1. Timoteyo 2 - Kishambala New Testament 2005

Utanda wa bumbangwa wa kuhembelezeza wazumbe.

¹ Mbuli, niyohimila kuzinka mbuli zoshe ni ya kuγamba; Mvike na kulombeza na kuhembeleza na kulavya ntogolo kwa mbuli ya wantu woshe,

² kwa mbuli ya wazumbe na wafuṅwa woshe, kangwe tiikale mpolele na kutongomala na kumwogoha Mulungu na kumtumikila.

³ Ivi ne vyemtamila mhonya ywetu Mulungu, ne avyokunda.

⁴ Hambu akunda, wantu woshe wahonyiγwe, wabulize kutaila viya vye kweli.

⁵ Hambu Mulungu ni muṅwe, kangi mtakuivanya Mulungu na wantu ni muṅwe, ni yuja niuntu Kilisito Yesu,

⁶ ndiye akikiinkila, akombole woshe; ne uwona wekabilikilwa, mishi ihokatimiziza.

⁷ Imi nami nizaugimbikilwa mubilikizi na ntuṅwa, nalonga kweli, sihenya, ni mfuza wamzimu kwa viya, nivyotozesha, nivyotaila vye kweli.

Vyeagiza waγoshi na wavyele.

⁸ Lushe nakunda, hantu hoshe kuvike waγoshi wakiinula mikono iṅazileyo kishimaya na kushetongonyeza mbuli ntuhu.

⁹ Vivyoho wavyele waange na mizwikile yeagiza, wakihambe na kutenda shoni na viyuγo, washehembele mavunga yawe, washezwike vya zahabu na mashalushalu na shuke zena kima kikulu,

¹⁰ miya wavike, sa vivyoagiza wavyele weγamba: Ti wa Mulungu, wekihima kuzifya mbuli zoshe!

¹¹ Mvyele ahine kutongomala na kuitika!

¹² Sikundiza mvyele kubilikila cha sale, hata kumfanyanyiza mγoshi ywakwe simkundiza, kwakwe ni kutongomala du.

¹³ Hambu bosi kuzaumbiγwa Adamu, vikibinda ni Ewa.

¹⁴ Kangi Adamu siye aufiγweye, miya mvyele ne aufiγweye, ne alongoleye kubana.

¹⁵ Miya atazahonyiγwa na kuvyala wana, ati awa waikala na kutozesha na kukundishana na kutenda myoyo yeṅala haṅwe na viyuγo.