Luka 16 - Kishambala New Testament 2005

Mγolokezi mubada ywa mali.

¹ Azalonga kwa wahina wakwe angwe: Ne kwina muntu mzuli mwena mγolokezi ywa mali, uyu azafyaliṅwa kwakwe, kuti abana mali yakwe.

² Azamwitanga, azamuti: Inu mbuli niikuiva zeze? Netitale vyoshe, ndivyo ukiγolokela! Hambu nkudaha kuγolokela mah yangu vivyoho.

³ Yuja mγolokezi ywa mali azafanyanya mwe moyo wakwe kuγamba: Nitende zeze? Hambu zumbe ywangu anihoka ufuṅwa wangu; kulima sidaha, kulombeza nina shoni nako.

⁴ Nataila, ndivyo niγoshole, kangwe, nikibushiγwa mwe ufuṅwa wangu, wanihokele mwe nyumba zawe.

⁵ Wadeni wa zumbe ywakwe azawaitanga woshe muṅwe muṅwe; ywa bosi azamγamba: Zumbe ywangu umkopilei?

⁶ Angwe: Ni matanaki gana ya mavuta. Yuja azamuti: Γuwa baluwa yako! Ikala, ufikegonda milongo mishano!

⁷ Vikibinda azalonga mluhu: Iwe nawe ukopilei? Angwe: Ni maguniya gana ya mshele. Azamuti: Γuwa baluwa yako, ugonde milongo mnane!

⁸ Zumbe azamlogola yuja mγolokezi muwiwi, kuti azaγoshola vya minyanyi; hambu wana wa inu shi wakiangilana mwe mbali yawe wenye na wenye ni wanyanyi kuzinka wana wa langaila.

Mali ya kiinushi.

⁹ Kangi imi namiti: Kiloṅdelel wambuya wenyu na kuinkila mali ya kiinushi, kuti ni ya uhuza, kangwe muhozakosa wamihokele mwe mafikilo yena ukalami!

¹⁰ Mwena utanda na viya viγeke, haia viya vingi ana utanda navyo; kangi mwena uhuza na viya viγeke, hata viya vingi ana uhuza navyo.

¹¹ Ati nkamtendile utanda na mali ya kiinushi ishiyo ya kweli, viya vya kweli ndiye aviminke, muviγolokele, ni ndai?

¹² Ati viya vishivyo vyenyu nkamtendile utanda navyo, viya vyenyu ndiye aviminke, muviγolokele, ni ndai?

¹³ Mwikala hangwa nkakuna mwedaha kutumikila wazumbe waili; hambu atashuka yuja muṅwe, akundishe yuja mtuhu; ao akianga na yuja ywa bosi, atamubela yuja mtuhu. Nkamdaha kumtumikila Mulungu, kangi mali ya kiinushi.

Mafaliseyo watamilwa ni mali.

¹⁴ Izi mbuli zoshe Mafaliseyo wetamilwa ni feza wazaziiva, ne wahomfyulila.

¹⁵ Azawati: Inywi ni nywiyo mwekikanila wenye kwa wantu, miya Mulungu ataila myoyo yenyu; hambu vyegimbikwa ni wantu vyamubuza Mulungu useli.

¹⁶ Mulomongwa na mbuli za wateγanyingwa zizabilikilwa mpaka mishi ya Yohana; kuandiila haja uzumbe wa Mulungu wabilikilwa, kangi kila, muntu aukundila kwa nguvu yakwe.

¹⁷ Ati lwingu na inu shi zabanika, ntoγo izo nkaziinga sa ziya, kagonde kaṅwe ka mulomongwa kakiaγa.

¹⁸ Kila mwelekana na muke akiγuwa mtuhu atenda kilanga, hata mweγuwa mvyele alekwaye ni mγoshi atenda kilanga.

Mzuli na mkiwa mweitangwa Lazalo.

¹⁹ Ne kwina mzuli, azazwika shuke za langi na halili, azaja ulembo kila mushi vitana ivyo.

²⁰ Kangi ne kwina mkiwa, zina jakwe ndiye Lazalo, ailele he kifiγwe cha yuja mzuli, aigisize vilonda.

²¹ Azakunda kuiγushiγwa ni mpuγutishi zegwa he meza ya yuja mzuli; hata makuli yazaiza kwa sona vilonda vyakwe.

²² Yuja mkiwa akifa azaiγalwa ni walau kwa Abulahamu, aambatwe ndiye; yuja mzuli yohena azafa, azazikwa.

²³ Uko kuzimu azainula mesho yakwe, hambu aswilimiziγwa, ne ahomwona Abulahamu uko hale na Lazalo, aiambatwe ndiye.

²⁴ Ṅwenye azakema lushe angwe: Tate Abulahamu! Nifa mbazi, umtume Lazalo, kangwe agele mpembo ya chala chakwe mwe mazi, aize, ayanidodeze mwe lulimi lwangu! Hambu naisa kulumiziγwa ni unu moto.

²⁵ Angwe ni Abulahamu: Ṅwanangu, fukila, kuti uzaja vitana vyako ukiikala uko shi! Kangi uyu Lazalo ne akija vibada. Lushe uyu ahembuliziγwa, miya iwe walumiziγwa.

²⁶ Kangi kushima viya vyoshe, aha gati na gati kwetu na kwenyu kwiatile lwatu lukulu, kangwe wekunda kusheela na uko kwenyu washedahe, vivyoho we uko kwenyu washedahe kuomboka na kwetu.

²⁷ Angwe: Lushe nakuhembeleza, tate, umtume yuja mwe nyumba ya tate!

²⁸ Hambu nina wenetu washano; awaγambile uwona, kangwe wohe washezaiza na aha hantu ha kulumiziγwa.

²⁹ Angwe ni Abulahamu: Wana Mose na wateγanyingwa, newawaive!

³⁰ Angwe: Do, tate Abulahamu, miya muntu mwelawa kwa wafilewo akibula kwawe, watahitula ntongonyezi zawe.

³¹ Azamuli: Ati Mose na wateγanyingwa nkawawaiva, hata muntu akifufuka kwa wafilewo nkewavoteke.