2. Timoteyo 3 - Kishambala New Testament 2005

Waazaγanyi wa mishi ya shilikiza.

¹ Miya taila kuti: Mishi ya shilikiza kutazaiza mishi ye ntoγo.

² Hambu wantu watakikundisha wenye, watatenda mumelo wa feza, watahikuka, watalonga mbuli za ntili na za lukanko, watalemela kuitika wavyazi, watashowa ntogolo, watamtowa Mulungu hulu,

³ nkawana lukundisho, nkawatemekwa, watatenda leha na luhala na ukali, watashwika vyetama, watatenda nkumba na usheiva,

⁴ watafuntuka, watakundisha nyemi ya kiinushi kumzinka Mulungu,

⁵ watakionyaonya, viya watamwitika Mulungu, miya nguvu yakwe wazaiikila nkani; we ivyoho uwatowe hulu!

⁶ Hambu weyae wawe ni waja wekaingila mwe nyumba za wantu wakiluvya wavyelengwa wezwamilwa ni mahuza yawe, wehimilwa ni kihelehele chingi muno,

⁷ wefuziγwa aho kale hoshe, washiwodaha kutaila na kubontola viya vye kweli.

⁸ Sa Yane na Yambule wamwikilevyo Mose nkani, vivyoho awa wohena waikila viya vye kweli nkani; ni wantu wena ntongonyezi zishizokombaγana, mitozesheze yawe iibimkuke, miya nkewaγese vyedi mbuli zawe,

⁹ hambu udashi wawe utakanyabunkuka, sa viyaho mbuli ya waja ibontokevyo. Vyetinka nguvu mwe milumilwe yoshe ni mbulingwa.

¹⁰ Miya iwe uzanitongela mihinyize na myangile na mitongonyezeze na mitozesheze na uhozu na mikundishize

¹¹ na mizizimizize na miγulushiziγwe na milumilwe, sa viya niγoshwelwevyo Antiyokiya na Ikoniyo na Lisitila. Nkondo zeinga haja nizazizizimiza, kangi mwe zoshe Zumbe azaiṅvunila.

¹² Woshe wekunda kuzifya myangile, kwa kuti ni wa Kilisito Yesu, newaingatwe.

¹³ Miya wantu wabada weazaγanyg weyae wawe wataγesa mbuli yawe na habada, hambu kwa viya wavyohosa, wohe watazakihosa.

¹⁴ Miya iwe ikala na viya ufuziγwevyo, uvyotaila kuti: Ni vya kweli! Kangi wataila wakufuzizewo.

¹⁵ Kwa kuti wataila ugonde uṅazi, viya ukuzilevyo uke mdodo, wadaha kukunka viyuγo, kangwe nezeuvunilwe, kuti wamtozesha Kilisito Yesu;

¹⁶ hambu uja ugonde woshe weanduka kwa mpeho ya Mulungu ni utana, watihinya, wativota,

¹⁷ watishangalaza, watishunda, titende ulanda, kangwe kila muntu ywa Mulungu aγaluke ywa kweli mwekihima mbuli ntana zoshe.