1. Petelo 4 - Kishambala New Testament 2005

Kulumila kwetu kwatibimila kuhela uhambanyi.

¹ Kwa kuti Kilisito azalumila mwe ṅwili wakwe kwa mbuli ya ishwi, hata inywi γuwai myoyoye ivyoho! Hambu mwelumila mwe ṅwili wakwe ahela kubana;

² lushe mishi yakwe, ndiyo aje kunu shi, nkezeaije kwa uhalami wa kimuntu, miya kwa kikundile cha Mulungu.

³ Hambu vyabesha, kuti mishi izinkileyo mzaγoshola kikundile cha wamzimu mkianga na mumpa na uhalami na kushindatengela na kukundisha miviγa na mpombe na kuvika fika zishizoagiza.

⁴ Kwa izi mbuli waja washentuka, kuti nkamwanga nawo na kushekolelwa vivyoho ni uwo mumelo, ne vyeleka, wakimikanka.

⁵ Miya watazabunkulwa ni yuja mwekiteγa, alahe we moyo na wafilewo.

⁶ Hambu ne vilekilevyo, hata wafilewo wakizabilikilwa, kangwe nezewalahwe na mili yawe kiwantu, kangi wakalame na mpeho zawe Kimulungu.

Kundishanai.

⁷ Bindilizo ja vyoshe ji hehi; kwa ivyoho tendai viyuγo, mshetengele, kangwe mdahevika!

⁸ Isiizai kukundishana kuzinka vyoshe, kwa kuti mkundishano wausha uhuza ungi!

⁹ Fikizanyai na kishe na kusheṅuna!

¹⁰ Kangi mtumikilane kila muntu na ṅwiyae na viya, ainkiγwevyo kwa mbazi, sa wantu weγolokela izo mbazi nyingi za Mulungu na utanda!

¹¹ Ati muntu alonga, avilonge viya ni mbuli za Mulungu! Ati muntu atumikila, aviγoshole kwa ija nguvu, Mulungu ayotinka, kangwe na ivi vyoshe Mulungu atogolwe kwa mbuli ya Yesu Kilisito mwena utana na ufuṅwa kale na kale! Amini.

Mkilisito akiokwa moto atamilwa.

¹² Wanduγu, mshevimake, viya mteona mbuli ngeni, mishi inu mkiokwa moto, kangwe mγezwe!

¹³ Miya kwa viya, muvyopangilwa milumilwe ya Kilisito, tamilwai, kangwe nezemtamilwe na kulinga, utana wakwe uhozalawila.

¹⁴ Mkikankwa, kwa kuti muna zina ja Kilisito, tamilwai! Hambu mpehongwa ya utana na ya Mulungu yamiikaila; kwa waja yabelwa, kwenyu yagimbikwa.

¹⁵ Kusheoneke kwenyu mwelumiziγwa, kuti ni mkoma wantu ao mubavi ao mhambanyi ao mtungulu!

¹⁶ Miya akilumiziγwa, kuti ni Mkilisito, asheone shoni, miya amtogole Mulungu kwa mbuli ya iji zina!

¹⁷ Hambu mishi izatimiza, masa yaandiila kugwa he nyumba ya Mulungu; ati yaandiila kwetu, lushe bindilizo ja waja washiwoitika ulaungwa wedi wa Mulungu ni jihi?

¹⁸ Ati mtanda aona ntoγo ya kuhona, he mupapala na mhuza ataoneka hahi?

¹⁹ Ne vyeleka, nikiγamba: Welumila, sa Mulungu avyokunda, wazifye mbuli zawe! Ne ndiho wadahemlaγiliziza Mulungu myoyoyawe, kuti udiye kiumbe mwe kweli.