2. Wakolinto 4 - Kishambala New Testament 2005

Utuṅwa wetu ulivyo.

¹ Kwa kuti tina unu uγolokezi, sa tivyofilwa mbazi, ishwi neshwi nkativotwa,

² miya mbuli zena shoni zekafishiγwa tizazitowa hulu, nkatianga na minyanyi, nkatibana mbuli ya Mulungu, miya tikilaviliza mbuli ze kweli tabunkula wenye myoyo yetu, itailwe ni moyo wa kila muntu mweanga na Mulungu.

³ Ati ulau wetu wohe uifishiγwe, ufishiliziγwe waja weaγa;

⁴ hambu Mulungu ywa inu shi azachusha myoyo ya waja washiwotozesha, kangwe washemuhilikilwe ni langaila jelawa kwe uja ulau wedi wa Kilisito mwefahana na Mulungu.

⁵ Hambu nkatibilikila mbuli yetu, miya tibilikila kuti: Kilisito Yesu ni Zumbe, kangi ishwi ti watuṅwa wenye kwa mbuli ya Yesu.

⁶ Hambu Mulungu alongileye: Hena lwiza hapwinkuke langaila!, ne apwinkuleye myoyo yetu, kangwe timulikile waja washiwotaila utana wa Mulungu ulawilewo kwa Kilisito.

Talumila, kangi takalama.

⁷ Miya ichi kitende tichona nacho, chi mwe madonga ya ulongo, kangwe izo nguvu nyingi, ndizo zioneke mumo, zimanyike kuti: Ni za Mulungu, kuti: Nkazianduka kwetu.

⁸ Tiyakaona lulali koshe koshe, miya nkatiwewa, tiyakakilwa, miya nkatileṅwa,

⁹ tiyakaγulushiγwa, miya nkatiashiγwa ike, tiyakakinyiγwa, miya nkatibanika.

¹⁰ Koshe koshe tamanyisha mikomelwe ya Yesu mwe mili yetu, kangwe hata nkalamo ya Yesu itailikane mwe mili yetu.

¹¹ Hambu ishwi te moyo tainkiliziγwa kwa kifa mishi yoshe kwa mbuli ya Yesu, kangwe nkalamo ya Yesu itailikane mwe mili yetu yebanika.

¹² Kwa ivyoho kifa chatenda nguvu kwetu, miya nkalamo kwenyu.

¹³ Miya kwa kuti hata ishwi tatozesha, sa vyaho vigondiγwevyo: Niitozeshe, ne vyeleka nikitoga, vivyoho hata ishwi tatozesha, nevyeleka tikilonga;

¹⁴ hambu tataila: Ndiye akimwinula Zumbe Yesu atazatiinula ishwi neshwi haṅwe na Yesu na kutiikaza haṅwenainywi.

¹⁵ Hambu vyoshe tiviγoshola kwa mbuli ya inywi, kangwe sa waja wefilwa mbazi wavyoγenela, vivyoho awa wangi wakuze utana wa Mulungu na kuutogola.

¹⁶ Kwa inu mbuli nkatileka kubilikila; hambu hata miliyetu ikishakala, kangi myoyo yetu yauziγwa uhya mushi kwa mushi,

¹⁷ hambu ukiwa welu wa ivi lushe wefikazinka waisiiza kutiγenyezeza utana ungi muno wekalama,

¹⁸ tikisheolela viya vyeoniγwa, miya Ukiolela viya vishioniγwavyo; hambu vyeoniγwa ni vya ivi lushe du, miya vishioniγwavyo ni vya kale na kale.