1. Wakolinto 12 - Kishambala New Testament 2005

Viya vya kimpeho tivyoinkwa.

¹ Wanduγu, sikunda, mkishetaila viya vya mpehongwa.

² Mwataila kuti: Ne mwi wamzimu, kuti: Ne mkibasha vinyuwa vishilongavyo, sa muvyohuniγwa na γuko.

³ Ne vyeleka, nikimiukwila kuti: Nkakuna mwelonga kwa mpehongwa ya Mulungu akimkanka Yesu, kangi nkakuna mwedaha kumwitanga Yesu Zumbe, ati mpeho ṅazi nkana nayo.

⁴ Kweli viya tivyoinkwa kwa mbazi vyazinkana, miya mpehongwa ni iyo ṅwenga.

⁵ Hata ufuṅwa wazinkana, miya Zumbe ni yuyo muṅwe.

⁶ Hata nguvu zazinkana, miya Mulungu mwegela vyoshe nguvu kwa wantu woshe ni yuyo muṅwe.

⁷ Kila muntu afumbwilwa viya vya mpehongwa vyemγesa.

⁸ Hambu muṅwe ainkwa ni mpehongwa milongele yena viyuγo, mtuhu ainkwa kulonga utalizi weivana na ija mpehongwa,

⁹ mtuhu ainkwa kutozesha kwa nguvu ya ija mpehongwa, mtuhu ainkwa kuhonya watamu kwa nguvu ya ija mpehongwa ṅwenga,

¹⁰ mtuhu ainkwa kuγoshola vye nguvu, mtuhu uteγanyi, mtuhu kubunkula vya kimpeho, mtuhu vilosi viγeni vingi, mtuhu kulonga mabontokelo ya viya vyelongwa ni weyae.

¹¹ Miya ivi vyoshe mweviγoshola ni iyo mpehongwa ṅwenga, amupangila kila muntu, avyomfanyanyiza ṅwenye.

Madango ni mangi, ṅwili ni muṅwe.

¹² Hambu sa viyaho ṅwili muṅwe uvyotenda madango mangi, kangi hata madango yakitenda mangi, ṅwili ni muṅwe vivyoho, ivyoho ne vya Kilisito vilivyo.

¹³ Hambu kwa nguvu ya iyo mpeho ṅwenga ishwi toshe tibatizwe, tiγaluke ṅwili muṅwe, ati ti Wayuda, ati ti Wagiliki, ati ti watuṅwa, ati tiwanavyale; kangi toshe tigisiγwe mpeho ṅwenga.

¹⁴ Hambu hata ṅwili so dango mwe du, miya ni mangi.

¹⁵ Ati mulundi waγamba: Kwa kuti si mkono, si wa ṅwili, miya hata vivyo ni wa ṅwili.

¹⁶ Ati shikilo jaγamba: Kwa kuti si zisho, si ja ṅwili, hata vivyo ni ja ṅwili.

¹⁷ Ati ṅwili woshe ni zisho, anga tiiva zeze? Ati ṅwili woshe ni gutwi, anga tihefya zeze?

¹⁸ Miya lushe Mulungu azaika madango yoshe, kila iṅwe mwe ṅwili aho, akundileho.

¹⁹ Ati aya yoshe ni dango iṅwe du, anga ṅwili uoneka hii?

²⁰ Lushe madango ni mangi, miya ṅwili ni muṅwe.

²¹ Zisho nkajidaha kulonga mkono: Siagiziγwa ni weyo, hata mutwi nkaudaha kulonga milundi: Siagiziγwa ni nywiyo.

Bumba ni ṅwili wa Kilisito.

²² Miya ni ivyoho: Yaja madango ya ṅwili, tiyofanyanya kuti: Ni manyonge, ne tiyoisiiza kuagiziγwa ndiyo;

²³ kangi yaja madango ya ṅwili, tiyoona shoni nayo, ne tiyoisiiza kuyagimbika, yaja yashiyotama ne yeisiiza kuγubikwa,

²⁴ hambu yaja matana nkayashindapikilwa ivyoho. Miya Mulungu azagombekeza ṅwili ivyoho akiisa kugimbika jiya jishijotama sa weyae,

²⁵ kangwe mwe ṅwili kusheonekane mzinkano, kangwe madango yaivane kupikilana.

²⁶ Lushe ati dango iṅwe jalumila, madango yoshe yalumila haṅwe najo, ati dango iṅwe jazifiγwa, madango yoshe yatamilwa haṅwe najo.

²⁷ Miya inywi mu ṅwili wa Kilisito na madango kila sa vivyomtala.

²⁸ Kuṅwe Mulungu azawagimbikila bumbangwa: Bosi ntuṅwa, ka mbili wateγanyi, ka ntatu wafuzi vikibinda we nguvu, vikibinda wainkiγwewo kuhonya na waja wena kutumikila weyae wawe, na waja wena kuγolokela weyae wawe, na waja wena milongele mingi.

²⁹ Woshe ni ntuṅwa? Woshe ni wateγanyi? Woshe ni wafuzi? Woshe ni we nguvu?

³⁰ Woshe wazainkwa kuhonya watamu? Woshe walonga na milongele miγeni? Woshe walonga mabontokelo yawe?

³¹ Miya kihimei, mdahefilwa mbazi zekula kuzinka izi! Kangi nenimionyeshe sila yeisiiza kutamisha.