ZEKARIA 9 - Bibilia Kui Mdedie fo Kimochi

Mwanduye fo mkambo ya mṟasenyi

¹ Otambahaluo lo idedo lya Mndumii, lyilededo kipfa kya oruka lo Hadraki na Damasiko kowa handu hake hesiamoo; kipfa riso lya mndu o wandu na njoshari tsose tsa Israeli lyeambuya Mndumii,

² na Hamati ii mṟasenyi; na Tiro na Sidonyi, kipfa nyi awode wuṟango wung'anyi.

³ Tiro nyi alewika omombo, kasanyia fesa cha msanga, sahabu njicha cha odoko lo njienyi.

⁴ Ambuya, Mndumii nyi echimsoka masaa hake, nao nyi echimusoka pfinya ai natso ipalyipalyinyi, nao nyi echirumatso na modo.

⁵ Ashkelonyi nyi echiṟeenze na iowuo; Gaza nao nyi echieṟewe mnu; na Ekironyi, kyamba kikusirio kyake kewutoho; mangi nyi echirumara wuka Gaza na Ashkelonyi echiwada wandu pfo.

⁶ Mana alai o mbuka njicha nyi echiwa mangi ipfo Ashdodi, na inyi njechiwutaho orikiki lo Wafilisti.

⁷ Inyi njechiwutaho samu ipfo dumbunyi lyake, na mawicho hake ipfo mahehohu hake; o nechiwa walya watsuihee wawe wa Ruwa odu; nao nyi echiwa cha mndu ang'anyi ipfo Yuda na Ekironyi cha Myebusi.

⁸ Inyi njechiwika hema lyako njora tsose tsa mba yako kundu njiime wakituwa wako, mndu oose nalawone keida napfo ma iwuya; manya mndu ekewonyia wengi echiidapfo-pfo, kipfa wulalu ngawona na meso hako.

Mangi ya ofoṟo

⁹ Chihiyo iyo mana o Sioni Kapa ngululu iyo Yerusalemu Ambuya mangi yapfo nyi akuchea Nyi o wusumhanyi nyi arie okiṟo Ai mwoloru ambawe nyi nzoi Lii ihache lya nzoi.

¹⁰ Na igari lya shida njechiliwuta likae kuleshe na Efraimu, na frasi ikae kuleshe na Yerusalemu, welasa na mfi ya shida shirumatso nechiongoya wandu wa mkambo mbonyi tsa ofoṟo; na uikolonyi woke wochidung'ana kose wokia ipalyipalyi itane ipalyipalyi na wokia meda itane mtsitsionyi fo oruka.

Iwihiṟo lya wandu wa Ruwa

¹¹ Na kui mbonyi tsapfo iyo na kipfa kya samu ya mkundano fopfo, ngawuta wapfungo wapfo kulya ṟungunyi lyilawode mṟinga

¹² Wuyenyi na omombohu lo owa nyo wapfungo wa mbedie, shika inu ngahamba njechikuwihiṟiya kya ngeria kawi.

¹³ Yuda njechimhaluo nawe wuda na Efraimu nawe mfi foko. Iyo Sioni! Wandu wapfo njechiwahaluo wawe oshu lopufukia wandu wa Ugiriki; njewahaluo cha oshu lo mndu mkari o shida.

¹⁴ Nao Mndumii nechiwonekana huye yawo, Mfi foke fochiwa cha mbaṟuko, Mndumii-Ruwa nechikapa ombe, Nechihenda na otanu sa lwapfinya lo nuka

¹⁵ Mndumii menyi Matorito nechiwaringa; Wechilya wawechuma maho ha odeho, Wechinyo na ifahya kipfa kya mvinyo, Wechiichuṟo cha mboṟiko, cha membe tsa rasyonyi.

¹⁶ Mndumii-Ruwa owo nechiwakiṟa mkonu fo, cha po lya wandu wake; Kipfa wafananyi na oṟo tsa wuhuru wung'anyi Tsekemakema huya oruka.

¹⁷ Chando wucha woke wung'anyi, Na ichia lyake lyielewetsie; Mso fochilumbisha wana wa kisoṟo Kipfuo ko wana wa kika.