1. Timoteyo 4 - Kishambala New Testament 2005

Tisheazaγanyiγwe ni wafuzi wa ulongo.

¹ Mpehongwa yalonga na kulaviliza kuti: Mishi ya bindilizo kuṅwe watazatowa hulu viya, ndivyo wakitozesha, watazatongela waja wena mpeho za uwazaγanyi na wehinya mbuli za kimpepo,

² wehemba na kulonga mbuli za ulongo,

³ viya watehya myoyo yawe mitana, welemeza kuγuwanal wetula miko ya nkande, Mulungu alavizezo, zijiγwe na kumtogola ni waja wetozesha, wetaila viya vye kweli.

⁴ Hambu vyoshe, Mulungu aumbilevyo, ni vitana, nkahana che kisitama, ati chijiγwa na kumtogola,

⁵ hambu chigimbikwa ni mbuli ya Mulungu chikivikilwa.

⁶ Ukiwafuza wanduγu izi mbuli utaγaluka mtumikizi ywa Kilisito Yesu mweiγuta ziya mbuli, tizotozesha, tizohinya kuti: Ni ntana, hambu nawe uzazitongela.

⁷ Miya ziya mbuli za ushimolezi zehalongwa, zetamila wavyele waγundu uzilemele ukikizweza kumwitika Mulungu!

⁸ Hambu kuja kuzweza ṅwili kwazifya mbuli ngeke du, miya kumtumikila Mulungu kwazifya mbuli zoshe; kangi kuna msuhi wa nkalamo ya ivi lushe na wa ija yealilwa.

⁹ Inu mbuli ni ya kweli, yaagiza kutozeshiγwa ni wantu woshe; kangi ne vyeleka,

¹⁰ tikiona lulali na nkondo, kwa kuti tiyamwalila Mulungu mwe moyo, mwehonya wantu woshe, miya kuisiiza waja wetozesha.

¹¹ Ivi uviwalaγilize, uviwafuze!

Timoteyo akihime.

¹² Kusheoneke mwekubela kuti: Uke mbwanga! Miya wetozesha shuti wakuolele milongele na myangile na mikundishize na mitozesheze na mizifize ya mbuli zoshe!

¹³ Mpaka nihoizila, himila vivyoho kuwafyomela na kuwashunda na kuwafuza!

¹⁴ Ushebele cha mbazi, uchona nacho! Hambu uzachiteγanyiziγwa, kangi uzachiinkwa aho, waγolokezi wakikubadikila mikono.

¹⁵ Ivi vitongonyeze, uange navyo, kangwe woshe waone, uvyokiγesa!

¹⁶ Kiγoje ṅwenye na mbulingwa, uzofuza, ukihime vivyoho! Hambu ukibontola ivyoho utakivunila ṅwenye na waja wekuiva.