Filemoni 1 - Kishambala New Testament 2005

Paulo amlongela Onesimo.

¹ Imi Paulo nishungiγweye kwa mbuli ya Kilisito Yesu na mnduγu Timoteyo tamigondela baluwa iwe Filemoni, tiyekukundisha, kuti u mndima ṅweshu,

² na iwe mnduγu ywetu Apiya na iwe mnkondo ṅweshu Alikipo na bumba joshe je mwe nyumba yako.

³ Mbazi imiikaile na mpeho yeanduka kwa Mulungu, Tate yweshu, na kwa Zumbe ywetu Yesu Kilisito!

⁴ Namlaviliza Mulungu ywangu ntogolo nihokakufukila nikivika,

⁵ hambu nizaiva, uvyomkundisha na kumtozesha Zumbe Yesu na waṅazi woshe.

⁶ Nakuhembelezeza, mitozesheze yako itinkileyo mwangilano itende nguvu kwa viya, uvyotaila kuti: Vitana vyoshe, muvyona navyo, vyamiagiza kuvimwuziza Kilisito.

⁷ Kwa mbuli ya lukundisho lwako tizaona nyemi nkulu, myoyo izatishangalala vitana, hambu myoyo ya waṅazi izatamilwa ni weyo, mnduγu.

⁸ Kwa ivyoho hata niishungulwe ni Kilisito, nikulaγilize viya vyekutala,

⁹ miya kwa mbuli ya luja lukundisho nakunda kukuhembeleza du, hambu imi Paulo ivi nivyo mdala, kangi ivi lushe niishungiγwe kwa mbuli ya Kilisito Yesu.

¹⁰ Nakuhembeleza kwa mbuli ya ṅwanangu Onesimo, nimvyeleye niishungiγwe;

¹¹ kale ne ashikuzifiza mbuli, miya ivi lushe atizifiza iwe na imi.

¹² Namwuza na kwako lushe, viya nitekimka moyo Wangu ṅwenye.

¹³ Nizakunda kumtoza kunu kwangu, akuγoshwele ndima ya kimitumikila umu mwe chumba, nigezilwemo kwa mbuli ya ulaungwa;

¹⁴ miya sikundile kuviγoshola, uishiivane navyo, kangwe mbaziyako ishelawile kwa ntoγo, miya kwa kutakunda ṅwenye.

¹⁵ Hangi ne vilekikilevyo, akinaushiγwa kwako hadodo ani, kangwe uikale naye kale na kale.

¹⁶ Kangi lushe so viya ni mtuṅwa ywako, miyaviya ana kima kuzinka mtuṅwa, hambu ni mnduγu mweagiza kukundishiγwa; imi namkundisha, ne ndivyovileke, iwe ukiisa kumkundisha kimuntu, hata Kilisito.

¹⁷ Ati imi wanitala, kuti ni ṅwiyawo, umhokele, viya ni miyo ṅwenye!

¹⁸ Ati ana akubanilevyo, ao du ati ana deni kwako, uvinitalile imi!

¹⁹ Imi Paulo, ivi nivigondile na mkono wangu ṅwenye, imi nenikulihe; senikulonge kuti: Iwe ṅwenye u mdeni ywangu.

²⁰ Kweli, mnduγu ywangu, nakunda kuambiziγwa ni weyo kwa mbuli ya Zumbe, utamile moyo wangu kwa mbuli ya Kilisito.

²¹ Nakualila, kuti waitika, ne vilekilevyo, nikikugondela, kangi nataila kuti: Utaγoshola kuzinka viya, nivyolonga.

²² Vikibinda niliγanyiza fikilo! Hambu ichi kialilo nina nacho kuti: Kwa viya muvyonihembelezeza mtazaniinkwa.

²³ Waluγushiγwa ni Epafula ashungiγweye haṅwe na imi kwa mbuli ya Kilisito Yesu na

²⁴ Maliko na Alisitaliko na Dema na Luka, wandima weyangu.

²⁵ Mbazi ya Zumbe Yesu Kilisito iikaile mpeho zenyu! Amini.