ZEKARIA 7 - Bibilia Kui Mdedie fo Kimochi

Ikuotoya

¹ Nahong'u maaka fo kaana fo mangi iya yelaho nyi Dario, Idedo lya Mndumii likachea Sakaria, mkonu fo kaana fo meeri fo kenda foilaho Kisleu.

² Kyasia wandu wa Betheli wawedumie Sharesa na Regem-meleki na wandu wawo, kundu waterewe osaṟio ko Mndumii,

³ Wadede na Wakohanyi wa mba ya Mndumii menyi Matorito na waikimbi wo ke, “Na kinjiwaṟi ifihiṟa meeri fo katanu na ilekana na wandu, chando ndeuta maaka ii ifoi yameida?”

⁴ Naalyo idedo lya Mndumii likanjichea lyehamba,

⁵ “Wia wandu wose wa oruka na wakohanyi ochihamba ilindi mulekuotoya na ikuinadya meeri fo katanu na meeri fo mfungade maaka yo makumi mfungade ngesa mulekuotoya kipfa kyako, mulekuotoya kyako?

⁶ A kiheri molya kando na inyo isho chi kipfa kya mbihu yo yanu?

⁷ Iho chiho madedo Mndumii alehamba kui madumbu ha waikimbi wa kacha, kiheri Yerusalemu iledamyo nyi wandu na ikuwonya osu, na mṟi iya iwetengetie; kiheri kilya oruka lo Negebu na Shefala iwewode wandu?”

⁸ Nahong'u idedo lya Mndumii likachea Sakaria lyekamba.

⁹ “Mndumii Menyi Matorito nahamba, anduonyi muwedumbuo kya lohi, orio mndu nasaṟiye odoe

¹⁰ Mulawonye mkusu, ma mngoeda, ma mhenu, ma mkiwa, ma mndu kawa ada kiidi kyanu, ma kulakae akusaṟa kya owicho wosuo manomae.

¹¹ Kyaindi iwo waleleha iadanyia, wakakumba madedoho mhongo wakashinga madu hawo.

¹² Wakahaluo mrima yawo ikafanana na iho liumu; kundu walaicho wuwawaso na madedo ha Mndumii menyi Matorito alehaduma kui mumuyo mawokonyi ha waikimbi wa kuwooka; kui kipfa kya ikyo nyashi ya Mndumii menyi Matorito yechiwaakiya.

¹³ Kipfa lilyandi alefihiṟa walakunde iicho nawo wechifihiṟa ma njechiadanyiapfo, nyi wudo Mndumii Menyi Matorito ahamba.

¹⁴ Indi njechiwarahanyitsa na otanu kiidi kya wandu wa mkambo walawewaichi. Kyasia nyi wudo oruka luwei msefu numa yawo, ma kuwewode mndu aleidahopfo, ma alewuyapfo, kipfa walehaluo msefu oruka lulya luwei lucha.”