1. Yohana 3 - Kishambala New Testament 2005

Wana Mulungu nkawabana.

¹ Olelai, Tate avyotikundisha, tikiitangwa wana Mulungu! Kangi ishwi ndiwo. Ne vyeleka, imi shi ikishetitaila, kwa kuti nkaimtaila yuja.

² Wanduγu, ivi lushe ti wanangwa wa Mulungu, kangi nkavizati vimanyike, ndivyo nezetiγalamuke; lalaila du kuti: Aho ndiho nezevimanyikile, titazafanana naye, hambu titamwona ṅwenye, alivyo.

³ Kila muntu mwena ichi kialilo naye akiṅaza kwa viya, yuja avyo mṅazi.

⁴ Kila mwetenda uhuza, hata upapala ana nawo, hambu uhuza ne upapala.

⁵ Kangi mwataila, kuti yuja azalawila, kangwe aushe uhuza, ṅwenye uhuza nkana nawo.

⁶ Kila mweanga naye nkabana; kila mwebana nkamwene, nkamtaile.

⁷ Wanduγu, kusheoneke mwemiazaγanya! Mweγoshola utanda ne mtanda kwa viya, yuja avyo mtanda.

⁸ Mweγoshola uhuza aanduka kwa Satani, hambu uyu Satani abana nko kivoko koshe. Ne Ṅwanangwa ywa Mulungu alawilevyo, kangwe achakule ndima za Satani.

⁹ Kila avyelweye ni Mulungu nkabana, hambu ichi Kimulungu chikimwikaila, nkadaha kubana, hambu avyelwe ni Mulungu.

¹⁰ Kwa inu mbuli wana Mulungu na wana Salani wabunkuka: Kila ashiyetenda utanda nkaanduka kwa Mulungu, hata yuja ashiyemkundisha mnduγu ywakwe.

Tikundishane.

¹¹ Unu ni ulau, mwivilewo uko kivoko koshe, tikiγangwa: Tikundishane wenye na wenye!

¹² Viya vya Kaini sivyo, azaanduka kwa yuja mubada, azamkoma nduγuye. Kangi amkomele mbuli ani? Kuti miγoshwele yakwe ni mibada, miya ya nduγuye ni ya utanda.

¹³ Wanduγu, mshemake, inu shi ikimishuka!

¹⁴ Tataila, kuti tizalawa he kifa, tizabula he nkalamo, hambu takundisha wanduγu, ashiyewakundisha ake mwe kifa.

¹⁵ Kila mwemshuka mnduγu ywakwe ni mkoma wantu, kangi mwataila, kuti kila mkoma wantu nkana nkalamo ya kale na kale, ndiyo aikaile.

¹⁶ Ne tihotaila Iukundisho, yuja akikiinkila ṅwenye kwa mbuli ya ishwi, vivyoho hata ishwi vyatiagiza kukiinkila kwa mbuli ya wanduγu wetu.

¹⁷ Ati muntu ana kitende cha inu shi, lushe akimwona mnduγu ywakwe, avyokosa, ati amzuγaila moyo wakwe, lukundisho lwa Mulungu lumwikaila zeze?

¹⁸ Wanduγu, tishekundishane ulongo du, lulimi du, miya tikundishane na kuambizanya kweli!

Tina nyemi kwa Mulungu.

¹⁹ Ne ndivyo titaile navyo, ati tianduka he ukweli, kangi ne ndivyo tidahe kuvota myoyo yetu uko kwakwe,

²⁰ ati myoyo yetu yakunda kutilaha kuti: Mulungu ni mkulu kuzinka myoyo yetu, kangi ataila vyoshe.

²¹ Wanduγu, ati myoyo yashetilaha, lina nyemi kwa Mulungu;

²² kangi ndivyo tilombeze, tiviinkwa ndiye, kwa kuti tatoza milaγilizo yakwe, taγoshola vyemtamila.

²³ Unu ni mlaγilizo wakwe, titozeshe zina ja ṅwanae Yesu Kilisito, tikundishane wenye na wenye, sa avyotilaγiliza.

²⁴ Mwetozesha milaγilizo yakwe, ne mweanga naye, vituhu yuja aanga na uyu. Kwa inu mbuli tataila, kuti aanga na ishwi, kwa mpeho yakwe atinkileyo.