1. Wakolinto 8 - Kishambala New Testament 2005

Nyama za fika.

¹ Mbuli ya nyama za fika nataila kuti: Ija toshe taitaila. Kangi kutaila du kwahikula, miya lukundisho lwazifya.

² Muntu ati akifanyanyiza, kuti ana avyotaila, nkazati ataile mitailile yeagiza,

³ miya ati muntu amkundisha Mulungu, nyu aitailwe ndiye.

⁴ Lushe iyo mbuli ya kuja nyama za fika tataila kuti: Mwe inu shi nkakuna mzimu, kangi nkakuna mulungu mtuhu kushima yuja muṅwe.

⁵ Hambu hata kukioneka vyeitangwa mulungu, ati ni vya mwe lwingu, ati ni vya kunu shi, kweli milungu ni mingi, na wazumbe ni wangi,

⁶ miya ishwi Mulungu ywetu ni muṅwe, ni Tate; kwa uyu ne vintu vyoshe vikoauduka, hata ishwi ti wakwe; vivyoho Zumbe ywetu ni muṅwe, Yesu Kilisito, uyu ne vintu vyoshe viumbiγwevyo ndiye, hala ishwi tiumbiγwe ndiye.

⁷ Miya unu utalizi so wa woshe; kuṅwe mpaka ivi lushe wazazwela fika za mizimu, kwa ivyoho waja nyama za fika, kuti ni za fika, ne myoyoyawe ihoγuwa kisitama, kwa kuti ikena unyonge.

⁸ Kangi nkande siyo yetiivanya na Mulungu; ati taja, nkatiγenyeza; ati tasheja, nkatikosa.

⁹ Mwolele duviya, muvyoshungulwa inywi, vishewakinye wanyonge!

¹⁰ Iwe wetaila inu mbuli, ati muntu akuona, uiikalemwe vikilo ja mizimu, lushe yuja, ati ni mnyonge, moyo wakwe nkezeuhimilwe, mpaka yohe akija nyama ya fika?

¹¹ Ivyoho yuja mnyonge ahosiγwa ni mitailile yako, kangi ni mnduγu, hata kwa mbuli yakwe Kilisito azafa.

¹² Ivyoho mwabanila wanduγu, mkihosa myoyo yawe, ikena manyonge, kangi aho ne kumubanila Kilisito.

¹³ Kwa ivyoho, ati nkande yamwihila mnduγu ywangu, sezenije nyama kale na kale, nishezamwihila mnduγu ywangu.