2. Timoteyo 1 - Kishambala New Testament 2005

Tulo.

¹ Imi Paulo ni ntuṅwa ya Kilisito Yesu kwa viya, Mulungu akundilevyo kwa mbuli ya msuhi wa nkalamo ye mwe Kilisito Yesu.

² Nakugondela baluwa iwe, ṅwanangu Timoteyo, niyekukundisha; mbazi ikuikaile na utungu na mpeho yeanduka kwa Mulungu Tate na kwa Zumbe ywetu Kilisito Yesu!

Ntogolo.

³ Namtogola Mulungu, niyemtumikila na moyo weṅala sa watate wangu; kangi sidila kukufukila nihokavika kilo na mushi;

⁴ hambu nikikumbuka meshozi yako, nina luzwi lwa kukuona, kangwe nyemi yangu ikule.

⁵ Natonga vivyoho mitozesheze ija ishinayo ulongo, ndiyo iina weyako Loyi bosi, vikibinda hata nyokwe Oinike, miya naalila kuti: Hata iwe una nayo.

Longa uwona wa mbazi.

⁶ Ne vyeleka, nikikukumbusha, ufufule chiya cha mbazi ya Mulungu, uinkiγwecho haja, nikikubadikila mikono!

⁷ Hambu Mulungu nkatinkile mpeho yetivivila, azatinka mpeho yetigela nguvu na lukundisho na viyuγo.

⁸ Lushe ushetendwe ni shoni za kumkanila Zumbe ywetu na imi nishungiγweye kwa mbuli yakwe, miya lumila na kuzizimiza kwa mbuli ya ulaungwa kwa nguvu ya Mulungu!

⁹ Hambu ne atibonyizeye, ne atiitangeye na mwitango mṅazi, so kwa kuti tizazifya ndima, miya kwa kuti ṅwenye azakunda ivyoho kwa mbazi; izo mbazi sho kale ṅwenye tizaziikilwa mwe Kilisito Yesu,

¹⁰ miya tizazizuγwilwa mishi inu, mhonya ywetu Kilisito Yesu akilawila; uyu azavota kifa, vikibinda azalavya nkalamo ishiyobanika, sa tivyobilikilwa.

¹¹ Ne nigimbikilwevyo mubilikizi na ntuṅwa na mfuzi.

¹² Kwa inu mbuli nalumiziγwa iviho, miya sitendwa ni shoni, hambu namtaila niyemtozesha, kangi ichi kialilo nina nacho kuti: Ana nguvu ya kuγolokela viya vyangu, mpaka ndiho uja mushingwa nezeukinte.

¹³ Mihinyize ya mbulingwa yeikaza, ni ija, uivileyo kwangu; tenda mitozesheze na mikundishize yeanduka kwa Kilisito Yesu!

¹⁴ Viya vitana uinkiγwevyo uviγolokele kwa nguvuya mpeho ṅaziyetiikaila!

Onesifolo

¹⁵ Wataila, kuti woshe weikala mwe shi ya Asiya wazaniasha, waja wakina Figelo na Hemogene.

¹⁶ Zumbe afile chengo cha Onesifolo mbazi! Hambu azanishangalaza kangi muno, nkatendiγwe ni ntoγo na mazolo yangu,

¹⁷ miya akibula kunu Loma, azakihima kunilonda, mpaka akiniona. Zumbe aleke, aonele mbazi kwa Zumbe mushi uja!

¹⁸ Ndima, aγosholezo uko Efeso, ṅwenye wazitaila kunizinka imi.