1. Wakolinto 1 - Kishambala New Testament 2005

Tulo.

¹ Imi Paulo naitangwaye, niγaluke ntuṅwa ya Kilisito Yesu kwa viya, Mulungu akundilevyo, imi na mnduγu Sositene tamigondela baluwa,

² inywiwa bumbangwa ja Mulungu uko Kolinto; inywi mzaṅaziγwa ni Kilisito Yesu, mzaitangwa, mγaluke waṅazi haṅwe na waja woshe wekemela zina ja Zumbe ywetu Yesu Kilisito kuntu koshe, uko kwawe hata kunu kwetu.

³ Mbazi imiikaile na mpeho yeanduka kwa Mulungu, Tate yweshu, na kwa Zumbe Yesu Kilisito!

Paulo amtogola Mulungu.

⁴ Sidaha kumlaviliza Mulungu ntogolo kwa mbuli ya inywi, kuti mzafilwa mbazi ni Mulungu mkidaha kuanga na Kilisito Yesu.

⁵ Hambu ivyo muvyoanga naye mzaγaluka wazuli mwe mbuli zoshe, milongele na mitailile yoshe,

⁶ kwa viya uwona wa Kilisito utendilevyo nguvu kwenyu.

⁷ Ne vyeleka, viya vyoshe tivyoinkwa kwa mbazi nkamuvikosa, hata kiṅwe, hambu mwamwafiza Zumbe ywetu Yesu Kilisito, alawile.

⁸ Uyu ne mwekamigela nguvu mpaka kwe bindilizo, mulawile mushingwa wa Zumbe ywetu Yesu Kilisito kishimasa.

⁹ Mulungu ni mkweli, ne mwitangwewo ndiye, mwangilane na ṅwanae Yesu Kilisito, Zumbe ywetu.

Mshepangane.

¹⁰ Namihimila, wanduγu, kwa mbuli ya zina ja Zumbe ywetu Yesu Kilisito, mulonge nyoshe mbuli ṅwenga du, kwenyu kusheoneke mipangano, nguvu yenyu iγaluke ija ya kufanyanya na kutaila iyo mbuli ṅwenga du.

¹¹ Hambu wanduγu wangu, nizaγambilwa mbuli yenyu ni wantu wa Kolowe, kuti kwenyu kuna nkumbizi.

¹² Nalonga ija mbuli kuti: Kila mimtu alonga: Imi ni ywa Paulo, imi ni ywa Apolo, imi ni ywa Kefa, imi ni ywa Kilisito.

¹³ Lushe Kilisito aipangiγwe? Kumbe ni Paulo akomiγweye na kuambiγwa mwe muti kwa mbuli ya inywi? Kumbe mubatizwe na zina ja Paulo?

¹⁴ Namlaviliza Mulungu ntogolo lushe kuti: Sina nibatizeye kwenyu kushima Kilisipo na Gayo,

¹⁵ kangwe muntu ashezalonga kuti: Mzabatizwa na zina jangu.

¹⁶ Kangi nizabatiza chengo cha Sitefana, sitaila, ati kuna mtuhu, nibatizeye.

¹⁷ Hambu Kilisito nkanitumile kwa batiza, anitumile kwa bilikila, nishehembe kulonga, kangwe mutingwa wa Kilisito ushezabeγeleshiγwa.

Mbuli ya mutingwa ni nguvu.

¹⁸ Hambu mbuli ya kukoṅwa kwa Yesu ni udashi kwa waja webanika, kwa ishwi tehonyiγwa, ni nguvu ya Mulungu.

¹⁹ Hambu kuigondiγwe: Viyuγo vya wakiyuγo nitazavibana, mitailile ya watalizi nitazaiusha.

²⁰ Mkiyuγo ni yuhi? Mtalizi ni yuhi? Mnyanyi ywa kiinushi ni yuhi? Mulungu nkabunkule viyuγo vya inu shi, kuti ni udashi?

²¹ Hambu kwa kuti inu shi na viyuγo vyakwe nkaimtaile Mulungu na viyuγo vyakwe vya Kimulungu, ne Mulungu akundilevyo kuhonya na ubilikizi ubabashi waja, wetozesha.

²² Hambu Wayuda wakunda vilozo, kangi Wagiliki walonda viyuγo.

²³ Miya ishwi timubilikila Kilisito akomiγweye mwe muti, Wayuda waihilwa ndivyo,

²⁴ Wagiliki waitanga, kuti ni udashi, miya waja waitangwewo, ati ni Wayuda, ati ni Wagiliki, tiyamubilikila Kilisito kwawe kuti: Ni nguvu ya Mulungu, kuti: Ni viyuγo vya Mulungu.

²⁵ Hambu ubabashi wa Mulungu una viyuγo kuzinka vya wantu, kangi unyonge wa Mulungu una nguvu kuzinka za wantu.

Wanyonge ne weshaγulwa.

²⁶ Olelai, wanduγu, mwitango wenyu: Wangi so wakiyuγo wa kiinushi, kangi wangi so wanguvu, wangi so wazumbe,

²⁷ miya wababashi wa kiinushi ne Mulungu ashaγulewo, kangwe agele wakiuγo shoni, kangi wanyonge wa kiinushi ne Mulungu ashaγulewo, kangwe agele wanguvu shoni;

²⁸ kangi wakiwawa kiinushi na waja webeleka ne Mulungu ashaγulewo na wahubi, kangwe abunkule waja wetogolwa kuti:

²⁹ Ni wantu, kangwe kushezaoneka muntu mwekitogola ṅwenye, Mulungu aliho.

³⁰ Kwakwe ne mkoanduka nako hata inywi mwena Kilisito Yesu. Uyu ne viyuγo vyetu vya Kimulungu na utanda na uṅazi na ukombozi, kangwe vigondiγwevyo vibontoke kuti:

³¹ Mwekidesa akidese na Zumbe!