1. Wakolinto 4 - Kishambala New Testament 2005

Waluγojo wa Kilisito.

¹ Ivyoho muntu atitale, kuti ti wafunguwo wa Kilisito, kuti ti waγolokezi wa vihili vya Mulungu!

² Kangi kwa waγolokezi nkakulondiγwa mbuli ntuhu, komo muntu amanyike, kuti ni mkoolezi.

³ Miya kwangu ni vihufu kabisa, ati nalahwa ni nywiyo ao masa ani matuhu yelahwa ni wantu; hata imi ṅwenye sikilaha.

⁴ Hambu sina nichotaila cha kumbanila Mulungu, miya kwa ivyoho si mtanda. Miya mwenilahila ni Zumbe.

⁵ Kwa ivyoho mshelahe mbuli mishi inu, mpaka Zumbe akizaiza! Uyu ne ndiye alavye na weluwi vifishiγwevyo mwe lwiza, ne ndiye abunkule ntongonyezi za myoyo; ne ndiho kila muntu nezeainkwe ntogolo ni Mulungu.

⁶ Wanduγu, izi mbuli nizaziteγanyiza imi na Apolo kwa mbuli ya inywi, kangwe muhinile mwe ishwi kushezinka viya vigondiγwevyo, kangwe muntu ashezahikuka kwa mbuli ya muṅwe akimupunguza yuja mtuhu.

⁷ Hambu u mwombozi ywa ndai? Una mbwai ushiinkiγwevyo? Ati uzaviinkwa, nini ukihikuka viya nkuteviinkwa? Mwiiγute? Mwiγenyeze?

⁸ Mwiγaluke wazumbe, tiishiho? Mkataγaluka wazumbe, kangwe hata ishwi titoze uzumbe haṅwe na inywi!

⁹ Hambu nafanyanya kuti: Mulungu aleka, ishwi ntuṅwa tishilikize, viya titetalwa ni kufa, hambu ishwi, tiolelwa ni wa inu shi, ni walau, ni wantu.

¹⁰ Ishwi ti wababashi kwa mbuli ya Kilisito, inywi mu wanyanyi, kuti muna Kilisito; ishwi ti wanyonge, inywi mu wanguvu; inywi mwagimbikwa, ishwi tabelwa.

¹¹ Mpaka ivi lushe aha talumila kwa mbuli ya sala na nkilu na kuikala kishishuke na kutowiγwa na kushowa haikala;

¹² taona lulali tikiγoshola ndima na mikono yetu; tikikankwa taṅaza mesho,

¹³ tikiγulushiγwa tazizimiza, tikishingwa vibada tahembelezeza, tizaγaluka viya ti mafushi mwe inu shi, viya tilewaγalukila woshe kisitama; mpaka lelo ni vivyoho.

Paulo ni ishe.

¹⁴ Sivigonda, nimigele shoni, miya viya nitashunda wanangu, niwokundisha.

¹⁵ Hambu ati muna wafuzi makulija mwe Kilisitto, miya nkamna waishe wangi. Hambu imi nizamivyala mwe Kilisito Yesu na kumibilikila ulaungwa.

¹⁶ Lushe namihimila, munitongele.

Paulo amtuma Timoteyo.

¹⁷ Inu mbuli ne ilekileyo, nikimtuma Timoteyo na kwenyu; uyu ni ṅwanangu mwe Kilisito, niyemkundisha, kuti ni mkoolezi; uyu atamikumbusha miγendele yangu ya Kikilisito, sa nivyofuza koshe koshe mwe kila bumbangwa.

¹⁸ Kuṅwe wahikuka, viya sezeniize kwenyu.

¹⁹ Miya neniize kinyanyi kwenyu, ati Zumbe akunda; ne ndiho nezenitaile nguvu ya waja wehikuka, so milongele yawe.

²⁰ Hambu uzumbu wa Mulungu siwo wa kulonga, ni wa nguvu.

²¹ Mukundai? Nimilawile na lukuzu, hambu niize na lukundisho na mpeho ya uhozu?