1. Petelo 1 - Kishambala New Testament 2005

Tulo.

¹ Imi Petelo, ntuṅwa ya Yesu Kilisito, namigondela baluwa inywi mshaγulwewo, mweikala ike uko Ponto na Galatiya na Kapadokiya na Asiya na Bitiniya.

² Kwa viya, Mulungu Tate avyomitaila kale, azamiṅaza na mpeho yakwe, mdaheitika, kangi mumyaγilwe mpome ya Yesu Kilisito. Mbazi na mpolele ziisiize kuγenela kwenyu!

Kifu chetamisha tichoikilwa mwe lwingu.

³ Atogolwe Mulungu, ishe ja Zumbe ywetu Yesu Kilisito! Hambu kwa ungi wa utungu wakwe azativyala ka mbili, titende kialilo che moyo, kwa kuti Yesu Kilisito azafufuka kwa wafilewo,

⁴ kangwe nezetipale chiya kifu chishichobanika, chishichoshuzuka, chishichonyuluka, muchoikilwa mwe lwingu inywi,

⁵ mweγolokelwa na nguvu ya Mulungu, mtozeshe, mwone uja uhonya weunga kulawila mishi ya kushilikiza. Ne ndiho mulinge;

⁶ hambu ati vyamitala, mwaona sungu ivi lushe hadodo ani na miγezo mingi, kangwe vimanyike kuti:

⁷ Kima cha mitozesheze yenyu ni kikulu kuzinka chiya cha zahabu yekabanika yekazifiγwa ni moto, ne ndivyo nezemwinkwe ntogolo na utana na ufuṅwa, Yesu Kilisito akizalawila.

⁸ Uyu nkamumwene, kangi mwamkundisha; hata mkishemwona, mwamtozesha vivyoho; kwa inu mbuli nezemulinge kwa nyemi ishiyodahikana kulongwa;

⁹ aho ndiho nezemumote bindilizo ja kutozesha kwenyu, ni uvunizi wa myoyo yenyu.

¹⁰ Unu uvunizi wateγanyingwa, ndiwo wakiteγanya mbuli za izi mbazi mufilwezo inywi,

¹¹ wazaulonda, wazaudosa, wakifanyanya, ati ni mishi ihi ija, mpeho ya Kilisito wayona nayo iyoteγanya, ikiwaonyesha kale milumilwe yemtala Kilisito na utana woshe wetongela.

¹² Waja waitaile, kuti nkawakiγoshwele wenye ndima na izo mbuli, miya waitiγoshwele ishwi; hambu lushe hata inywi mzabilikilwa izi mbuli ni waja wamibilikilewo kwa mpeho ṅazi yeanduka mwe lwingu. Ivi hata walau wana futofuto ya kuviolela.

Miangile yetu itende miṅazi.

¹³ Kwa inu mbuli kikantei kimpeho, mshetengele! Bontolai na kualila vivyoho mbazingwa, muyoletelwa, Yesu Kilisito ahozalawila!

¹⁴ Sa wana weitika msheange na luja luzisho lwenyu lwa aho kale, ndiho mkiikala tumala!

¹⁵ Miya sa yuja, ndiye akimiitanga, avyo mṅazi, hata inywi γalukai waṅazi mwe myangile yoshe!

¹⁶ Hambu kuigondiγwe: Γalukai waṅazi! Hambu imi ni mṅazi.

¹⁷ Kangi mwamwitanga yuja Tate mwelaha miγoshwele ya kila muntu na kusheolela cheni cha muntu; kwa ivyoho angai mishi inu ya uγeni na kuogoha!

¹⁸ Tailai kuti: Vintu vyebanika, hala ni feza ao zahabu, sivyo muvyokombolwa navyo mwe myangile yenyu ya kikale ishinayo bontokelo,

¹⁹ miya mkombolwe na mpome yena kima, ni ya Kilisito, kwa viya avyo ṅwangolongwa ishiyo masa, ishiyo kilema.

²⁰ Kweli aivifanyanyiziγwe viya, ngulu ngima ishizati iumbiγwe, miya alawile mishi inu ya nyuma kwa mbuli ya inywi.

²¹ Uyu ne alekileye, mkimtozesha Mulungu, ndiye akimwinula kwa wafilewo, ndiye akimunka utana, kangwe mdahemtozesha Mulungu na kumwalila.

²² Ṅazai myoyo yenyu mkiitika mbulingwa ye kweli, mkundishane na kushehenya, mwisiize kukundishana kwa moyo kila muntu na ṅwiyae!

²³ Hambu vilekilevyo, mkivyalwa ka mbili, sivyo vyebanika, ni mbulingwa ya Mulungu mwe moyo yekalama.

²⁴ Kwa kuti vyoshe vye moyo vifanana na mani, utana wawe woshe ufanana na maluwa ya tunduwi, mani yakalaγala, maluwa yadahuka,

²⁵ miya mbulingwa ya Mulungu yakalama kale na kale. Kangi inu mbulingwa ne ibilikilweyo kwenyu kuti ni yedi.