2. Timoteyo 4 - Kishambala New Testament 2005

Bilikila mbulingwa na kuomana nkondo ntana.

¹ Mulungu na Kilisito Yesu mweunga kulawila, alahe we moyo na wafilewo, ni waona wangu, nikikulaγiliza: Kwa viya avyokunda kuzalawila, ashimike uzumbe wakwe,

² bilikila mbulingwa, uiγolokele, ati mishi ni mitana, ati ni mibada, ubunkule wahuza, uwavaile, uwashunde na uhozu woshe haṅwe na kuwafuza!

³ Hambu hana, ndiho nezewashwikile mifuzize yeinka ugima; kwa viya, wavyolongela tamaa zawe, watazakilondela wafuzi wangi, sa mashikilo yawe ndivyo yatamilwe.

⁴ Viya vye kweli watalemela kuviteγeleza, viya vya ushimolezi wa bule watavitimila.

⁵ Miya iwe nyinyihala mwe mbuli zoshe, uzizimize vibada, uγoshole ndima ya mubilikizi, ndimangwa uinkiγweyo uibontoleze!

⁶ Hambu imi nizabulizwa lushe kuγalushwa ṅombe ya mviko, mushi wangu wa kushungulwa u hehi.

⁷ Nizaomana nkondo ntana, nizabontoleza mhotwe, nizatozesha mbulingwa.

⁸ Nishiγazevyo ni kuinkwa linga jetala watanda, niikilwejo. Mushi uja Zumbe mwelaha na ulanda atazajininka, miya si miyo du, ni woshe ndiwo wakialila kulawila kwakwe.

Paulo amlaγiliza Timoteyo mbuli zakwe.

^9-10 Kihime, ufikeiza na kwangu! Dema azamasha, azakundisha inu shi, azahita Tesalonike; Kelesike azahita Galatiya, Tito azahila Dalimatiya.

¹¹ Luka ne niyena naye ike. Maliko umγuwe, uize naye! Hambu anitumikila vitana.

¹² Tikiko nizaintuma Efeso.

¹³ Ali wabula Tilowa, ulete guni jangu, niashizejo kwa Kalipo, hata vitabu, nivyokundisha, ni viya vye njivo.

¹⁴ Alekisando, yuja mshilaγi, azaniγoshwela vibada vingi, Zumbe atazamwuziza inu miγoshwele yakwe. Iwe nawe umγoje!

¹⁵ Hambu azakeleza mbuli zetu nkani kabisa.

¹⁶ Aho nikilahwa bosi bomani, nkakuna anikanileye, woshe wazaniasha; ne washetalwe inu mbuli!

¹⁷ Zumbe azaniγolokela, azaninka nguvu, kangwe ulaungwa ulongelwe uwona ni miyo, wamzimu wauive. Ne nizavunilwa mwe kanwa cha shimba.

¹⁸ Zumbe atanivunila mwe mbuli mbada zoshe, atanihonya, niingile mwe uzumbe wakwe wa kilwingu. Neatogolwe kale na kale! Amini.

Matulo.

¹⁹ Niluγushiza kwa Pulisika na Akila na kwa waja weikala mwe nyumba ya Onesifolo.

²⁰ Elasito azahumula Kolinto; Tilofimo nizamwasha Mileto, akihuma.

²¹ Kihime, uize, nyota ishizati ibule! Waluγushiγwa ni Oibulo na Pude na Lino na Kalaudiya na wanduγu woshe.

²² Zumbe aγolokele moyo wako! Mbazi imiikaile! Amini.