1. Wakolinto 3 - Kishambala New Testament 2005

Paulo azawabilikila Wakolinto viya ni wankebe.

¹ Wanduγu, lushe imi sidahile kulonga na inywi, viya mu wantu wena mpehongwa, miya viya muke wantu wetongela uhalami wa mili yawe, viya muke wankebe mwe mbuli ya Kilisito,

² Nizaminka mele, munywe, siminkile nkande zetoγa, hambu nkamzati mzidahe.

³ Hata mishi inu nkamzati mzidahe, hambu mke wa kimuntu. Hambu mwina wizu na nkumbizi, lushe nkamtongela uhalami wa mili yenyu? Nkamwanga kimuntu?

⁴ Hambu muntu akiγamba: Imi ni ywa Paulo, ṅwiyae akiγamba: Imi ni ywa Apolo, nkamu wantu?

Kila mndima ana yakwe ndima, shikamilo ni Yesu.

⁵ Kuna Apolo na Paulo? Toshe ti wandimangwa tilekilewo, mkitozesha, kila muntu sa Zumbe avyomfila mbazi.

⁶ Imi nizahanda, Apolo azanywesha, miya Mulungu azakuza.

⁷ Lushe yuja mtakuhanda siye, hata yuja mtakunywesha siye, miya ni Mulungu ike mwekuza.

⁸ Mtakuhanda na mtakunywesha wa haṅwe, miya kila muṅwe atazainkwa upokezi wakwe wemtala kwa iyo ndima, aγosholeyo.

⁹ Hambu ishwi ti wandima wa Mulungu; inywi mu lubuwangwa lwa Mulungu; kangi mu zengongwa ja Mulungu.

¹⁰ Kwa viyuγo niinkiγwevyo ni Mulungu nizaika shikamilo sa fundi mwena viyuγo vya kuzenga avyoγoshola, miya mtuhu azengela mumo, miya kila aolele, ndivyo azengele mumo!

¹¹ Hambu nkabuna mwedaha kuika shikamilo tuhu kushima jiya jiikiγwejo, kushima Yesu Kilisito.

¹² Ati muntu azengela mwe iji shikamilo zahabu, feza, mawe yena kima, miti, mani, mashafunto,

¹³ ndima ya kila muntu itazamanyika, hambu mushingwa utazaimanyisha; hambu ibunkulwa ni moto; ndima ya kila muntu ilivyo, moto utaibunkula.

¹⁴ Ati ndimaya muntu, azengileyo, yaikala, ataγuwa upokezi wakwe.

¹⁵ Ati ndima ya muntu yahya, ataikosa, miya ṅwenye atahona, miya niviya atevunilwa mwe moto.

¹⁶ Nkamtaila kuti: Inywi mu vikilo ja Mulungu, kuti: Mpehongwa ya Mulungu iikala mwenyu?

¹⁷ Ati muntu abana vikilo ja Mulungu, uyu Mulungu atazamubana; hambu vikilo ja Mulungu ni ṅazi, ne mulivyo inywi.

Viyuγo vya inu shi.

¹⁸ Muntu ashezakiufya ṅwenye! Ati kwenyu muntu akifanyanyiza, kuti ana viyuγo mwe inu shi, shuti aγaluke mubabashi, kangwe nezeatende viyuγo.

¹⁹ Hambu viyuγo vya inu shi ni ubabashi kwa Mulungu. Hambu kuigondiγwe: Agwila wakiyuγo na unyanyi wawe, kangi vituhu vyalongwa:

²⁰ Zumbe ataila ntongonyezi za wakiyuγo, kuti ni za bule.

²¹ Kwa ivyoho muntu ashekihikule kwa weyae! Hambu vyoshe ni vyenyu;

²² ati ni Paulo, ati ni Apolo, ati ni Kefa, ati ni inu shi, ati ni ugima, ati ni kifa, ati ni vya ivi lushe, ati ni viya ndivyo nezevilawile, vyoshe ni vyenyu.

²³ Kangi inywi mu wa Kilisito, Kilisito ni ywa Mulungu.