2. Wakolinto 6 - Kishambala New Testament 2005

Kutumikila kwa Paulo kulivyo.

¹ Kwa kuti taambizanya na inywi, tamihimila, kangwe mshefilwe mbazi ya Mulungu bule.

² Hambu ne avyolonga: Nizakuiva mushi mtana, mushi wa uvunizi nizakuambiza. Olela, mushi mtana ni ivi lushe, kangi mushi wa uvunizi ni lelo.

³ Nkatimwihiza muntu na mbuli, kangwe mitumikile yetu ishebelwe.

⁴ Miya mwe mbuli zoshe takilesa kuti: Tiyamtumikila Mulungu, hambu tiyazizimiza vingi: Ukiwa, nkondo, lusoyoyo,

⁵ ngoda, chumba, kiva, muku, kugonyiγwa mesho, kushowa nkande.

⁶ Tiyalonda uṅazi, viyuγo, uhozu, utana, mpeho ṅazi, lukundisho lwe kishiulongo, mbuli ye kweli, nguvu ya Mulungu;

⁷ tiyavota na mata ya utanda kulume na kumosho. Ati tagimbikwa, ati tabelwa;

⁸ ati tashingwa, ati tatogolwa viya ti waazayanyi, kangi ti wakweli;

⁹ viya nkatitailwe, kangi tiitailikike; viya titefa, kangi shivyo ti moyo, viya titeshundwa, kangi nkatikoṅwa;

¹⁰ viya titeihiziγwa, kangi vyosheni tina nyemi navyo; viya ti wakiwa, kangi liyaγalusha wangi wazuli, viya nkatina kintu hata, kangi vyoshe tina navyo. Inywi Wakolinto!

¹¹ Vyanwa vyetu vizamizuγukikila, kangi myoyo yetu yamiangalamukila;

¹² ishwi nkatimiikila hafinyu, miya inywi myoyo izatiikila hafinyu.

¹³ Lushe ndivyo muniuzize, namilonga, viya mu wanangu, shivyo: Inywi nenywi angalamukai myoyo!

Upuna ubada.

¹⁴ Mshekigele mwe upuna wa mtuhu haṅwe na waja washiwotozesha! Hambu utanda una mwangilano ani na uhuza? Hambu langaila jina mwangilano ani na lwiza?

¹⁵ Kilisito na Mzuka wana mwivano ani? Mwetozesha na ashiyetozesha wapangilana fungu ani? Vikilo ja Mulungu jifanana zeze na fika?

¹⁶ Kangi ishwi ti vikilo ja Mulungu mwe moyo, sa Mulungu alongilevyo: Nezeniikale mwawe, niangilane nawo, nezeniwaγalukile Mulungu ywawe, wohe nezewaniγalukile mbali yangu.

¹⁷ Kwa inu mbuli ukai gati mwawe, mulekane nawo! Ne Zumbe avyolonga, kangwe mshedowe vye kisitama, ne ndivyo nimihokele mwangu,

¹⁸ nimiγalukile tate, inywi nenywi muniγalukile wanangu wa kiγoshi na wa kivyele, ne avyolonga Zumbe mwena nguvu zoshe.