1. Yohana 5 - Kishambala New Testament 2005

Nguvu ya mitozesheze.

¹ Kila mwetozesha kuti: Yesu ni Kilisito, aivyelwe ni Mulungu, kangi kila mwemkundisha muvyazi ywakwe amkundisha hata ṅwiyae mwevyalwa ndiye.

² Kwa inu mbuli tataila, kuti lakundisha wana Mulungu, tikimkundisha Mulungu, tikiγoshola milaγilizo yakwe.

³ Hambu kumkundisha Mulungu ni kuitika milomo yakwe, kangi milomo yakwe nkaina ntoγo.

⁴ Vyoshe vivyelwevyo ni Mulungu vyavota inu shi; tivyovota navyo inu shi shivyo: Ni kutozesha kwetu.

⁵ Mwevota inu shi ni ndai, ati so yuja mwetozesha, kuti Yesu ni ṅwana Mulungu?

⁶ Uyu Yesu ne mweiza na mazi na mpome; nkaiza na mazi du, aiza na mazi na mpome; kangi mpehongwa ne yevilongela uwona, hambu ni mpeho ya kweli.

⁷ Hambu kuna watatu welonga uwona mwe lwingu: Tate na Mbulingwa na Mpeho mṅazi; kangi awa watatu ni muṅwe.

⁸ Vikibinda kuna watatu welonga uwona mwe shi: Mpehongwa na mazingwa na mpomengwa, kangi awa watatu waivana uwona.

⁹ Ati taitikila uwona wa wantu, uwona wa Mulungu ni ukulu kuuzinka, hambu uwona wa Mulungu ni uja, alongilewo kwa ṅwanae.

¹⁰ Mwemtozesha ṅwanangwa ywa Mulungu unu uwona ana nawo; miya ashiyetotozesha viya vya Mulungu amunka ulongo, hambu nkatozesha uwona, Mulungu alongilewo kwa mbuli ya ṅwanae.

¹¹ Uwo uwona shunu: Kuti Mulungu azatinka nkalamo ya kale na kale, kangi inu nkalamo ioneke mwe ṅwanae.

¹² Mwena uyu ṅwanae hata nkalamo ana nayo; ashinaye uyu ṅwana Mulungu, hata nkalamo nkana nayo.

¹³ Inywi mwetozesha zina ja ṅwana Mulungu niimigondele, kangwe mtaile, kuti nkalamo muna nayo.

Nguvu ya kulombeza kwetu.

¹⁴ Nyemi yetu, tiyona nayo, ni inu kuti: Ndivyo tilombeze kwa viya, avyokunda, atiiva.

¹⁵ Kangi tikitaila, kuti atiiva, ndivyo tilombeze, tiyataila kuti: Viya, ndivyo tikilombeza kwakwe, tizabinda kuviinkwa.

¹⁶ Muntu akimwona mnduγu ywakwe, akiγoshola uhuza ushiwokoma, amhembelezeze, ne ndivyo amunke nkalamo kwa waja, washiwoγoshola uhuza wekoma. Kuna uhuza wekoma; kwa mbuli ya unu silonga, amhembelezeze.

¹⁷ Upapala woshe ni uhuza, miya kuna uhuza ushikomawo.

¹⁸ Tataila kuti: Kila avyelweye ni Mulungu nkabana, miya avyelweye ni Mulungu akiγoja ṅwenye, mubada nkamdowa.

¹⁹ Tataila, kuti tianduka kwa Mulungu, miya inu shi ngima ni ya kubanika.

²⁰ Tataila kuti: Ṅwana Mulungu azaiza, azatinka lutwi, timtaile yuja mwe kweli. Kangi taanga na yuja mkweli na ṅwanae Yesu Kilisito. Uyu ni Mulungu mwe kweli na nkalamo ya kale na kale.

²¹ Wanangu, kiγojeshei kwa mbuli ya fika zishizoagiza! Amini.