2. Wakolinto 10 - Kishambala New Testament 2005

Paulo alonga nguvu yakwe.

¹ Namishunda na uhozu na uzizimizi wa Kilisito, imi Paulo ṅwenye nekaγaluka mnyonge kwenyu nikimiona, nekamihimbila nii hale!

² Namihembeleza, mshenikundile iyo nguvu, nikizaiza kwenyu! Hambu ṅwenye nafanyanya kuwaγendela na ukali waja waγeke wetifanyanyiza, kuti tianga kiinushi.

³ Kweli tianga kunu shi, kangi nkatihita nkondo kiinushi.

⁴ Hambu mata yetu ya nkondo so ya kiinushi, yana nguvu ya Kimulungu, yadaha kuchakula vidala,

⁵ ati ni kubunkula ntongonyezi na mahiku yoshe yeinukila utalizi wa Mulungu, ati ni kutaha fanyanyi zoshe, zimwitike Kilisito.

⁶ Kangi tiikiteγile kulahiza upapala woshe aho, ndiho mubontole kuitika.

Paulo alahana na waja wemshinga.

⁷ Vyeoniγwa ni mesho violelei! Ati kuna mwealila kuti: Ṅwenye ni ywa Kilisito, afanyanye inu mbuli mwe moyo wakwe kuti: Sa ṅwenye avyo ywa Kilisito, vivyoho hata ishwi.

⁸ Ufuṅwa wetu, Zumbe atinkilewo, limizenge, tishemichakule, hata nikiisa kuutogola sezenibunkuke kuti: Ni mulongo.

⁹ Nishefanane, viya nitemigela woγa na baluwa du.

¹⁰ Hana wenishinga kuγamba: Baluwa zakwe ni ndala, zina nguvu, miya ṅwenye akiiza ni mnyonge, kangi mbuli yakwe yabeleka.

¹¹ Mwelonga ivyoho afanyanye kuti: Tivyolonga na baluwa tii hale, ne tivyobontola tii haho!

¹² Hambu ishwi nkatikunda kukitala ao kukiika haṅwe na waja wekitogola wenye; wakihima na mbuli zawe wenye, kangi wakifanyanyiza wenye, ne vyeleka, wakishetaila mbuli.

¹³ Miya ishwi nketizise kukitogola, miya tiyaγoja mhaka, Mulungu atishengelewo; ivyoho ne tibuzilevyo hata kwenyu.

¹⁴ Hambu nkatishindanwehela wenye viya titashemibuliza, hambu ishwi ne tiandiilewo kuleta ulaungwa wedi wa Kilisito mpaka kwenyu.

¹⁵ Ishwi nkatibadika tikikitogola na muku, watuhu waeneyo; miya mitozesheze yenyu ikikula kwenyu, tiyaalila kuti: Ivyoho nezetiisiize kutenda nguvu mwe mihaka yetu.

¹⁶ Ivyoho hata waja washiwoikala mwe mihaka yenyu titabuliza kuwabilikila na kushelonda ntogolo mwe shi ngeni yebinda kubilikilwa.

¹⁷ Miya mwekitogola akitogole, kuti ana Zumbe!

¹⁸ Hambu yuja mwekitogola ṅwenye siye, miya yuja mwetogolwa ni Zumbe ndiye.