1. Wakolinto 9 - Kishambala New Testament 2005

Paulo viya ashungwilwevyo nkavitongela.

¹ Imi sikombolwe? Si ntuṅwa? Simwene Zumbe ywetu Yesu Kilisito? Inywi nkamu ndima yangu, nimγoshweleyo Zumbe?

² Ati watuhu imi si ntuṅwa yawe, miya inywi ni ntuṅwa yenyu; kangi inywi mu lwitangilo, kuti nigimbikwe ntuṅwa ni Zumbe.

³ Ulu ni lukanilo lwangu kwa waja welahana na imi.

⁴ Nkatishungulwe kuja na kunywa?

⁵ Nkatishungulwe kuanga na mvyele mwetozesha sa ziya ntuṅwa ntuhu, sa wanduγuze wa Zumbe, sa Petelo?

⁶ Hambu imi ike na Balinaba nkatishungulwe kuγoshola ivyoho?

⁷ Ni mnkondo ani mwegombela tuvo jakwe ṅwenye? Ni ndai mwehanda mγunda akishekunda kuja viya, uvyovyala? Ni ndai mwelisha chumangwa akishekunda kunywa mele ya chiya chumangwa? Ivi nivilonga kimuntu?

⁸ So mulomongwa wevilonga?

⁹ Hambu mwe mulomongwa wa Mose kuigondiγwe: Ṅombe yehaγatula ngano na kuijata usheikante kanwa! Aho Mulungu atepikila ṅombe? Hambu atelonga ivyoho kwa mbuli ya ishwi?

¹⁰ Hambu vizagondwa kwa mbuli ya ishwi, hambu mwelima shuti alimile kialilo! Mwehaγatula ngano, yohe ana kialilo cha kupangilwa.

¹¹ Ati ishwi tizamihandila viya vya kimpeho, lushe ni vikulu ani, tikija vyenyu vya kiinushi?

¹² Ati watuhu waishungulwe ivyoho kumija, ishwi nkaviisiiza kutitala? Miya unu ufuṅwa wetu nkatiutongele, miya tazizimiza mbuli zoshe, kangwe tishezafingiza hata ulaungwa wedi wa Kilisito.

¹³ Nkamtaila, kuti waja weγoshola ndima vikiloi, waja viya vyelawa vikiloi? Kuti waja weγolokela okelo ja ṅombe za mviko, wapangilwa fungu jawe haho?

¹⁴ Vivyoho hata Zumbe azalaγiliza, waja webilikila ulaungwa wedi, wajile ulaungwa wedi.

¹⁵ Miya imi ivi vyoshe sivitongela hata; sivigondile, kangwe vinibontokele, hambu imi ni vitana vyangu nikifa, kushima aho muntu akizanihoka inu ntogolo yangu.

¹⁶ Hambu nikibilikila ulaungwa wedi sidaha kukitogola navyo, hambu nitekundilwa; hambu ati nashebilikila, anga nina masa.

¹⁷ Hambu nikiviγoshola kwa kutakunda ṅwenye, nina upokezi; ati ni kwa kutakundilwa, hata vivyo niiinkiγwe uγolokezi wa ndimangwa.

¹⁸ Lushe upokezi wangu ni mbwai? Shunu: Nibilikila ulaungwa wedi kishimali, kangwe nishezabana uja ufuṅwa wangu wa unu ulaungwa wedi.

Paulo awaγalukila woshe mtuṅwa kangwe awamote.

¹⁹ Hambu kwa viya, nivyovishungwilwa viya vyoshe, nizakiγalusha ṅwenye mtuṅwa ywa woshe, kangwe niisiize kumota wantu wangi.

²⁰ Wayuda nizawaγalukila, viya ni Muyuda, kangwe nimote Wayuda; waja wena ṅwiko, viya nami nina ṅwiko; kangi sina ṅwiko, miya kangwe nimote waja wena ṅwiko.

²¹ Waja washiwotaila milomongwa, viya nami sitaila milomongwa, kangi nataila milomongwa ya Mulungu, naitika milomo ya Kilisito, miya kangwe nimote waja washiwotaila milomongwa.

²² Wanyonge nizawaγalukila mnyonge ṅwiyae ywawe, nimote wanyonge. Ivyoho wosheni nizafanana nawo mwe mbuli zoshe, kangwe hoshe hoshe nihonye kuṅwe.

²³ Miya vyoshe niviγoshola kwa mbuli ya ulaungwa wedi, kangwe nami nezeniupangilwe.

Mholwe wa kuinkwa linga ja nkalamo.

²⁴ Nkamtaila kuti: Woshe weγuluka mhotwe kuγuluka waγuluka woshe, miya mweinkwa tuvo ni muṅwe du? Hata inywi γulukai ivyoho, kangwe nezemwinkwe!

²⁵ Kila mwehita nkondo akinyima vyoshe vituhu; waja, kangwe wainkwe linga jebanika, miya ishwi jishijobanika.

²⁶ Lushe imi naγuluka ivyoho, miya sitahakiγulukila du; nagomba, miya sitahakigombela du.

²⁷ Nalumiza ṅwili wangu, mpaka nivote, kuunga ṅwenye nishezabentwa nikibilikila watuhu.