2. Wakolinto 3 - Kishambala New Testament 2005

Wakolinto ni baluwa yemtogola Paulo.

¹ Titaandiila lushe kukitogola wenye? Ha mbu ishwi taagiziγwa sa watuhu ni kumiiγaila ao du ni kuinkwa ni nywiyo baluwa zetitogola?

² Inywi wenye mu baluwa yetu igondiγweyo mwe myoyo yetu, yatailwa, kangi yafyomiγwa ni wantu woshe.

³ Vyamanyika, kuti inywi mu baluwangwa ya Kilisito iliγanyiγweyo ni shwiyo, nkaigondiγwe na wino, igondiγwe na mpebo ya Mulungu mwe moyo, kangi nkaigondiγwe mwe vibala vya mawe, miya mwe vibala vya myoyo ya wantu.

⁴ Kilisito ne mweleka, tikialila ivyoho kwa Mulungu.

⁵ So kwa kuti ishwi wenye tadaha kufanyanya mbuli, viya ni yetu; ati tavidaha, titevionyeshiγwa ni Mulungu.

Utanda wa kilaγa cha kale na wa kilaγa kihya.

⁶ Uyu Mulungu azatiγalusha waluγojo wedi wa kilaγa kihya; ichi so cha ugonde, ni cha kimpeho, hambu ugonde wakoma, miya vya kimpeho vyainka nkalamo.

⁷ Kangi uja uγolokezi wa viya vyekoma vigondiγwevyo na kusononwa mwe mawe, ne wina utana, ne ulekilewo, wana Isilayeli wakishedaha kuolela cheni cha Mose kwa utana wa cheni chakwe, kangi uja utana wabanika.

⁸ Lushe nγolokezi wa viya vya kimpeho usheisiize utana?

⁹ Hambu uγolokezi wa viya vyehosa ukitenda utana, nγolokezi wa viya vya utanda utaisiiza kutenda utana.

¹⁰ Hambu viya vyena utana uko ukivifanyanya na unu utana weisiiza, utaγamba:

¹¹ Viya nkavina utana; hambu vyebanika vikitenda utana, vyekalama vitaisiiza kutenda utana.

Utana wetu.

¹² Kwa kuti tina ichi kialilo, mitunilwe yetu ni mingi.

¹³ Nkatiγoshola sa Mose, ndiye akiγubika cheni chakwe, kangwe wana Isilayeli washeolele bindilizo ja viya vyebanika;

¹⁴ miya myoyo yawe izatoγeshiγwa; hambu hata inu mishi ya lelo wakifyoma chiya kitabu cha kale, chiiγubikwe vivyoho, nkachiγubulwe, kwa kuti chifumbulwa ni Kilisito ike.

¹⁵ Miya mpaka lelo mbuli zoshe za Mose zikifyomiγwa, myoyo yawe iiγubikwe.

¹⁶ Miya aho ndiho wahitukile kwa Zumbe, ne ndiho viya vyeleka, wakishetaila, viushiγwe.

¹⁷ Hambu Zumbe ni mpeho, kangi mpeho ya Zumbe iliho, ne vyoshe vihoshungulwa.

¹⁸ Miya ishwi toshe teona utana wa Zumbe na mesho yetu yashiγubikweyo, taγalamushiγwa, tifanane naye, tikiinkwa utana kwa utana, viya titeγalamushiγwa ni Zumbe ṅwenye mwe mpeho.