1. Wakolinto 15 - Kishambala New Testament 2005

Yesu azafufuka.

¹ Wanduγu, nakunda kumiukwila vyedi uja ulau, nimibilikilewo, muhokelewo, muwoikala nawo, muwohonyiγwa ndiwo,

² ati mwatozesha ziya mbulingwa, nimibilikilezo, ati nkamtozesha bule du.

³ Hambu inywi bosi nizamiγambila, niγambilwevyo ṅwenye kuti: Kilisito azafa kwa mbuli ya uhuza wetu,

⁴ sa vigondiγwevyo, kuti: Azazikwa, kuti: Azafufuka mushi wa ntatu, sa vigondiγwevyo; kuti:

⁵ Azanamlawila Kefa, vikibinda waja kumi na waili.

⁶ Vikibinda azalawila wanduγu wezinka magana mashano, wai haṅwe; awa wangi wake moyo mpaka ivi iushe, miya kuṅwe wazasisila.

⁷ Vikibinda azamlawila Yakobo, vikibinda ntuṅwa zoshe.

⁸ Miya ivi vyoshe vikibontoka, kushilikiza azanilawila nami, kwa kuti nitevyalwa, mishi ishizati itimize.

⁹ Hambu imi ni mdodo kuzinka ntuṅwa zoshe, kangi siagiziγwa ni kuitangwa ntuṅwa, kwa kuti ne nikiγulusha bumbangwa ja Mulungu.

¹⁰ Miya kwa mbazi ya Mulungu nizaγaluka iviho nilivyo, kangi mbazi yakwe, anifileyo, so ya bule, miya nizapikapika na ndima kuzinka waja woshe, kangi si miyo, ni mbazi ya Mulungu nifilweyo.

¹¹ Lushe ati ni miyo, ati ni waja, ne tivyobilikila, ne mutozeshevyo.

Nkolo ya ufufuki wa wafilewo.

¹² Kilisito akibilikilwa kuti: Azafufuka, lushe kwenyu kuṅwe walonga zeze wakiγamba: Ufufuki wa wafilewo nkauho?

¹³ Ati ufufuki wa wafilewo nkauho, hata Kilisito nkafufuke miya.

¹⁴ Kangi ati Kilisito nkafufuke, lushe uhilikizi wetu ni wa bule, hata kutozesha kwenyu ni kwa hule.

¹⁵ Kangi tamanyika kuti: Ti waona wa Mulungu wa ulongo, kwa kuti tizamlongela Mulungu uwona, kuti azamfufula Kilisito, ashimfufuleye, ati wafilewo nkawafufuka.

¹⁶ Hambu wafilewo wakishefufuka, hata Kilisito nkafufuke.

¹⁷ Kangi ati Kilisito nkafufuke, kutozesha kwenyu ni kwa bule, uhuza wenyu mkena nawo.

¹⁸ Lushe hata waja wahitilewo kwa sisila na kumwalila Kilisito wazabinda kuaγa.

¹⁹ Ati Kilisito ni kialilo chetu mwe mishi inu ike du, anga ti wakiwa kuzinka wantu woshe.

Woshe wauziγwa moyo.

²⁰ Miya lushe Kilisito azabinda kufufuka kwa wafilewo, ni mulimbulo wa waja wesisila.

²¹ Hambu sa viyaho kifa chiletiγwevyo ni muntu, vivyoho hata ufufuki wa wafilewo uteletiγwa ni muntu.

²² Hambu woshe wafa, kwa kuti ni wana Adamu, vivyoho woshe wauziγwa moyo, kwa kuti ni wa Kilisito;

²³ miya kila sa avyobulilwa ni lupondo lwakwe; mulimbulo ni Kilisito, kutongela waja wena Kilisito aho, ndiho nezeauyiye;

²⁴ bindilizo ni haja, ahozainkila uzumbe kwa Mulungu Tate, ahozabusha uzumbe na ufuṅwa na nguvu woshe.

²⁵ Hambu vyamtala kutoza uzumbe ṅwenye, mpaka ndiho nezeaikile wankulu woshe shi he milundi yakwe.

²⁶ Munkulu mweshilikiza kubushiγwa ni kifa.

²⁷ Hambu vyoshe aviika shi he milundi yakwe. Miya hakilongwa kuti: Vyoshe vyavotwa, vyamanyika kuti: Ashiyevotwa ni yuja mweinkila ivi vyoshe na kwakwe.

²⁸ Miya ndiho vyoshe nezevimwitike, aho ne ṅwanangwa ṅwenye yohe nezeamwitike yuja, amunkileye viya vyoshe, kangwe vyoshe viγaluke vya Mulungu kosheni.

Bontokelo ja ufufuki.

²⁹ Wekunda kubatizwa kwa mbuli ya wafilewo anga wazifyai? Ati wafilewo nkawafufuka hata, washindabatizwa ywai kwa mbuli yawe?

³⁰ He ishwi nini tikishindaja sungu vivyoho vivyoho?

³¹ Kila mushi nafa, sa tivyotogolwa kwenyu, wanduγu, kangi ne Zumbe ywetu Kilisito Yesu avyotitogola.

³² Ati kuja Efeso nizaomana kimuntumuntu na yaja mazama, anga vina bontokelo ani? Ati wafilewo nkawafufuka, tije, tinywe, hambu keloi tiyafa!

³³ Msheaγilwe! Shimo mbada zahana misimo milana.

³⁴ Vilukai vyedi, mshezahana! Hambu kuṅwe nkawataila vya Mulungu. Nivilonga ivi, nimigele shoni.

Mili ya wantu wefufuka ilivyo.

³⁵ Ati muntu aγamba: Wafilewo wafufuka zeze? Walawila na ṅwili ani?

³⁶ Mdashi iwe! Uchohanda nkachiuya moyo, ati nkachinafa.

³⁷ Kangi uchohanda, nkuhanda uja ṅwili, ndiwo nezeulawile, miya uhanda kahuluzi du, ati ni ka ngano, ati ni ka mbeyu ntuhu.

³⁸ Miya Mulungu akainka ṅwili, sa avyokunda, kangi kila mbeyu yainkwa ṅwili wakwe ṅwenye.

³⁹ Nyama zoshe so nyama ṅwenga du, hambu kuna ya muntu, kangi kuna ya ṅombe, kuna ya madeγe, kuna ya nyama za mtoi.

⁴⁰ Vikibinda kuna mili ya kilwingu na mili ya kiinushi; utana wa ija ya kilwingu u mbali, kangi ntana wa ija ya kiinushi u mbali.

⁴¹ Utana wa zuwa u mbali, utana wa ṅwezi u mbali, utana wa ntondwe u mbali, hambu hata ntondwe na ntondwe zazinkana utana.

⁴² Vivyoho hata ufufuki wa wafilewo ne ulivyo: Kuhandwa vyebanika, kufufuka vishibanikavyo.

⁴³ Kuhandwa vyebelwa, kufufuka vyetogolwa; kuhandwa vye unyonge, kufufuka vye nguvu.

⁴⁴ Kuhandwa ṅwili wa kimuntu, kufufuka ṅwili wa kimpeho; ati kuna ṅwili wa kimuntu, hata wa kimpeho u shaho.

⁴⁵ Hambu ne vigondiγwevyo: Adamu, yuja muntu ywa bosi, azatenda ṅwili we moyo; Adamu ywa shilikiza azatenda mpeho yeuza moyo.

⁴⁶ Miya uja wa kimpeho siwo wa hosi, kulongola wa kimuntu, kutongela wa kimpebo.

⁴⁷ Muntu ywa hosi aanduka mwe shi, ni ywa kiinushi.

⁴⁸ Muntu ywa mbili aanduka mwe lwingu. Yuja ywa kiinushi alivyo, ne wa kiinushi wohe walivyo; kangi yuja ywa kilwingu alivyo, ne wa kilwingu wohe walivyo.

⁴⁹ Sa tiangilevyo na shula ya yuja ywa kiinushi, ne ndivyo tiange na shula ya yuja ywa kilwingu.

Kuγalamushiγwa kwa watanda.

⁵⁰ Wanduγu, inu mbuli nalongesha kuti: Vye iiyama na mpome nkavidaha kupala uzumbe wa Mulungu, vyebanika nkavidaha kupala vishibanikavyo.

⁵¹ Vishivyotailikana mishi yoshe shivyo, navimiγambila: Toshe nkezetisisile, miya toshe nezetiγalamushiγwe;

⁵² kangi ni kaja kafunda kadashi keinga sa haja, muntu akipesha kaṅwe du, ni aho, gunda ja shilikiza jikizakema. Hambu jikizakema, ne ndiho wafilewo nezewafufuke kishimili yebanika, kangi ishwi titaγalamushiγwa haho.

⁵³ Hambu ivi vyebanika shuti vizwike vishibanikavyo, ivi vyefa shuti vizwike vishifavyo.

⁵⁴ Ndiho ivi vyebanika nezevizwikile vishibanikavyo, ndiho ivi vyefa nezevizwikile vishifavyo, ne ndiho habontokele ija mbulingwa igondiγweyo kuγamba:

⁵⁵ Kifa chiibunkuke, chiivotiγwe! Lushe iwe kifa, luvula lwako lu kuhi? Iwe kuzimu, kuvota kwako ku kuhi?

⁵⁶ Miya luvula lwa kifa ni uhuza, kangi vyegela uhuza nguvu ni mulomongwa.

⁵⁷ Miya Mulungu atogolwe! Hambu ne mweleka, tikivola kwa nguvu ya Zumbe ywetu Yesu kilisito.

⁵⁸ Kwa ivyoho, wanduγu wangu, niwokundisha, toγai vitana, mshevuwanike! Isiizai kukihima ndimaugwa ya Zumbe mishi yoshe! Hambu mwataila kuti: Lulah, muloona kwa mbuli ya Zumbe, so lwa bule.