Luka 15 - Kishambala New Testament 2005

Lushimo lwa ngoto iaγileyo.

¹ Wangelu na wahuza woshe wazamtimila, wamteγeleze.

² Mafaliseyo na watabaluwangwa wazaṅuna angwe:

³ Uyu ahokela wahuza, aja nkande nawo. Azawalonga ulu lushimo angwe:

⁴ Kwenyu kuna muntu mwena ngoto gana akiaza ṅwenga, asheashe ziya milongo kenda na kenda tundui, akihita kwa londa ija iaγileyo, mpaka akiiona?

⁵ Akiiona aiika mwe maeγa yakwe na nyemi;

⁶ akibula kaya aitanga wambuyae na weyae, awoikala nawo, awati: Tamilwai haṅwe na imi! Hambu nizaona ngoto yangu iaγileyo.

⁷ Namiti: Vivyoho kwa mbuli ya mhuza muṅwe mwehitula ntongonyezi zakwe kutagwa nyemi mwe lwingu yekula kuzinka nyemi yegwa kwa mbuli ya watanda milongo kenda na kenda washiwoagiziγwa ni kuhitula ntongonyezi zawe.

Mvyele mweaza shilingi.

⁸ Hambu kuna mvyele mwena shilingi kumi akiaza shilingi ṅwenga, ndiye ashekoleze taa na kuhaγila nyumba akilondeza na utanda, mpaka akiiona?

⁹ Akibinda kuiona aitanga wambuyae na weyae, awoikala nawo, awati: Tamilwai haṅwe na imi! Hambu nizaona shilingi yangu iaγileyo.

¹⁰ Namiti: Vivyoho nyemi itagwa kwa walau wa Mulungu kwa mbuli ya mhuza muṅwe mwehitula ntongonyezi zakwe.

Ṅwana aaγileye.

¹¹ Azalonga: Ne kwina muntu mwena wana waili.

¹² Yuja mdodo azamlonga ishe angwe: Tate, ninka fungu ja mali jenitaia! Yuja azawapangila kitende.

¹³ Mishi miγeke ikizinka, yuja mdodo azashunganya vyakwe vyoshe, azahita mwe shi ye hale, kuja ne abanileko mali yakwe na kuija kimumpa.

¹⁴ Yuja akiibinda yoshe, kuzagwa sala ndala mwe ija shi, yohe azaandiila kushowa vya ja.

¹⁵ Azahita, azatongelatongela ṅwenyezi ywa ija shi, yuja azamtuma kwe maγisa yakwe, alishe nguluwe.

¹⁶ Azakunda kumemeza ifu jakwe na yaja magoko, nguluwe ziyoja, miya nkakuna ayamunkileye.

¹⁷ Azakiuyiya ṅwenye angwe: Wandima wa tate wana nkande, ni nyingi, kangi ni wangi ivyoho! Lushe imi nafa sala kunu!

¹⁸ Niinuke, nihite kwa tate, nimγambe: Nizakola masa mwe lwingu na kwako.

¹⁹ Nkaviniagiza, nikiitangwa ṅwanawo vivyoho, leka, niγaluke viya ni mndima ywako!

²⁰ Azainuka azahita kwa ishe. Ake hale, ishe azamwona, azabulwa ni utungu naye, azamγulukila, azamkinila mwe shingo, azafyosana naye milomo.

²¹ Miya yuja ṅwana azamuti: Tate, nizakola masa mwe lwingu na kwako, nkaviniagiza, nikiitangwa ṅwanawo vivyoho.

²² Miya ishe azalonga wapuna wakwe angwe: Fikaileta shuke zezinka zoshe utana, mumzwike! Kangi mumgele mpete mwe chala chakwe na vilatu mwe milundi yakwe!

²³ Vikibinda letei ndama yegimbala, mwikome, tije, titamilwe!

²⁴ Hambu uyu ṅwanangu ne aifile, miya ateuya moyo, ne aiaγile, miya aleoneka. Wazaandiila kuja nyemi.

²⁵ Miya ṅwanae mkulu ne ai nkoi; akiiza, akibula hehi na kaya azaiva ngoma na mawila.

²⁶ Azaitanga mubwanga muṅwe, azamwuza, ati viya ni vyai.

²⁷ Yuja azamuti: Nduγuyo azaiza, isho azakoma ija ndama yegimbala, kwa kuti azamwinkwa, ni mgima.

²⁸ Azakwelwa ni maya, nkakundile kuingila; miya ishe azalawa, azamhembeleza.

²⁹ Miya yuja azamlandula ishe angwe: Olela! Mavuli yeinga aha nakuγoshweia ndima, nkakuna mlaγilizo wako, nizinkanewo nawo, kangi nkwaninkile kabuzi, nikija nyemi na wambuyangu.

³⁰ Miya uyu ṅwanawo abindileye mali yako na wandele wahuza akiiza, uzamkomela ija ndama yegimbala.

³¹ Ishe azamuti: Ṅwanangu, iwe mishi yoshe u haṅwe na imi, kangi vyangu vyoshe ni vyako.

³² Vyakuagiza kuja nyemi na kutamilwa, hambu uyu nduγuyo ne aifile, miya ateuya moyo, ne aiaγile, miya ateoneka.