2. Wakolinto 8 - Kishambala New Testament 2005

Wakolinto washanguzanye wakiambiza Wayelusalemu.

¹ Tamiukwila, wanduγu, mbazi ya Mulungu, mabumba ya Makedoniya yafilweyo.

² Hambu wazadaha kuvota miγezo iwaonyizeyo lulali lungi, lushe nyemi yawe ikiisiiza izaleka, ukiwa wawe ukulu muno umanyishe uzuli wa viyuγo vya myoyo yawe.

³ Nawalongela uwona kuti: Wenye wazatamilwa kushanguza kwa viya wavyodaha, kangi wazazisa; wakibinda wazatihembelezesha,

⁴ tiwafe inu mbazi kuwakundiza, wohe watumikile waṅazingwa na kuwapangila vyawe.

⁵ Kangi nkawatendile du, sa ndivyo tikialila, miya bosi wazanakiinkila wenye na kwa Zumbe na kwa ishwi; ne wabontolevyo Mulungu avyokunda.

⁶ Ne vyeleka, tikidaha kumhimila Tito, abontoleze hata kwenyu inu ndima ya mbazi, sa viya aandiilevyo.

⁷ Lushe inywi sa muvyokihima na mbuli zoshe, ati ni kutozesha, ati ni kubilikila, ati ni kulonda viyuγo, ati ni kutimila vitana vyoshe vituhu, ati ni kutikundisha, vivyoho kihimei na izi mbazi zohe!

⁸ Silonga ivyoho viya nitamikundila kwa nguvu, miya kwa viya, wenyu watuhu wavyokihima, nakunda kulesa lukundisho lwenyu, kuti ni lwa kweli.

⁹ Hambu mwataila izo mbazi zionekezo kwa Zumbe ywenyu Yesu Kilisito: Uyu ne al mzuli, miya azamiγalukila mkiwa, kangwe inywi mγaluke wazuli kwa nguvu ya ukiwa wakwe.

¹⁰ Nivyoona mwe inu mbuli namilaviliza: Yamiagiza, hambu jiya vuli ja zuzi mzalongola, so haho du mkiiγoshola, miya hata haho mkiandiila kuikunda;

¹¹ lushe ibontolezei na kuiγoshola, kangwe viya, muvyoitikila inu mbuli na kutamilwa ndiyo, viivane na viya, muvyobontoleza na kushanguza kwa viya muvyona navyo!

¹² Hambu ati kuja kutamilwa ku haho, lushe muntu akitamya kwaweyae naviya, avyona navyo, so na viya, ashinavyo navyo.

¹³ Hambu so ivyoho kuti: Watuhu waja mpolele, mkipishiγwa inywi; miya kangwe viliγanane:

¹⁴ Ulozo wenyu wa ivi lushe uushe ukosi wa waja; vituhu ulozo wawe nezeuushe ukosi wenyu, ne ndivyo viliγanane.

¹⁵ Sa vigondiγwevyo: Aoneleye vingi nkaγenyeze, kangi aoneleye viγeke nkakosize.

Mhokelei Tito na weyae.

¹⁶ Miya Mulungu atogolwe alekileye, hata Tito akikihima ivyoho kwa mbuli ya inywi!

¹⁷ Hambu ishwi tikimhimila, azakunda; miya kwa kuti ṅwenye aisa kukihima, ṅwenye azahita kwa milawila.

¹⁸ Tizatuma haṅwe naye mnduγu mwetogolwa ni mabumba yoshe kwa mibilikile yakwe yedi, kangi so ivyoho du,

¹⁹ miya azagimbikwa ni mabumba, aange na ishwi mwe inu ndima ya mbazi yetumikilwa ni shwiyo, timtogole Zumbe, kangi wenye tikishangalaze nayo.

²⁰ Ivyoho ne livyofingiza, muntu ashetishinge vibada kwa iji shanguzo kulu jeiγalwa ni shwiyo.

²¹ Hambu taolelesha, mbuli zoshe ziγende na utanda, so kwa Zumbe du, miya hata kwa wantu.

²² Uyu mnduγu ywetu tizamtuma haṅwe na ṅwiyae na kwenyu, hambu tizamwona kangi muno na mbuli nyingi, avyokihima, miya ivi lushe aisa kukihima kwa viya avyomialilisha.

²³ Tito mwamtaila kuti: Ni ṅwiyangu mweniambiza ndima kwenyu; awa wanduγu wetu watetuṅwa ni mabumba, kwa kuti wamgimbika Kilisito.

²⁴ Awa weshu waonyeshei lukundisho lwenyu, tilokatogola, mabumba yoshe yalutaile!