1. Timoteyo 5 - Kishambala New Testament 2005

Mulishi ndivyo alishe wantu.

¹ Mγoshi mγundu ushemkwamile, miya longa naye, viya ni isho! Wa gatigati ulonge nawo, viya ni wanduγuzo!

² Vivyoho wavyele waγundu ulonge nawo, viya ni wanyokwe! Wandele ulonge nawo na shoni zoshe, viya ni walumbuzo!

³ Wavyelengwa wafilwewo ni waγoshi wawe, we kweli uwashimile!

⁴ Ati mvyelengwa mwe ivyoho ana wanae ao wezukuluwe, shuti wanehina kushimila wawona nawo nyumbai mwawe na kuuziza wavyazi mbazi, wafilwezo ndiwo! Hambu ivi ne vyemtamila Mulungu.

⁵ Miya mvyelengwa afilweye ni mγoshi, mwe ike kweli, kialilo chakwe ni Mulungu du, akihima kilo na mushi kuhembeleza na kuvika;

⁶ miya ati alonda nyemi za kiinushi du, azabinda kufa ake moyo. Unu mulomo ne ndiwo ubilikile,

⁷ waange kishimasa.

⁸ Muntu akishepikila weyae, akishewapikila waja, awona nawo nyumbai mwakwe, uyu abunkula mitozesheze yakwe, kuti ni ya ulongo, uyu ni mubada kuzinka ṅwiyae ywa kimzimu.

⁹ Mvyelengwa afilweye ni mγoshi, ndiye agondwe ni yuja abindileye mavuli milongo mtandatu, ati ne ai mkaza muntu muṅwe,

¹⁰ ati ndima zakwe zatailikana, kuti ni ntana, ati ni kukuza wana, ati ni kutenda kishe, ati ni kuhaka waṅazi milundi, ati ni kushangalaza wakiwa, ati ni kubasha ndima ani ntuhu yetama.

¹¹ Miya waja wavyele wa gatigati wafilwewo ni waγoshi nwalemele! Hambu hata wakimtongela Kilisito watazaingilwa ni kihelehele na mγoshi, lushe watakunda kuγwiγwa, ne watabunkuka lushe,

¹² kuti mitozesheze yawe ya kale wazaiasha.

¹³ Vikibinda wana uvizu, wazwela kuanga mwe nyumba za wantu; kangi lushe so wavizu du, hata ulongo waukuza haṅwe na kuhenya, walonga vishivyoagiza.

¹⁴ Ne vyeleka, nikikunda, awa wa gatigati waγwiγwe, wavyale wana, waγolokele nyumba zawe, kangwe muntu mwetiikila nkani washemunke lubelele.

¹⁵ Hambu kuṅwe wazahituka, wazamtongela Satani.

¹⁶ Ati mvyelengwa mwetozesha aikala na wavyele wafilwewo ni waγoshi, shuti awashuγe vitana, kangwe bumbangwa jisheone lulah, jidaheshuγa waja wavyelengwa wafilwewo ni waγoshi, we ike.

Mbuli ya waγolokezi.

¹⁷ Waγolokezi weγolokela vyedi bumbangwa wagimbikwe kaili, kuisiiza waja wena ndima ya ubilikizi na ya ufuzi!

¹⁸ Hambu ugondengwa waγamba: Ṅombe yehaγatula ngano usheikante kanwa! Kangi: Mndima aagiziγwa ni upokezi wakwe.

¹⁹ Mγolokezi akifyaliṅwa, ushekunde, haishina waona waili ao watatu!

²⁰ Waja webana uwabunkule, weyae wawe wosheni wai haho, kangwe waja watuhu wohe waingilwe ni woγa!

²¹ Mulungu na Kilisito Yesu na walau washaγulwewo ni waona wangu, nikikulaγilizisha, uγolokele inu mbuli na kusheteγeleza moyo wako, kangi ushezaiγoshola na kumwombola muntu!

²² Ushefikemubadikila muntu mikono, kangi ushekigele mwe masa ya wantu watuhu, uikale kishimasa!

²³ Ushekanywa mazi du, miya unywe mvinyo hadodo kwa mbuli ya ifu na ya manyonge yashikudililayo!

²⁴ Wantu kuṅwe uhuza wawe uibunkuke, masa yashizati yagwe; kuṅwe wabunkuka, masa yaishizile.

²⁵ Vivyoho hala ndima ntana kuṅwe zimanyika haho, hata ziya zishizomanyika nkazidaha kukifisha.