: Shuuja! Hambu uzumbe wa Mulungu u gatigati kwenyu.

²² Azawati wahina wakwe: Kuna mishi, ndiyo iize, ne ndiho mwingilwe ni luzwi lwa kuona mushi muṅwe du wa ṅwanangwa ywa muntu, miya nkezemwuwone.

²³ Ne ndiho nezewamili: Shuyuja! Shuyu! Miya mshehite, mshewatongele!

²⁴ Hambu sa viyaho lumuli luvyolawa mwe lwingu uko cha uko lukimulikila vyoshevye kunucha kunu mwe lwingu, ne ndivyo ṅwanangwa ywa muntu atende uja mushi wakwe.

²⁵ Miya shuti anelumiziγwa vikulu, shuti anetowiγwa hulu ni inu mbali.

²⁶ Sa mbuli ziγendilevyo mwe mishi ya Nowa, ne ndivyo ziγende mwe mishi ya ṅwanangwa ywa muntu.

²⁷ Wazaja, wazanywa, wazateγula, wazateγulwa, mpaka uja mushi, Nowa akiingila mwe chiya kibweta, mlaho wa mazi ukigwa na kuwabinda woshe.

²⁸ Vivyoho mbuli zizaγenda mwe mishi ya Loti, wazaja, wazanywa, wazaγula, wazataγa, wazahanda, wazazenga;

²⁹ miya uja mushi Loti akilawa Sodoma, moto uzalawa mwe lwingu, uzagwa na mawe ya vibiliti, uzawabinda woshe.

³⁰ Ne ndivyo mbuli ziγende uja mushi, ṅwanangwa ywa muntu ahozalawila.

³¹ Mushi uja mweikala mwe nyumba yakwe ulanga, ati ntanu zakwe zi nyumbai, asheshindeingila kwa ziγuwa! Vivyoho mwe nkoi ashezauya na nyuma!

³² Fukilai mkaza Loti!

³³ Ndiye alonde, ndivyo akihonye, atazakiaza; kangi ndiye akiaze atazakihonya, aone nkalamo.

³⁴ Namiti: Chiya kilo waili wegona mwe lusazi lunwe muṅwe aiahokelwa, muṅwe ataashiγwa.

³⁵ Waili webunduγa haṅwe, muṅwe atahokelwa, muṅwe ataashiγwa.

³⁶ Waili we haṅwe nkoi muṅwe atahokelwa, muṅwe ataashiγwa.

³⁷ Wazamlandula aṅgwe: Kuhi, Zumbe? Azawati: Hena vundile ne ngwilizi zihokaungananilana.