3. Yohana 1 - Kishambala New Testament 2005

Tulo.

¹ Imi mγolokezi namgondela mbuyangu Gayo baluwa, niyemkundisha kweli.

Yohana amlombeza Gayo ahokele Wakilisito, azile wabada.

² Mbuyangu, nakundisha kuzinka, uikale vitana na ugima, sa moyo wako uvyoikala vitana.

³ Nizatamilishiγwa, wanduγu wakiiza, wakitogola kweli yako, sa uvyoanga na kweli.

⁴ Sina nyemi yezinka inu, niyoona nikiiva, kuti wanangu waanga na kweli.

⁵ Mbuyangu, ni vitana viya, uvyoγoshwela wanduγu, hata ni waγeni;

⁶ wazatogwela mabumbangwa kweli yako; ukikunda kubontola vitana vyako, utawaelekeza, sa vivyoagiza wantungwa wa Mulungu.

⁷ Hambu waihitile iyo ntambo kwa mbuli ya zinangwa, nkawana waγwilevyo kwa wamzimu.

⁸ Ishwi vyatitala kuwafikiza we ivyoho, kangwe bata ishwi tiiγoshwele ija mbulingwa ya kweli ndima.

⁹ Nizagonda mbuli kwe bumbangwa, miya Diotelefe mwekunda kuγaluka ywa bosi nkatiiva.

¹⁰ Kwa inu mbuli nikizaiza nitamkumbusha mbuli zakwe, azoγoshola, akitishinga vibada, kangi nkahela haho du; ṅwenye nkafikiza wanduγu, vikibinda waja wekunda awafingiza, awaingata mwe bumbangwa.

¹¹ Mbuyangu, ushetongele vyeiha, utongele vyeziha! Mwezifya mbuli zakwe aanduka kwa Mulungu, mweifya mbuli zakwe nkamwene Mulungu.

¹² Demetiliyo atogolwa ni wantu woshe, kangi atogolwa kweli, hata ishwi tavilongela uwona, kangi wataila, kuti uwona wetu ni wa kweli.

Tulo.

¹³ Nina vingi vya kukugondela, miya sikunda kuvikugondela na wino na kalamu;

¹⁴ miya niyaalila, kuti nezenikuone kinyanyi, tidahetamwilana kanwa kwa kanwa.

¹⁵ Mpeho na iwe! Weyawo wakuluγusha, iwe uawe tiluγushize kwa weshu ukiwalanga mazina!