1. Petelo 2 - Kishambala New Testament 2005

Kihimei kukiṅaza sa mawe ye moyo.

¹ Lushe muleke ubada woshe na lwufyo lwoshe na mambeza na wizu na lushingo lwoshe!

² Sa vizana vivyelwevyo mishi inu, timilai mele ya kweli yashiyohosa, mkuziγwe ndiyo, mpaka mvunilwe, ati mzaandiila kuona kuti:

³ Zumbe ni mtana!

⁴ Uyu ni iwe je moyo. Kweli wantu wazajibenta, miya kwa Mulungu jakundwa kuzinka vyoshe, jiishaγulwe.

⁵ Mkimubwila lekai, hata inywi mzengwe vikilo ja kimpeho, viya mu mawe ye moyo, wenye mγaluke wavikizi waṅazi weiγala ṅombe za mviko za kimpeho zemtamila Mulungu kwa mbuli ya Yesu Kilisito!

⁶ Hambu mwe ugondengwa muna mbuli ya kuγamba: Olela, naika uko Siyoni iwe ja heta jishaγulwejo, jeṅa kima, ndiye ajialile nkezeabanike!

⁷ Lushe inywi mwetozesha jizamiγalukila kitana chenyu, miya waja washiwotozesha jiya iwe,

⁸ wazengo wabentilejo, ni jijo jewaγalukila shikamilo ja heta na iwe ja kukikwila na kungu ja kuihilwa; wakikwila mumo, kwa kuti nkawaitika mbuiingwa, kangi ne waikilwevyo.

⁹ Miya inywi mu chengo chishaγulwecho, mu wavikizi wa kizumbe, mu bumba ṅazi, mu mbalingwa yena ṅwenye, kangwe muhilikile viya vitana vya yuja, ndiye akimiitanga, mulawe mwe lwiza, mwingile mwe langaila jakwe jemasha.

¹⁰ Kale ne mwishi mbali, miya lushe mu mbalingwa ya Mulungu; ne mwishifilwe mbazi, miya lushe mzabinda kufilwa mbazi.

Votai kihelehele choshe.

¹¹ Wanduγu, kwa kuti nkamu wakaya, mu watafi, namihimila, mtowe kihelehele choshe cha mili hulu cheomanya myoyo.

¹² Tendai myangile mitana kwa wamzimu, kangwe waja wemishinga kuti: Mu wahambanyi, waone na mesho yawe ndima zenyu ntana, kangwe nezewamtogole Mulungu mushi uja, ahozalawila.

Itikai wafuṅwa woshe.

¹³ Kwa mbuli ya Zumbe itikai utanda woshe wa kimuntu!

¹⁴ Ati ni zumbe, kwa kuti ni mkulu, ati ni wafuṅwa, kwa kuti watuṅwa ndiye, walahe wahambanyi, watogole wezifya.

¹⁵ Hambu ne Mulungu avyokunda: Mwushe tumala ya wantu wababashi na kuzifya,

¹⁶ kuti mu wantu wabindilewo kukombolwa; kangi kunu kuγamba: Mwikombolwe, mshekuγalushe luγubikile lwa ubada, miya angai, sa vivyoagiza wapuna wa Mulungu!

¹⁷ Shimilai woshe! Kundishai wanduγu! Mwogohei Mulungu! Washimilei wazumbe!

Wapuna waitike.

¹⁸ Weikala hangwa waitike wababa zawe na woγa woshe, ati ni watana na wahozu, miya hata vivyoho waja wena mbifya!

¹⁹ Hambu ivi ne mbazi, muntu akizizimiza, akitungulukwa, akilumiziγwa vibada kwa kuγamba: Ni ywa Mulungu.

²⁰ Hambu ni vitana ani, mkizizimiza mkitowiγwa mwibanile? Miya mkizizimiza mkilumiziγwa mwizifize, ivi ne mbazi kwa Mulungu.

²¹ Hambu ne mwitangilwevyo, kangi hata Kilisito azalumiziγwa kwa mbuli ya inywi, ne azatitulila sila, mtongele majato yakwe.

²² Ṅwenye nkaγoshole uhuza, mambeza du nkayaoneke mwe kanwa chakwe;

²³ akikankwa, nkakankile, akilumiziγwa nkashafuke, miya azaviinkila kwa yuja mwezifya masa.

²⁴ Mahuza yetu azayakweza ṅwenye na ṅwili wakwe mwe muti, kangwe ishwi kwa viya tivyokombolwa tiikaile utanda; uyu vilonda vyakwe ne honelo jenyu.

²⁵ Hambu ne mkifanana na ngoto ziaγilezo, miya lushe mzahitulwa na kwa mulishi na mwolezi ywa myoyo yenyu.