1. Timoteyo 6 - Kishambala New Testament 2005

Watuṅwa.

¹ Watuṅwa weγoshoziγwa ndima za upuna washimile wabaha zawe, sa vivyoagiza, kangwe zina ja Mulungu na mbuli tizofuziγwa zishefyulilwe.

² Miya waja wena wababa wetozesha wohe washewabele kuti: Ni wanduγu, miya wakihime kuwatumikila, kwa kuti waja watozesha! Kangi vyaagiza, wakikundishiγwa kwa viya, wohe wavyozifya ndima zawe. Izi mbuli uziwafuze na kuwashunda!

Wafuzi wa ulongo.

³ Ati muntu ahinya mbuli ntuhu ntuhu, ati ashetozesha mbuli za Zumbe ywetu Yesu Kilisito zetinka ugima na ija mifuzize yeagiza waja wemwitika Mulungu,

⁴ ahikuka, nkana achotaila, lema jakwe ni kuhakitulila mbuli na kuhakikelezeza nkani, ne vyekabontokela na wizu na nkumbizi na kukankana na kushingana vibada na kuikilana nkulu zishizouka,

⁵ viya ni wantu wetalaluka; washinawo kweli hata, weγamba: Kumwitika Mulungu ni kuonela mali. We ivyoho uwatowe hulu!

Ntoγo ya mali.

⁶ Kweli kumwitika Mulungu ni buonela vikulu kushima muntu akitendwa ni luzisho na viya, tivyona navyo.

⁷ Hambu nkatina tiletilevyo mwe inu shi, kangi nkatina tivyodaha kuzahita navyo.

⁸ Ati tina vya ja na vya zwika, tiγambe: Vyatibesheza!

⁹ Miya wekunda kuγenyeza mali wagwilwa ni mγezo na mteγo na tamaa nyingi zishinazo bontokelo, zehosa zikigwiza wantu na kubada, wakobanikila.

¹⁰ Hambu kutamilwa ni mali ni zindo ja vibada vingi; kuṅwe wakiinwehela wazaaza mitozesheze yawe, wazakilumiza wenye vikulu muno.

Gomba nkondo ntana.

¹¹ Miya iwe muntungwa ywa Mulungu, uvinyilike! Timila vye utanda na mitumikile na mitozesheze na mikundishize ye kweli na uzizimizi na uhozu!

¹² Gomba iyo nkondo ntana ya kutozesha! Gwila sila ya nkalamo ya kale na kale! Hambu ne uitangilweyo, kangi uzaijiila malape matana, waona wangi wai haho.

¹³ Mulungu mweinka vyoshe nkalamo na Kilisito Yesu azifizeye akimlonga Pontiyo Pilato uwona ni waona wangu, nikikulaγiliza,

¹⁴ utozeshe mulomongwa kishidanko, kishimasa, mpaka Zumbe ywetu Yesu Kilisito ndiho nezealawile;

¹⁵ ndiye nezeamlavye, mishi ikitimiza, ni yuja mwetogolwa nguvu ike, ni zumbe ywa wazumbe na mfuṅwa ywa wafuṅwa;

¹⁶ uyu ike nkafa, aikala he langaila hashihobulikana, nkakuna muntu amweneye, kangi nkakuna mwedaha kumwona, uyu agimbikwe, kuti nguvu yakwe ni ya kale na kale! Amini.

Wazuli wa inushi.

¹⁷ Wazuli wa kiinushi uwalaγilize, washehikuke, washealile uzuli wekanyabanika, miya wamwalile Mulungu mwetishuγa na uzuli, tiiγute! Wazifye mbuli zawe,

¹⁸ waγenyeze ndima ntana, wainkile vyawe na nyemi, waangilane na weyae wawe!

¹⁹ Ne ndivyo wakiumbikile kitende chedi eha mishi ija, ndiyo nezeilawile, nezewamote nkalamo ya kweli.

Tulo.

²⁰ Timoteyo, γolokela viya uinkiγwevyo ukitowa hulu milongele mibada ya bule na mikanano ya watalizi washinawo kweli!

²¹ Hambu kuṅwe wakivitimila wazaaza mitozesheze yawe. Mbazingwa ikuikaile! Amini.