2. Timoteyo 2 - Kishambala New Testament 2005

Kunda kulumiziγwa na kugomba vyedi.

¹ Lushe iwe ṅwanangu, tenda nguvu kwa ziya mbazi, Kilisito azotifila!

² Viya uivilevyo kwangu, waona wangi wai haho, uviinkile kwa wantu wekoolela wedaha kuhinya hata watuhu!

³ Kunda kulumiziγwa haṅwe na ishwi, sa vivyomwagiza mnkondo mtanaywa Kilisito Yesu!

⁴ Muntu mwehita nkondo nkanakipisha mwe kulonda nkonde, kangwe amtamile yuja ṅwenye nkondo.

⁵ Muntu hata agombe nkondo, ati nkaigombile vitana, nkakantwa bundu.

⁶ Mulimi mweona lulali na kulima kwakwe vyaagiza, ṅwenye alimbule viya alozolevyo.

⁷ Teγeleza, nivyolongal Hambu Zumbe neakunke viyuγo mwe mbuli zoshe.

⁸ Mkumbuke Yesu Kilisito ainulweye kwa wafilewo, mweanduka mwe chengo cha Dawidi, niyebilikila mbuli zakwe!

⁹ Kwa inu mbuli nalumila, mpaka nikishungwa sa mhambanyi, miya mbulingwa ya Mulungu nkaishungwa.

¹⁰ Ne nihozizimiza vyoshe kwa mbuli ya waja washaγulwewo, kangwe nezewaonele wohena uja uhonya we mwe Kilisito Yesu na utana wa kale na kale.

¹¹ Inu mbuli ni ya kweli: Ati tizafa naye, tizakalama naye;

¹² ati tazizimiza, titazatoza uzumbe naye; ati tamtowa hulu, yohena atazatitowa hulu; ati tashemtozesha,

¹³ yuja ni mkweli vivyoho, hambu nkadsha kukitowa hulu ṅwenye.

Bilikila shikizi jedi.

¹⁴ Izi mbuli uziwakumbushe na kuwalonga uwona, Mulungu ai haho, washekanane! Hambu ni ndima ishinayo bontokelo, yachakula du bumba ja waja weteγeleza.

¹⁵ Kihime, umγalukile Mulungu mndima mwezifya, ashiyeγoshola vyegwiza shoni,

¹⁶ miya mweliγanyanya vitana mbuli ya kweli, miya mbuli mbada zishinazo bontokelo, ushezitongeletongele!

¹⁷ Hambu newaisiize kuγenyeza mbuli mbiwi, kangi mbuli yawe itagisa, viya ni ukoma, hata Himeneyo na Fileto ni weyae wawe,

¹⁸ hambu wazaazaγanya mbulingwa ye kweli wakiγamba: Ufufuki uzabinda kubontoka, ne wavyoazaγanya navyo hata kuṅwe wetozesha.

¹⁹ Miya shikizi, Mulungu aikilejo, jiitoγile vivyoho, lwitangilo lwakwe shulu: Zumbe ataila wantu wakwe; kangi: Kila mwelanga zina ja Zumbe atowe ubada woshe hulu!

²⁰ Mwe nyumba ya mzuli nkamna ntanu za zahabu du na za feza, miya hata za miti na za ulongo zi mumo, kuṅwe ni za luhambo, kuṅwe ni za mbuli ze shoni;

²¹ ati muntu azila waja wantu, ataγaluka ntanu ya luhambo iṅaziγweyo, ṅwenye avyokunda kutoza, yedaha ndima ntana zoshe.

Vyemtala mtuṅwa ywa Zumbe.

²² Uhalami wa kihwanga uunyilike, miya ntimile utanda na mtozesho na lukundishano na mwivano haṅwe na waja woshe wemkemela Zumbe na myoyo yeṅala!

²³ Miya mikanano ishinayo hontokelo usheikunde, uitaile kuti: Yakabanyanya wantu!

²⁴ Miya mtuṅwa ywa Zumbe nkavimwagiza kuifyana na weyae, shuti atende ukuwi na wantu woshe, adshewafuza, shuti atende uzizimizi,

²⁵ adaheshunda na uhozu waja wahishi, ati Mulungu akunda kuwainka luvotekele, wataile viya vye kweli,

²⁶ wanyinyihale vituhu wakikilavya mwe mteγo wa Satani, hambu waigwizilwe ndiye, wamγoshwele, ndivyo akunde.