1. Wakolinto 7 - Kishambala New Testament 2005

Vyelala wanyumba.

¹ Mbuli ziya, munigondelezo, namiti: Ni vitana, muntu akishedowa mvyele.

² Miya kwa mbuli ya kilanga shuti kila muntu atende muke ṅwenye, kangi kila mvyele atende mulume ṅwenye!

³ Mγoshi amunke mvyele vyemwagiza, vivyoho hata mvyele amunke mγoshi ywakwe vyemwagiza!

⁴ Mvyele so ṅwenye ṅwili wakwe, ṅwenye ni mγoshi; vivyoho hatamγoshi so ṅwenye ṅwili wakwe, ṅwenye ni mvyele.

⁵ Mshenyimane kushima aho mkiivana mishi kuṅwe, kangwe mkombaγane kuvika; ikibontoka, mwangilane vituhu, kangwe Satani ashezamiγeza, kwa kuti nkemdahe kuzizimiza kale na kale.

⁶ Ivyoho nilonga, nimikundize inu mbuli, sitaimilaγiliza

⁷ Miya nakunda, wantu woshe waikale sa imi ṅwenye; miya kila muntu ana cha mbazi chakwe ṅwenye, ainkiγweeho ni Mulungu, muṅwe iviho, muṅwe iviho.

Wabweni.

⁸ Wabweni na wavyele wafilwewo ni waγoshi nawati: Vyatama, wakiikala sa imi;

⁹ miya wakishedaha kuzizimiza newaγuwane; hambu kuγuwana ni kutana kuzinka muntu akiangulwa ni luzisho.

Unyumba nkaukoṅwa.

¹⁰ Waja wabindilewo kuγuwana nawalaγiliza, kangi si miyo, ni Zumbe: Mvyele ashetanyiγwe na mγoshi ywakwe!

¹¹ Ati atanyiγwa, shuti aikale ubweni ao aivanyiγwe na yuja mγoshi! Vivyoho hata mγoshi ashezamleka mvyele!

Unyumba ushiwotenda moyo muṅwe wa kumkundisha Yesu ulivyo.

¹² Waja watuhu nawalonga imi, so Zumbe, kuti: Ati mnduγu ana mvyele ashiyetozesha, yuja akikunda kuikala naye, ashemleke!

¹³ Ati mvyele ana mγoshi ashiyetozesha, uyu akitamilwa ni kuikala naye, ashemleke uyu mγoshi!

¹⁴ Hambu mγoshi ashiyetozesha aṅaziγwa ni muke, vivyoho hata mvyele ashiyetozesha aṅaziγwa ni mulume; hambu anga wana wenyu ni wabada, miya ivyoho ni waṅazi.

¹⁵ Miya yuja ashiyetozesha akikunda kukoma unyumba neaukome! Mnduγu ati ni ywa kiγoshi, ati ni ywa kivyele, nkana ṅwiko ivyoho. Mulungu azatiitanga du kwa mbuli ya kuivana.

¹⁶ Hambu iwe mvyele utaila zeze, kuti nezeumhonye mulumewo? Iwe mγoshi, utaila zeze, ati nezeumhonye mkaziyo?

¹⁷ Ntoγo kila muntu aange, sa Zumbe amupangilevyo, sa Mulungu amwitangevyo; ne nivyolaγiliza mwe mabumba yoshe.

¹⁸ Ati muntu azaitangwa aishengiγwe, ashefishe! Ati muntu azaitangwa aishishengiγwe, asheshengwe!

¹⁹ Kuja kushengwa siko, hata kusheshengwa siko, komo muntu atozeshe milomo ya Mulungu!

²⁰ Kila muntu sa ndivyo ailivyo akiitangwa, ne ndivyo aikale!

²¹ Ati uzaitangwa ui mtuṅwa, usheone sungu kwa ivyoho! Ati wadaha kukikombola, kikombole!

²² Hambu mtuṅwa akiitangwa kuti: Ni ywa Zumbe, ne azakombolwa ni Zumbe; vivyoho ṅwana vyale akiitangwa, ne azaγaluka mtuṅwa ywa Kilisito.

²³ Mzaγulwa na kuwo, msheγaluke watuṅwa wa wantu!

²⁴ Wanduγu, kila muntu sa ndivyo akiitangwa, ne ndivyo aikale kwa Zumbe!

Mbuli ya wandele.

²⁵ Miya kwa mbuli ya wandele sina mulomo wa Zumbe, nitalonga du, nivyoona ṅwenye kwa viya, nifilwevyo mbazi ni Zumbe, kuti ni mkoolezi.

²⁶ Nafanyanya kuti: Kwa mbuli ya nkondo ndiyo ibule, vyatama, muntu akiikala vivyoho alivyo

²⁷ Uishungiγwe na mvyele ushelonde lukomele lwa nyumba! Uishina mvyele, ushelonde mvyele!

²⁸ Miya hata ukiγuwa nkubana; hata mndele akiγwiγwa nkabana; miya we ivyobo nezewaone ukiwa wa mili yawe, ne nikokunda kumihonya.

²⁹ Wanduγu, inu mbuli nalonga kuti: Mishi iunga kubontoka, ne nihoγamba: Wena wavyele waikale viya nkawana,

³⁰ welila waikale viya nkawalila, wena nyemi waikale viya nkawana, weγula vintu waikale viya nkawana kitende,

³¹ weangilana na viya vya inu shi waikale viya nkawana mbuli navyo! Hambu viya vya inu shi nevizinke.

³² Nakunda, mwikale kishisungu. Ashinaye mvyele apikila viya vya Zumbe, ndivyo amtamile;

³³ miya mwena mvyele apikila vya inu shi, ndivyo amtamile mvyele, ne azabinda kulaviγwa haili.

³⁴ Vivyoho hata mvyele ashinaye mγoshi, hata mndele apikila viya vya Zumbe, aγaluke mṅazi kiṅwili na kimpeho; miya yuja mwena mγoshi apikila viya vya inu shi, ndivyo amtamile mγoshi.

³⁵ Ivi namilonga, nimiambize, so kwa kuγamba: Nimigele luγole, miya kangwe mbuli zenyu zitame, mwikazanye na Zumbe mishi yoshe na kusheazaγanyiγwa ni mbuli.

³⁶ Miya muntu akifanyanya, kuti nkavitama, ṅwanae ywa kindele akiikala ubweni vivyoho ai mvyele mgima, kangi mbuli neibule aho, aγoshole, ndivyo akunde; nkabana, neaγwiγwe!

³⁷ Miya ati muntu azatoγesha moyo wakwe vitana, ukisheona ntoγo, kwa kuti ṅwenye adaha kukifanyanyiza avyokunda, ati mwe moyo wakwe ṅwenye azafanyanya ivyoho, ṅwanae ywa kindele aikale ubweni, ne atazifya.

³⁸ Kwa ivyoho mwemwinkila ṅwanae, aγwiγwe, azifya; ashiyemwinkila azifya kuzinka.

Mbuli ya mvyele.

³⁹ Mvyele ana ṅwiko mishi yoshe, mulume ai moyo; miya mulume akifa, ne azashungulwa kuγwiγwa ni ndiye amkunde.

⁴⁰ Miya nyemi yakwe yaisiiza, akiikala vivyoho. Ne nivyoona imi, kangi nakifanyanyiza kuti: Nina mpehongwa ya Mulungu.