1. Yohana 2 - Kishambala New Testament 2005

Yesu mulongezi ywetu.

¹ Wanduγu, ivi navimigondela, kangwe mshebane. Kangi ati kwaoneka mwebana, tina mulongezi kwa Tate, ni Yesu Kilisito mwena utanda.

² Uyu ni mpoza ya uhuza wetu, kangi so ya wetu du, hata ya uja wa ngulu ngima.

³ Kwa inu mbuli tataila, kuti tizamtaila, tikitozesha milaγilizo yakwe.

⁴ Muntu akiγamba kuti: Nizamtaila, kangi nkatozesha milomo yakwe, ni mulongo, kangi ukweli uyu muntu nkana nawo;

⁵ miya mwetozesha mbuli yakwe, uyu lukundisho lwa Mulungu lwamubontokela kweli. Na inu mbuli tataila, kuti tina naye.

⁶ Mweγamba, kuti aanga naye, vyamtala, shuti ṅwenye aange, sa yuja aangilevyo.

Mulomo muhya wa kukundishana.

⁷ Wanduγu, simigondela mulaγilizo muhya, ni uja wa kale hoshe, mwangilewo nawo uko kivoko koshe; unu mulaγilizo wa kale ni mbulingwa, mwivileyo kale hoshe.

⁸ Kangi namigondela mulaγilizo muhya, kweli yuja ana nawo, miya hata inywi, kuγamba: Lwiza lwaomboka, langaila je kweli jizaandiila kuaka.

⁹ Mweγamba, kuti aanga mwe langaila, kangi amshuka mnduγu ywakwe, ake mwe lwiza mpaka ivi lushe.

¹⁰ Mwemkundisha mnduγu ywakwe aikala mwe langaila, kangi lwihizo nkana nalo.

¹¹ Miya mwemshuka mnduγu ywakwe aikala mwe lwiza, aanga mwe lwiza, nkataila, akoonya nako, kwa kuti lwiza luzakoma mesho yakwe.

Titowe inu shi hulu.

¹² Namigondela inywi wana, kwa kuti mzaushiliziγwa uhuza na zina jakwe.

¹³ Namigondela inywi watate, kwa kuti muzamtaila yuja ywa kivoko; namigondela inywi wabwanga, kwa kuti muzamvota yuja mubada.

¹⁴ Nizamigondela inywi wana, kwa kuti muzamtaila Tate; nizamigondela inywi watate, kwa kuti muzamtaila yuja ywa kivoko, nizamigondela inywi wabwanga, kwa kuti mu wanguvu, kwa kuti mbulingwa ya Mulungu yaikala kwenyu, kwa kuti muzamvota yuja mubada.

¹⁵ Mshekundishe inu shi na viya vye mwe inu shi! Ali muntu akundisha inu shi, lukundisho lwa Tate nkana nalo;

¹⁶ hambu vyoshe vye mwe inu shi, uhalami wa mili, uhalami wa mesho, mahiku muntu ayoanga nayo, nkavianduka kwa Tate, vianduka mwe inu shi.

¹⁷ Kangi inu shi yabanika na uhalami wakwe, miya mweγoshola kikundile cha Mulungu atakalama kale na kale.

Wemwomanya Kilisito wakunda kutiazaγanya.

¹⁸ Wanangu, inu mishi ya bindilizo; sa mwivilevyo kuti: Mwemwomanya Kilisito aiza, ivi lushe wazaγenela wemwomanya Kilisito, ne tihotaila kuti: Inu ni mishi ya bindilizo.

¹⁹ Wazalawa kwetu, miya nkawaanduka kwetu; hambu atiwaanduka kwetu, anga wazaikala na ishwi; miya kangwe wabunkuke, kuti nkawaanduka kwetu.

²⁰ Inywi mzainkwa mpehongwa ni yuja mṅazi, mwataila ivivyoshe.

²¹ Simigondela, viya nkamtaila mbuliya kweli, miyaviya mwataila, kuti mambeza yoshe nkayaanduka he kweli.

²² Mumambeza lushe ni ndai, ati siyeyuja mwekela nkani kuti: Yesu siye Kilisito? Uyu ne mwemwomanya Kilisito, hambu amkeleza Tate na Ṅwanae nkani.

²³ Kila mwemkeleza Ṅwana nkani, hata Tate nkana naye, miya mwemlanga Ṅwana cha sale, hata Tate ana naye.

²⁴ Viya mwivilevyo haja kivoko, viike kwenyu! Ati viya mwivilevyo haja kivoko vyaikala kwenyu, hata inywi mwaikala kwa Tate na kwa Ṅwanae.

²⁵ Kangi msuhi, ṅwenye atinkilewo, ni nkalamo ya kale na kale.

²⁶ Ivi nizamigondela kwa mbuli ya waja wekunda kumiazaγanya.

²⁷ Mpehongwa, muhokeleyo kwakwe, yamiikaila, nkamshindahinyuγwa ni muntu muntu; miya sa mpeho yakwe ivyomihinya, ikalai nayo!

²⁸ Lushe wanangu, ikalai naye, kangwe akizalawila tione nyemi, tishebunkuke kwakwe aho, ndiho auyiye.

²⁹ Ati mwataila, kuti: Ṅwenye ni mtanda, tailai kuti: Hata kila muntu mweγoshola utanda aivyelwe ndiye!